Gianfranco Miglio

Quest articol chì l'è scrivud in lombard, con la Noeuva Ortografia Lombarda

Gianfranco Miglio
Senator de la Republega
Ol durar del mandad	23 de avril 1992 – 29 de masg 2001
Lejisladure	XI, XII, XIII
Grup parlamentar	Liga Nord (1992-1994) Grup Messedad (1994-2001)
Coalizion	PdL (XII), PpL (XIII)
Circoscrizion	Lombardia
Colleji	Com (XII, XIII)
Informazion jenerale
Partid politeg	DC (1943-1959) Ind. vesin a la DC (1959-1968) LN (1990-1994) PF (1994-2001)
Tendenza politega	Federalism
Titol de studi	Laurea in giurisprudenza
Universitaa	Università Catolega del Sacher Coeur
Profession	Professor de l'università

El Gianfranco Miglio (Com, 11 de sginer 1918 - Com, 10 de avost 2001) a l'è stad un politegh e politolegh italian, senator de la Republega del 1992 al 1994 'me independent in di file de la Liga Nord e poeu del 1994 al 2001 cont el Partid Federalista dopo che l'ha s'cepad con l'Umberto Bossi.

L'ha insegnad a l'Università Catolega del Sacher Coeur de Milan, indova che l'è stad anca el preside de la facoltà de scenze politeghe del 1959 al 1988. Alev del del Alessandro Passerin d'Entrèves e del Giorgio Balladore Pallieri, con lor l'ha studiad i classegh del penser giuridegh e politegh. Fautor de 'n esecutiv pussee fort e del federalism, el sostegniva 'n proget de costituzzion federal partid in quater macro-region. L'è stad anca vun di pussee grand studios in Italia del Carl Schmitt.

I prim agn

El s'era lauread in Giurisprudenza in del 1939 con la tesi "Origini e i primi sviluppi delle dottrine giuridiche internazionali pubbliche nell'età moderna", o ben "Origin e prim desvilup di dotrine giurideghe internazzionai publeghe in l'era moderna". Dopo l'ha fad l'assistent volontari per la catedra de "Storia di Dotrine Politeghe", che 'l d'Entreves el gh'haveva e l'ha tegnud fina a la fin di agn '40. L'ha schivad de andà soldad in la segonda guerra mondial per un so problema del sentì che el gh'haveva de quand che l'era nassud.

In del 1948 l'è deventad un liber professor e in di agn 1950 el se dedica al studi di oeuvere di vari storegh e giurista, soratut todesch, compagn di quater volum del Deutsche Genossenschaftsrecht, che l'Otto Von Gierke l'haveva scrivud in tra el 1869 e'l 1913 e i sagg de storia ministrativa de l'Otto Hintze, che eren stad voltad in italian del Pierangelo Schiera, che l'era un so alev.

Propi in quei agn là el Miglio l'ha cognossud la produzzion del Max Weber e l'è stad in tra i prim in Italia a studià ben "Economia e Società", overa pussee importanta del sociolegh todesch, squasi descognossuda in Italia in quell moment li.

El desvilup del lavorà scentifegh

La scoeula che gh'hann dedicad a Ader

El Miglio storegh de la ministrazzion

A la fin di agn cinquanta l'ha fondad, insema al giurista Feliciano Benvenuti, l'Istitut per la Scenza de la Ministrazzion Publega, che l'è stad anca el so vicediretor per un quaj agn. In d'un sagg assee regordad del 1957, ciamad "Le origini della scienza dell'amministrazione", el professor comasch l'ha descrivud in manera ciara e eleganta i radis storeghe de la disciplina, al che la s'era interessad perchè in quej agn là i stat haveven tacad a doperà di politeghe de pianifegazzion per fà cresser l'economia.

La Fondazzion italiana per la storia ministrativa

El Miglio l'ha donca sentud el besogn de studià in manera pussee sistematega la storia di poder publegh europee e, in di agn '60, l'ha fad su la Fondazzion Italiana per la Storia Ministrativa, o ben un istitut che 'l faseva di ricerche a reguard in manera rigorosa e scentifega, cont un schema de istruzzion per i collaborator che l'era deventad anca famos perchè l'era ciar e ben organizad.

