Guerra Cebil Amaricana

La Guerra Cebil Amaricana (tamien coincida cumo Guerra de Secesson) ocorreu ne ls Stados Ounidos de la América antre 1861 i 1865. Nanhue guerra causou mais muortes de amaricanos que la Guerra Cebil Amaricana, que causou un total de muortes stimado an 970 mil pessonas - de l quales 618 mil éran suldados - cerca de 3% de la populaçon amaricana a la época. Las causas de la guerra cebil, sou çfecho, i mesmo ls própios nomes de la guerra, son motibos de cuntrobérsia i debate até ls dies de hoije.

La Guerra Cebil Amaricana cunsistiu na lhuita antre 11 Stados de l Sul lhatifundiário, aristocrata i defensores de la scrabatura contra ls Stados de l Norte andustrializado, adonde la scrabatura tenie un peso bien menor que ne l Sul. Estas defrenças stan antre las percipales causas de la guerra i ténen ourige inda ne l período quelonial, anquanto l zambolbimiento de l Norte staba lhigado a la necidade de crecimiento de l mercado anterno i de l stablecimiento de barreiras protecionistas; l crecimiento Sulista era baseado percisamente ne l cuntrairo, ó seia: l lhiberalismo eiquenómico que abrie todo l Mundo a las agro-sportaçones i la mano de obra scraba (de ourige africana).

Al lhongo de las purmeiras décadas de l seclo XIX, la eimigraçon an massa i antensa andustrializaçon fazirun cun que l poderio de l Norte crecisse eiconomicamente i politicamente ne l gobierno. Grandes tensones políticas i sociales zambolbírun-se antre l Norte i l Sul. An 1860, Abraham Lincoln, un republicano contra la scrabatura, benceu las eileiçones persidenciales amaricanas. Lincoln, al assumir l puosto de persidente, cognominou ls Stados Ounidos de "Casa Debedida".

An 1861, anho de l ampeço de la guerra, l paíç cunsistie an 19 Stados lhibres, adonde la scrabatura era proibida, i 15 Stados adonde la scrabatura era permitida. An 4 de Márcio, antes que Lincoln assumisse l puosto de persidente, 11 Stados scrabagistas declarórun secesson de la Ounion, i criórun un nuobo paíç, ls Stados Cunfederados de la América. La guerra ampeçou quando fuorças cunfederadas atacórun l Fort Sumter, un puosto melitar amaricano na Carolina de l Sul, an 12 de Abril de 1861, i terminarie solamente an 28 de Júnio de 1865, cula rendiçon de las redadeiras tropas remanescentes de la Cunfederaçon.

Ls Stados Ounidos de la América an 1860: Un paíç debedido

Raízes stóricas

La ourige de la debison de l Stados Ounidos de la América an "Norte" i "Sul" data de l tiempos queloniales, quando la ária que atualmente custitui ls Stados Ounidos inda éran quelónia de trés países - Spanha, Fráncia i Reino Ounido. Primariamente, tales defrenças ampeçórun debido la defrenças geográficas na region de las Treze Quelónias anglesas. Ne l sul, ls purmeiros acupantes de la region ancontrórun un clima caliente i un tierra fértil, eideal para l cultibo de tabaco. Grandes plantaçones de tabaco fúrun cultibadas, i mano-de-obra scraba fui trazida an grande quantidade de l cuntinente africano. Posteriomente, algodon i canha-de-açucre passórun a ser cultibados tamien nestes Stados. Debrebe, la agricultura sob l sistema de Plantation i un stilo de bida primariamente rural passou a dominar ls Stados de l Sul.

Anquanto esto, l clima friu i l tierra rochoso de l Stados de l Norte amostrórun-se pouco adequados a la prática de la agricultura. Esto forçou ls quelonos desta region la percuráren outras fuontes de renda cumo l comércio i la manufatura, faborecendo assi la criaçon de grandes cidades comerciales cumo Boston, Filadélfia i Nuoba Iorque - i, anque, ne l anho de l ampeço de la Reboluçon Amaricana de 1776, la maiorie de la populaçon de l Norte inda bibisse an árias rurales, la eiquenomie destes Stados yá era baseada primariamente ne l quemércio i na manufatura.

