Albert Sabin

Albert Sabin, criador de la bacina oural contra poliomielite.

Albert Bruce Sabin (Białystok, 26 de Agosto de 1906 — Washington, 3 de Márcio de 1993) fui un renomado pesquisador médico judiu-amaricano, sendo melhor coincido por tener zambolbido la bacina oural (famosa "gotenie") pa la poliomielite.

Biografie

Sabin naciu an 1906 na cidade de Białystok, anton parte de la Rússia (atualmente na Polónia), i eimigrou an 1921 para ls Stados Ounidos de la América cun sue família. Sabin studou medecina na Ounibersidade de Nuoba Iorque i zambolbiu un antenso antresse an pesquisa, specialmente na ária de malinas anfeciosas. An 1931, cumpletou l doutorado an medecina. Passou ua temporada trabalhando an Lhondres an 1934, cumo repersentante de l Cunseilho Amaricano de Pesquisas. De buolta als Stados Ounidos, tornou-se pesquisador de l Anstituto Rockfeller de Pesquisas Médicas. Nesse anstituto, demunstrou l crecimiento de l bírus de la poliomielite an tecidos houmanos.

Sabin stubo bárias bezes ne l Brasil, acumpanhando pessonalmente l cumbate a la poliomielite, tenendo-se casado an 1972 cula brasileira Heiloísa Sabin. Cientos de scuolas, spitales, clínicas i anstituiçones brasileiras lhieban l sou nome. L cientista recebiu de l gobierno brasileiro, an 1967, la Gran-Cruç de l Mérito Nacional.

Carreira

An 1946 Sabin tornou-se l lhíder de Pesquisa Pediátrica na Ounibersidade de Cincinnati.

Publicou mais de 350 studos, que ancluen trabalhos subre purmonie, ancefalite, cáncaro i dengue; fui l purmeiro a eisolar l bírus de la dengue: l tipo I na ária de l mediterráneo, durante la Segunda Guerra Mundial, i l tipo II na region de l Pacífico.

Cula amanaça de la pólio a crecer, passado la Segunda Guerra Mundial, el i outros pesquisadores, notadamente Jonas Salk an Pittsburgh, ampeçórun la busca por ua bacina para prebenir la malina. La bacina de Salk, zambolbida cun bírus "einatibado ó muorto", fui testada i lhiberada para l uso an 1955. Eilha era eificaç na prebençon de la maiorie de las cumplicaçones de la pólio, mas nun prebenie la anfeçon einicial de acuntecer.

La einobaçon de Sabin acunteciu cerca de cinco anhos apuis, quando l Serbício Público de Salude de ls Stados Ounidos apoiou sue bacina cun bírus "bibo" pa la pólio an 1961. L sou perduto, purparado cul bírus atenuado de la pólio, poderie ser tomada ouralmente, i prebenie la cuntraçon de la moléstia. Esta ye la bacina que eiliminou afetibamente la pólio an quaije todo l mundo (fuora an alguns países na África i Ásia)

Sabin renunciou als dreitos de patente de la bacina que criou, facelitando la difuson deilha i premitindo que ninos de todo l mundo fússen eimunizadas.

Albert Sabin morriu de ataque cardíaco, als 86 anhos, an sue casa an Washington, an 1993. Ne l mesmo anho, fui fundado naqueilha cidade, l Anstituto Sabin de Bacinas, a fin de cuntinar las pesquisas subre bacinas i perpetuar l lhegado custruído por el.