Con la F.I.S.A el Miglio el gh'haveva un obietiv assee ambizzios: el voleva scriver una storia costituzzionala che la tirava dent i ministrazzion publeghe de sit e temp diferent per fà una tipologia di istituzzion de l'Età de Mez al dì d'incoeu, cont i trat che i spartiven e quei che invevi meteven in comun tucc i poder publegh.

Un'altra reson de 'sto lavorà chi a l'era el volé studià i poder publegh in d'una manera analogega-comparativa, cont un metod scentifegh che l'Hintze l'haveva sgiamò doperad in d'una manera parzial in la prima mità del noeuvcent: el professor comasch el voleva donca definì l'evoluzzion storega del stat moderno.

I Acta italica

La Fondazzion la dava foeura trè collezzion: i Acta italica, l'Archivi (pardid in do collane: la prima la parlava di so ricerche e di atività prateghe, la segonda di lavorà di pussee important storegh de la ministrazzion) e i Annai. In tra i pussee important lavorà storegh dad foeura in l'Archivi regordom el liber in sui comun italian del Walter Goetz e 'l famos sagg del Pieto Vaccari in su la territorialità in del contad de l'Età de Mez. In la prima serie di gioven studios hann scrivud i so lavorà in la storia di istituzzion: la Gabriella Rossetti, aleva del storegh Cinzio Violante, l'ha dad foeura un liber assee aprofondid in su la società e i istituzzion a Cologn in la Volta Età de Mez; l'Adriana Petracchi l'ha dad foeura inveci la prima part de 'na ricerca in sul cresser storegh de l'intendenza in la Francia de l'ancien règime; l'è de regordà anca el liber consistent del Pierangelo Schiera in sul cameralism todesch e l'assolutism in di Pais germanegh pussee important.

L'è de fà un alter descor inveci in sui Acta italica, che gh'haveven dent i ducument de la publega ministrazzion di nazzion italiane prima de l'unifegazzion: se pensa che l'ispirazzion per quella serie chi l'è vegnuda al Miglio dopo havé studiad i lavorà de l'Hintze: vers la fin del secol quell de desnoeuv el storegh todesch l'haveva scrivud di lavorà in su l'aministrazzion publega prussiana in sui Acta borussica, una collaba che la trasciava i origin storeghe de la nazzion di Hohenzollern.

L'edizzion di lavorà de la comission Giulini

In tra i volum dad foeura in di Acta Italica a gh'è anca l'edizzion di lavorà de la Comission Giulini, curada del Nicola Raponi in del 1962, che 'l Miglio ghe tegniva propi tant e l'ha poeu doperad per el so Vocazione e destino dei lombardi. La Comission, in pè del 10 al 16 de masg del 1959 guidada del nobel milanes Ceser Giulin de la Porta, la gh'haveva de scernì i norme in vigor in Lombardia, desgià che 'l Camillo Benso el voleva tegnì separad i ordenament piemontes e lombard.

El sagg "i contradizzion del stat unitari"

In del 1969 el dà foeura el sagg "i contradizzion del stat unitari", scrivud in ocasion di 100 agn di lesg de unifegazzion italiane, indova che 'l studia i efet gram grament che 'l centrament ministrativ l'ha menad in sul sistema politegh italian. Per lu, la class politega italiana a l'è stada minga bona de scriver lesg bone per un territori che 'l va di Alp a la Sicilia e l'ha did che 'l doperà la lesg piemontesa per l'Italia intrega a l'è stad compagn de metégh el vestid de 'n nan a 'n gigant.

A dì del Miglio, i fondator del Stat italian gh'haveven tema dopo di event de l'unità e donca hann volud tegnì el so sistema de prima, che per la pupart di citadin, oltra che forester, el s'è mostrad cioch. El met in ciar anca 'n alter element assee important, che anca se i lesg dade foeura del Parlament valeven per tut el Pais, per agn ogni region e banda i interpretava a la soa manera e donca a gh'era quell che lu el ciamava "cripto-federalism", dad del calà de federalism istituzzional.