Após la andependéncia de l Stados Ounidos, i até la década de 1850, las defrenças antre l Norte (cada beç mais andustrializado) i l Sul agropecuário oumentában gradatibamente. Na década de 1850, ls Stados Ounidos yá habien se spandido até sous atuales lhimites territoriales na América de l Norte (posteriomente, adquiririeb l Alasca de la Rússia, Habaí i outros territórios ultramarítimos). Anton, ls Stados Ounidos yá stában nua fase de rápida andustrializaçon. Mas, l rápido crecimiento eiquenómico de l paíç stubo cuncentrado primariamente ne ls Stados de l Norte. Este crecimiento causou l rápido crecimiento populacional de las cidades de la region, gerando grandes abanços na ária de transportes i quemunicaçones. Apesar de l Sul tamien tener passado por este porcesso, l tal progresso acunteciu muito mais lhentamente que ne l Norte.

Defrenças culturales

La fé de que la populaçon de l Norte era mais recetiba a la tecnologie i modernizaçon que la populaçon de l Sul ye eiquíboco. La percura de nuobas tecnologies de produçon éran caratelísticas tanto de la manufatura nortista, quanto de la agropecuária sulista; fui ne l Sul que surgiran las purmeiras ounibersidades agrícolas de l mundo, cul oubjetibo percipal de percurar inobaçones que melhorassen la eficiéncia de l campo, esto possibilitou que ne l seclo XIX ls produtores de algodon cunseguissen maiores bordas de lhucros apesar de la decandéncia de l précio deste produto ne l mercado mundial. Podemos si cunsiderar cumo ua defrença marcante antre Norte i Sul la çtribuiçon de la renda, pus ne l Norte eilha era mais eiquitatiba, melhor çtribuída; anquanto que ne l Sul habie ua cuncentraçao de renda nas manos de l lhatifundiários i ua grande parcela de la populaçon çprobida de renda formal- ls scrabos.

Las eilites anteletuales de las dues regiones éran mui defrentes antre si; mas ambas éran defensoras de l lhiberalismo, mas cun significados defrentes. Ne l Norte l lhiberalismo era bisto cumo la defesa de l "tierra lhibre", de l "trabalho lhibre", de l "home lhibre". Yá ne l Sul, l lhiberalismo significaba la defesa de la proiadade pribada (scrabo era tido cumo proiadade pribada) i de l lhibre quemércio an oposiçon al protecionismo nortista.

Ls zamtendimientos antre sulistas i nortistas remontan a la Reboluçon Amaricana de 1776-1783, pus l Sul, ne l ampeço de la democracie amaricana, era menos faborecido eiconomicamente, basicamente era ua populaçon mais pobre, mais miscigenada i rústica, portanto, mais sensible quanto als preceitos de l "tener" i de l "ser". La cultura nortista era menos tradicionalista, menos aristocrática, mui trabalhadeira i ambiciosa. Esta cultura fui l percipal fator de l zambolbimiento eiquenómico spetacular de l Norte zde la andependéncia de l Stados Ounidos até a la década de 1850.

La scrabatura ne l período pré-Guerra

An tiempos queloniales, ls amaricanos bian la scrabatura cumo un mal neçairo. Quando ls Stados Ounidos tornórun-se andependientes, ls poucos abolicionistas de la época pressionórun l gobierno de l paíç a abolir la scrabatura na Custituiçon de l paíç, mas nun tubírun sucesso.

Ne l ampeço de l seclo XIX, bários nortistas ampeçórun a ber la scrabidon cumo errada, çnecessária i eimoral para l paíç, i muitos deilhes ampeçórun a adbocar eideias abolicionistas. Ua minorie de l sulistas, por sue beç, tamien teniam eideias abolicionistas. Mas, la maiorie de la populaçon lhibre de l Sul suportaba la aboliçon de la scrabatura. Cerca de metade de la populaçon de l Stados de l Sul era cumpuosta por negros i sous çcendentes, mano de obra fuorte, saudable i oubediente. La maiorie de l sulistas lhucraba mui cula scrabatura i esta fazie parte de la cultura lhocal. Cerca dun terço de la populaçon branca de l Sul era un nembro dua família dona de scrabos. Cerca de metade destas famílias tenien antre un la cinco scrabos, i 1% tenien mais de 100. Mesmo muitos sulistas que nun tenían scrabos éran a fabor de la scrabatura; l que carateriza l cunceito de Sociadade Scrabista criado pul porsor Douglas Colle Libby de la Ounibersidade Federal de Minas Gerais, que quier dezir: aqueilha sociadade an que ocorre la scrabatura i que esta ye de tal forma ampregnada na sociadade que determina cumo las bárias pessonas se relacionan al trabalho.

An 1850, un cunjunto de atos, ls Cumpromissos de 1850, fúrun aprobados pul Cungresso amaricano, nua tentatiba de solucionar ls atritos antre l Norte i l Sul. Ls Cumpromissos permitirian la cuntinaçon de la scrabatura, mas proibirian-na ne l Çtrito de Columbia. L Cumpromisso tamien admitirien la Califórnia a la Ounion cumo un stado lhibre (adonde la escrabatura serie proibida), mas permitirieb la scrabatura an territórios recentemente adquiridos ó criados, bien cumo l dreito de decison antre la permisson ó la proibiçon de la scrabatura.

