Galeazz Maria Sforza

Quest articol chì l'è scrivuu in lombard, grafia milanesa.

Quella vos chi la gh'ha mìnga dì font o a hinn tròpp pocch. Per piesè, gionta di font a la vos.
Per avè on'ideja di alter vos senza font, vardee chichinscì.

El Galeazz Maria Sforza (Fermo, 24 de genar del 1444 - Milan, 26 de dicember del 1476) l'è staa duca de Milan.
L'era el primm fioeu del Francesch Sforza e de la Bianca Maria Viscont.
A la mort del pader a l'era in Francia: ciamaa in patria de soa mader, el gh'ha 'vuu frontà on viagg pien de pericoi, perchè l'ha dovuu passà per i territori di Savoja, sò nemis.
El 20 de marz del 1466 l'è rivaa a Milan: in di primm temp l'ha governaa con la Bianca Maria, ma col temp el sò caratter autoritari l'ha ruzaa la mader a 'ndà via de Milan.
El par che proppi el sò caratter el sia staa vuna di reson de la soa mort: de fatti l'è mort per ona congiura de nobei milanes, che soportaven pu el sò fà de tirann. El 26 de dicember del 1476 l'è staa copaa de Gianandrea Lampugnan, Girolom Olgiaa e Carlo Viscont, arent a la Gesa de San Steven.
El s'è sposaa con la Bona de Savoja: del matrimoni hinn nassuu ona motta de fioeu:

Gian Galeazz Sforza (1469-1494), duca de Milan.
Ermes Maria Sforza (1470-1503), marches de Tortona.
Bianca Maria Sforza (1472-1510), miee de l'imperador Massimilian I.
Anna Maria Sforza (1473-1497), miee del Fonso I d'Este.

Inoltra el gh'ha 'vuu anca di fioeu de foeura del matrimoni. De la Lucrezzia Landrian hinn nassuu:

Carlo Sforza (1458-1483)
Catarina Sforza (1463-1509), sciora de Forlì e de Imola.
Lissander Sforza (1465-1523), scior de Francavilla.
Chiara Sforza (1467-1531), miee del Francesco Dal Verme.

Con la Luzzia Marlian:

Galeazz Sforza, "contin" de Melz.
Otavian Maria Sforza (1475-1545), vescov de Lod.