Inanna
I Inanna na Ishtar dia andriamanibavy mesôpôtamiana tao amin' ny fivavahana semitika, nivavahan' ny Akadiana sy ny Babilôniana ary ny Asiriana. Ao amin' ny fedrà someriana izy no atao hoe Inanna. Nantsoin' ny Empira Akadiana sy Babilôniana ary Asiriana hoe Ishtar izy. Ny hoe "Mpanjakavavin' ny Lanitra" no anaram-boninahitra voalohany omena azy.
Heverina ho mariky ny vehivavy izy, andriamanitra mifandray amin' ny planeta Venosy, andriamanibavin' ny fitiavana sy ny ady ary ny fahavokarana. Mifandray amin' ny filan' ny nofo, ny fananahana, ny lalànan' ny andriamanitra ary ny fahefana ara-pôlitika koa izy. Matetika dia heverina ho andriamanitra manjaka ka ilaina ny fanohanana avy aminy raha hitondra fanjakana.
Nandritra ny telo arivo taona mahery teo amin' ny tantara someriana ary avy eo teo amin' ny tantara mesôpôtamiana, dia anisan' ny andriamanitra manan-danja indrindra tao amin' io faritra io izy, ary noraisina tany amin' ny firenena mpifanolo-bodirindrina maromaro, izay mety nampitoviana azy tamin' ny andriamanibavy sasany teo an-toerana. Nandray ny endriky ny andriamanibavy mesôpôtamina marokoa izy sady nivavahana tany amin' ny foibem-pivavahana lehibe maromaro, indraindray dia nanana toetra samihafa arakaraka ny toerana nisy ny fivavahana aminy. Noho izany dia mampiseho tsara ny maha saro-drafitra ny fiheverana sy ny fanao ary ny fifanakalozana ara-pivavahana tany amin' ny faritra Atsinanana Akaiky tamin' ny Andro Taloha, ary maro amin' ny lafin-javatra momba azy no mbola iadian-kevitra.