An 1854, l Ato de Kansas-Nebraska fui aprobado pul Cungresso, outra beç, nua tentatiba de l gobierno amaricano de tentar solucionar ls atritos antre l Norte i l Sul. L Ato criou ls territórios de Kansas i de Nebraska, i permitie la scrabatura nestes dous territórios. L Ato tamien specificaba que, causo un território fusse eilebado a la catadorie de Stado, la sue populaçon tenerie l dreito de botar a fabor ó contra la cuntinaçon de la scrabatura. Mas, muitos nortistas opusírun-se la este Ato, alegando que, ua beç que la scrabatura stubisse bien fincada nun território, starie eilhi para quedar. An 1856, la maiorie de la populaçon de Kansas botou contra la scrabatura, mas grupos pró-scrabatura recusórun-se a aceitar la decison, i, lhougo, reboltas populares surgiran ne l Stado. Inda ne l mesmo anho, un senador abolicionista fui arreado por un repersentante de l Sul até quedar ancunciente. An 1861, l Kansas juntou-se a la Ounion cumo un Stado lhibre.

La Decison de Dred Scott fui un causo judicial julgado pula Supremo Tribunal de l Stados Ounidos de la América. Ne l causo, Dred Scott, un scrabo, reibindicaba la lhiberdade, alegando que yá habie morado nun território lhibre. Mas, la Supremo Tribunal decidiu que el, cumo escrabo, era propiadade. Para alhá desso, l Supremo Tribunal alegou que negros nun podien ser cunsidrados cidadanos amaricanos. Esta decison gerou grande cuntrobérsia i rábia ne l Norte.

An 1858, l senador William Seward, que posteriomente tornarie-se l Secretairo de Stado de Abraham Lincoln, caraterizou las defrenças antre l Norte i l Sul cumo un "cunflito eirreparable". L motibo deste cunflito, segundo Seward, era la scrabatura. An 1859, un abolicionista stremista, chamado John Brown, i seguidores, tentórun ampeçar ua rebelion de scrabos nun bilareijo de la Bergínia Oucidental. Brown, mas, fui caturado un die depuis. Fui julgado i cundanado a la muorte por anforcamiento, culpado de traiçon. Bários sulistas biran esta rebuolta cumo ua açon de l Norte para tentar acabar cula scrabatura atrabeç de la fuorça.

La scrabatura i la política

L Ato de Kansas i Nebraska gerou rábia i çcórdia antre la populaçon de l Norte, specialmente antre republicanos, que éran contra la scrabatura, bien cumo sue spanson la outros territórios de l Stados Ounidos. Antre ls percipales nembros de l partido staba Abraham Lincoln.

An 1858, l Partido Democrata quedou debedido na criaçon dua Custituiçon de que habitantes pró-scrabidon de l território de Kansas sperában aporfilhar quando l Kansas se tornasse un Stado. Mas, ls lhíderes de l partido tomórun posiçones opostas na Custituiçon. Alguns éran a fabor de la scrabatura, outros contra. Esta cuntrobérsia fizo cun que l partido fusse debedido an dous galhos an 1860, un nortista, pró-abolicionismo, i outro sulista, pró-scrabatura.

Ls republicanos scolhírun Lincoln cumo sou candidato nas eileiçones persidenciales de 1860. Abraham Lincoln, an sue campanha eileitoral, afirmou que ls Stados Ounidos nun podien bibir eternamente, "metade lhibre, metade scraba", zamcadeando sentimientos habie mui reprimidos puls sulistas i nortistas. L partido democrata, debedido an dous, tenie dous candidatos, un a fabor de la scrabatura i outro contra. Lincoln acabou bencendo las eileiçones an todos ls Stados lhibres fuora na Nuoba Jérsei. Mas, solo 39% de la populaçon de l paíç habie botado an Lincoln, tenendo bencido por tener ua pluraridade de botos de l coleijo eileitoral amaricano. Quaije nanhun de l botos de l coleijo eileitoral era procedente de l Sul. Lincoln nun fui nin colocado na botaçon cumo candidato an nuobe Stados de la region. Ls sulistas tenien miedo que Lincoln ampusisse mais restriçones a la prática de la scrabatura, ó mesmo de la sue aboliçon.