El Miglio e 'l Otto Brunner

In la soa formazzion a inn stad propi important i lavorà del storegh austriegh Otto Brunner, e l'ha fad voltà in italian vari di so liber, in tra i che l'oeuvera monumental Land und Herrschaft del 1939, indova che 'l ciapava in esam i ordenament costituzzionai e 'l meteva in ciar i diferenze in la concezzion del dirit in tra l'età de Mez e 'l di d'incoeu.

La traduzzion a l'è stada fidada in principi a l'Emilio Bussi, e la saria dovuda vesser dada foeura sgiamò in di agn '60 in di volum de la F.I.S.A, ma a l'è fornid domà in di agn '80, grazzia ai so alev Pierangelo Schiera e Giuliana Nobili. L'è stad infin dad foeura de de Giuffrè in del 1983 cont el titol "Terra e potere" 'me part de la collana "Arcana imperii" de scenze políteghe, che 'l Miglio l'era diretor.

El Miglio e la Mafia

«Mi sont anca per tegnì la mafia e la 'ndrangheta. La Bassitalia la gh'ha de dàss un statut che 'l poggia in su la personalità che la comanda. Cossa l'è la mafia? Poder personal, che 'l riva fina al delit. Mi voeuli minga menà el Mezdì al modell europee, la saria 'na roba cioca. El gh'è anca un clientelism bon che 'l mena al cresser de l'economia. A bon cunt, gh'è de partì de l'ideja che gh'è di manifestazzion tipeghe del Sud che gh'hann de vesser costituzzionalizade.»

(G.Miglio)

Quand che 'l parlava del contrat in tra i regim giuridegh "fregg" e "cald" el sostegniva che besognava devilupà di orden giudiegh diferent per i vari società e colture, boni de responder ai so esigenze. Per quella reson chi l'è rivad a sostegnì, in d'una manera provocatoria, la legalizazzion de la mafia, la soa riflession la voleva catà foeura i reson profonde a la bas de Cosa Nostra, de la Camorra e de la 'ndrangheta, desgià che domà di istituzzion che vann insema a la comunità poden fà su un futur debon alternativ al present.

