Kaaba
Ny Kaaba na Ka'ba dia zavatra naorina vita amin' ny vato tokana tamin' ny taonjato faha-7, miendrika goba, miorina eo afovoan' ny Môskea Lehibe ao Maka, any Arabia Saodita, izay norakofana lamba landy miloko mainty, atao hoe كسوة / kiswa.
Atao hoe ٱلْكَعْبَة / al-Kaʿba ("ny Goba") na ٱلْكَعْبَة ٱلْمُشَرَّفَة / al-Kaʿba l-Mušarrafa ("ny Goba hajaina") izy amin' ny teny arabo.
Ny Kaaba no toerana masina indrindra amin' ny fivavahana silamo. Maro koa ny zavatra madinika voaorina manodidina azy. Ao amin' ny zorony atsimo-atsinanana no itsofohan' ilay vato mainty.
Any amin' ny Kaaba no mitodika ny Mozilmana maneran-tany (na dia ao anatin' ny Môskea Lehibe aza izy ireo) rehefa manatanteraka ny vavaka fanao isan' andro. Manodidina ny Kaaba no anatanterahan' ny mpanao fivahiniana masina ny fihodinana impito (طواف, / tawaf), indrindra amin' ny andron' ny fivahiiana masina isan-taona (حَجّ / hajj) na ny fivahiniana masina madinika (عُمْرَة / umra).
Efa talohan' ny fivavahana silamo no nisian' ny Kaaba izay natokana ho an' ny fanompoana sampy, anisan' ny andriamanitra nivavahana indrindra tao i Al-Lāt sy i Manat ary i Uzza. Rehefa azon' i Mohamady i Meka tamin' ny taona 630 dia nesorina avy tao anatin' ny Kaaba ny sarivongan' ireo andriamanitra ireo.
Araka ny lovantsofina silamo dia nisy Kaaba roa samy hafa tao, ny iray momba ny tany, natokana ho an' ny olombelona, fa ny faharoa kosa momba ny lanitra, natokana ho an' ny anjely. Araka ny lovantsofina silamo ihany dia i Abrahama sy i Ismaela (lazain' ny lovantsofina fa razamben' ny Arabo) no nanamboatra ny Kaaba.
Amin' ny Mozilmana dia بَيْت ٱللَّٰه / Bayt Allah ("tranon' Andriamanitra") ny Kaaba, ka ao Andriamanitra no mikasika ny momba ny tany. Sasana indraimandeha isan-taona sy rakofana an' ilay lamba landy mainty ny Kaaba. Hatramin' ny andron' i Mohamady dia nohalehibeazina ny Kaaba: nanamboarana kianja malalaka ny manodidina azy sady nasiana varavarana volamena koa.