Por fin, durante l final de la década de 1850, la maiorie de l Senado amaricano passou a ser formada por nortistas. L balanço político antre l Norte i l Sul, antes anquelibrado solamente por causa de l númaro eigual de Stados scrabistas i abolicionistas, fura quebrado al lhongo de la década de 1850, após la sucessiba eilebaçon de trés territórios a la catadorie de Stado abolicionista. Ua beç que ls sulistas yá éran minorie na Cámara de l Repersentantes, por causa de la maior populaçon de l Norte, ls sulistas anfrentában l risco de tornáren-se nua minorie perpétua an ambas las cámaras de l Cungresso, i assi, nun mais podendo defender tarifas protecionistas, que probocarian stragos na eiquenomie de l Sul, dependente de material andustrializado procedente de l Reino Ounido, nin mais l uso de la scrabatura.

Secesson i formaçon de l Stados Cunfederados de la América

Pouco antes de las eileiçones persidenciales, lhíderes sulistas ampeçórun a pedir pula secesson de l Sul de la Ounion, causo Lincoln bencisse las eileiçones. Muitos sulistas aprobában la secesson, atrabeç de la eideia de que ls Stados possuen dreitos i poderes que l gobierno federal nun poderie proibir atrabeç de métodos lhegales. Ls sulistas alegórun que ls Stados Ounidos por si mesmo éran ua lhiga de Stados andependientes, i que qualquier destes Stados tenía l dreito de tornar-se andependiente.

An Dezembre de 1860, la Carolina de l Sul tornou-se l purmeiro stado a salir de la Ounion. Lhougo eilha fui acumpanhada por outros cinco Stados - Alabama, Flórida, Geórgia, Louisiana i Mississippi. Ls percipales lhíderes políticos i senhores de scrabos, an sucessibas reuniones inda an dezembre de 1860, aprobórun la Custituiçon cunfederada, formalizando la criaçon de l Stados Cunfederados de la América. Tales Stados eilegírun Jefferson Davis, de l Mississippi, cumo persidente de l paíç, stablecendo an 7 de Febreiro de 1860 ua Custituiçon, i la capital an Montgomery.

An sou purmeiro çcurso após tener sido inaugurado cumo persidente de l Stados Ounidos de la América, Lincoln afirmou que la Cunfederaçon era un mobimiento sin fundamientos lhegales, i que "la Ounion quedarie ounida para siempre, i que la Ounion fazerie uso de todos ls meios possibles para garantir la possesson de propiadades de la Ounion lhocalizados ne ls Stados de l Sul". Houbiste ua tentatiba de reconciliaçon, que ls rebeldes nun aceitórun. Ls cunfederados oufrecírun ua andemnizaçon a la Ounion pulas proiadades de la redadeira an território cunfederado, ouferta que fui recusada por Lincoln.

An 12 de Abril, ls sulistas atacórun Fort Sumter, na baía de Charleston, Carolina de l Sul. Trés dies depuis, l fuorte rendiu-se. Lincoln ampeçou a juntar tropas para recuperar l fuorte, i este mobimiento nortista fui bisto cumo ua declaraçon de guerra pula Cunfederaçon. Más cinco Stados juntar-se-iban als Stados Cunfederados de la América - Arkansas, Carolina de l Norte, Tennessee, Bergínia i Texas. Richmond, la capital de la Bergínia, fui scolhida cumo la capital de l Stados Cunfederados de la América.

Fuorças armadas

Quando la Guerra Cebil Amaricana ampeçou, cul ataque sulista al Fort Sumter, nin la Ounion nin la Cunfederaçon possuían un plano de recrutamiento de suldados. L eisército de la Ounion, ne l ampeço de la guerra, era cumpuosto de solo aprossimadamente 11 mil suldados. L eisército de la Cunfederaçon era inda menor, por buolta de seis mil suldados. An Abril de 1861, l Cungresso amaricano aprobou ua cumbocaçon einicial de 65 mil homes - todos boluntários - para fazer frente al ataque sulista. Ne l ampeço de la guerra, ambas la Ounion i la Cunfederaçon outelizában solo beluntários cumo suldados - partecipaba de la guerra quien quejisse. Esto funcionou bien ne l ampeço de la guerra.