Bibliografia

Liber scrivud del Professor Miglio

• G. Miglio, I cattolici di fronte all'unità d'Italia, 1959.
• G. Miglio, L'amministrazione nella dinamica storica, 1961 in Storia, amministrazione e costituzione, Annale ISAP 2004.
• G. Miglio, Le trasformazioni dell'attuale regime politico, 1965.
• G. Miglio, Il ruolo del partito nella trasformazione del tipo di ordinamento politico vigente: il punto di vista della scienza della politica, Milano, 1967.
• G. Miglio, Le contraddizioni dello Stato unitario in Miglio - Benvenuti, L'unificazione amministrativa e i suoi protagonisti, Publicazzion ISAP, Neri Pozza, Vicenza, 1969.
• G. Miglio, Rappresentanza e amministrazione nelle leggi del 1865 in Miglio - Benvenuti, L'unificazione amministrativa e i suoi protagonisti,Publicazzion ISAP, Neri Pozza, Vicenza, 1969.
• G. Miglio, La trasformazione delle università e l'iniziativa privata, 1969.
• G. Miglio e P. Schiera, Le categorie del politico. Saggi di teoria politica, Il Mulino, Bulugna, 1972.
• G. Miglio, La Valtellina: un modello possibile di integrazione economica e sociale, Quaderni Banca Piccolo Credito Valtellinese, n.1, Tipografia Bonazzi, Sundri, 1978
• G. Miglio, Ricominciare dalla montagna Milano, Giuffrè, Milan, 1978
• G. Miglio, Genesi e trasformazioni del termine-concetto Stato, Vita e Pensiero, Milan, 1981
• G. Miglio, Guerra, pace, diritto: una ipotesi generale sulle regolarità del ciclo politico, Giuffrè, Milan, 1982
• G. Miglio, Una repubblica migliore per gli italiani, 1983
• G. Miglio, Le contraddizioni interne del sistema parlamentare integrale, 1984
• G. Miglio, Il nerbo e le briglie del potere: scritti brevi di critica politica 1945-1988, Milan, 1988
• G. Miglio, Ricominciare dalla montagna, Giuffrè, Milan, 1978
• G. Miglio, La regolarità della politica (2 vol.), Giuffrè, Milan, 1988
• G. Miglio, Una costituzione per i prossimi trent'anni, intervista del Marcello Staglieno, Laterza, Bari, 1990
• A. Buchanan, Secessione. Quando e perché un paese ha il diritto di dividersi, introduzion del G. Miglio, Mondadori, Milan, 1991
• G. Miglio, Come cambiare. Le mie riforme, Mondadori, Milan, 1992
• U. Bossi, D. Vimercati, Vento dal Nord: La mia Lega la mia vita, prefazzion del G. Miglio, Sperling & Kupfer, Milan, 1992
• G. Oneto, Bandiere di libertà. Simboli e vessilli dei popoli dell'Italia settentrionale, introduzzion del G. Miglio, Effedieffe, Milan, 1992
• U. Bossi, D. Vimercati, La Rivoluzione. La Lega: storia e idee, prefazione di G. Miglio, Sperling & Kupfer, Milan, 1993
• G. Miglio, H.D. Thoreau, Disobbedienza civile, Mondadori, Milan 1993
• G. Miglio (con Marcello Staglieno e Pierluigi Vercesi), Italia 1996: così è andata a finire, Mondadori, Milan, 1993
• G. Miglio, Io, Bossi e la Lega, Mondadori, Milan 1994
• G. Miglio, La Costituzione federale, Mondadori, culana Le Frecce, Milan, 1995
• G. Miglio, M. Veneziani, Padania, Italia. Lo Stato nazionale è soltanto in crisi o non è mai esistito?, Le Lettere, Firenze, 1997
• G. Miglio, A. Barbera, Federalismo e secessione. Un dialogo, Mondadori, Milan 1997
• G. Miglio e Aa.Vv., Federalismi falsi e degenerati, Sperling & Kupfer, Milan, 1997
• M. Gozzi, G. Miglio, G.A. Zanoletti, Le barche a remi del Lario da trasporto, da guerra, da pesca, e da diporto, Leonardo Arte, Milan, 1999
• G. Miglio, L'asino di buridano, Neri Pozza, Vicenza, 1999

Liber che parlen del Miglio

• L. Ornaghi, A. Vitale, Multiformità e unità della politica. Ducument del Convegn per el 70° compleann del Gianfranco Miglio, 24-26 otover del 1988, Giuffrè, Milan, 1992
• G. Ferrari, Gianfranco Miglio: un giacobino nordista, Liber, Ruma, 1993
• A. Campi, Schmitt, Freund, Miglio: figure e temi del realismo politico europeo, Akropolis/La Roccia di Erec, Firenze, 1996
• Aa.Vv., Gianfranco Miglio: un uomo libero, Quaderni Padani n. 37-38 dela Libera Compagnia Padana, Nuara, 2002
• Aa.Vv., Un Miglio alla libertà, Audioliber, Leonardo Facco Editor (collana Laissez Parler), Trevij (Bg), 2005
• D. Palano, Il cristallo dell'obbligazione politica in ID., Geometrie del potere, Vita e Pensiero, Milan, 2005.
• G. Di Capua, Gianfranco Miglio, scienziato impolitico, Rubbettino, Catanzaro, 2006.
• Aa.Vv., Gianfranco Miglio: gli articoli, Quaderni Padani n. 64-65 dela Libera Compagnia Padana, Noara, 2006.
• Aa.Vv., Gianfranco Miglio: le interviste, Quaderni Padani n. 69-70 dela Libera Compagnia Padana, Noara, 2007.

Alter proget

Altri progetti

• Wikiquote
• Wikimedia Commons

• Wikiquote el gh'ha dent citazzion de o su Gianfranch Miglio
• Wikimedia Commons el gh'ha dent imagin o alter archivi su Gianfranch Miglio

Ligam de foeura

• Treccani
• Sit del Senad