Mas, a la medida que la guerra fui stendendo-se, i l númaro de baixas an ambos ls lhados ampeçou a oumentar, mais recrutas passórun a ser neçairos. La duraçon de la guerra i ls númaros de baixas, mas, deminuíran muito l antusiasmo pula populaçon de ambos ls lhados pula guerra, i assi sendo, l númaro de boluntários acabou por caer. L alistamiento fuorçado acabou por ser anstituído an ambos ls lhados al lhongo de la guerra. Na Cunfederaçon, l alistamiento fuorçado fui anstituído an Abril de 1862, fuorçando todas las pessonas brancas de l sexo masculino antre 18 a 35 anhos de eidade i an buonas cundiçones de salude la serbiren ne l eisército por trés anhos. An Febreiro de 1864, tales lhimites habien sido stendidos para 17 a 50 anhos. Yá la Ounion anstituiu l alistamiento fuorçado an Márcio de 1863, para pessonas, sin çtinçon de raça, de l sexo masculino, antre 20 a 45 anhos de eidade. Mulhiers, an momiento algun, fúrun outorizadas a lhutar an ambos ls lhados, ambora alguas tubíssen se çfarçado cumo homes, i lhuitado por sues federaçones.

La guerra fui nomeada por bários suldados cumo "guerra antre homes ricos, lhuitas antre homes pobres". Esto porque este recrutamiento fuorçado possuía sues eicepçones. An ambos ls lhados, homes que, pulas regras de l recrutamiento fuorçado, tenerien de serbir ne l eisército, poderien cuntratar un sustituto - giralmente, un home pobre i sin trabalho - para lhutar an sou lhugar. Na Ounion, pessonas podien pagar al gobierno 300 dólares (ua grande soma de denheiro na época) para nun ser fuorçado a alistar-se. Estas scepçones fazirun cun que l sistema de recrutamiento fuorçado fusse mal bisto por suldados de ourige houmilde, tanto na Ounion quanto na Cunfederaçon. Na cidade de Nuoba Iorque, an Júlio de 1863, alguns meses após l alistamiento melitar fuorçado tener sido anstituído, ua grande rebolta popular tomou curso. Ls reboltados stában armados, i eisigian l fin de l alistamiento fuorçado. Esta rebolta fui suprimida cul uso de fuorça policial i melitar. Apesar de l porblemas, l recrutamiento fuorçado an ambos ls lhados fúrun bien-sucedidos an sou percipal oubjetibo, l de oumentar l númaro de suldados nas fuorças armadas.

Outra medida tamien cuntribuiu ne ls sfuorços de guerra - ambos ls lhados permitian que qualquier home formasse un pequeinho regimiento ó ua fuorça mercante la serbício de sue federaçon, sendo que tales grupos recebien ua soma de l gobierno. L Norte tamien anstituiu un tipo special de pagamiento, bounty payments. Quando ua pessona entrasse a la fuorça melitar de la Ounion boluntariamente, el era recumpensado cun ua soma an denheiro. Esta medida, mas, tamien causou un porblema: bárias pessonas alistában-se boluntariamente, usando nomes falsos, recebien la soma an denheiro, i após esto, desertában. Muitos deilhes anclusibe alistában-se i desertában seguidamente, usando bários nomes falsos.

Após l fin de la guerra, dues Ourganizaçones fraternales fúrun abiertas - ua abierta la ex- suldados de la Ounion i sues famílias, i la outra para ex-suldados de la Cunfederaçon i sues famílias. An 1905, l gobierno amaricano anstituiu ua medalha de campanha bálida a todos ls suldados que lhutórun na guerra - seia al lhado de la Ounion ó de la Cunfederaçon. L redadeiro beterano bibo de la guerra, Albert Woolson, de la Ounion, morriu an 2 de Agosto de 1956, als 109 anhos de eidade.

Númaros

Nun se sabe l númaro sato de suldados que lhutórun na Guerra Cebil Amaricana - fatores cumo enlistamiento por un cúrtio período de tiempo, pessonas que se alistórun mais dua beç na Guerra (por eisemplo, quando éran remobidos de l serbício melitar por causa de ferimientos, buoltando após recuperaçon), pessonas que lhutórun na guerra sin registo de suldado, i zertores. Stima-se que l númaro de suldados que lhutórun pula Ounion seia de dous milhones - metade de la populaçon masculina drento de la faixa etária melitar - i an aprossimadamente un milhon l númaro de suldados que lhutórun pula Cunfederaçon - quatro quintos de la populaçon masculina branca drento de la faixa etária melitar.

L númaro de suldados ne l eisército de la Ounion creciu zde l ampeço de la Guerra Cebil Amaricana. Ne l final de la guerra, l eisército de la Ounion tenie cerca de 1,12 milhon de suldados. L eisército de la Cunfederaçon atingiu sou mássimo an 1863, quando l númaro de suldados nas fuorças melitares chegou la quaije 500 mil. A partir de 1863, l númaro de suldados ne l eisército de la Cunfederaçon passou a deminuir gradatibamente. Ne l final de la guerra, l eisército de la Cunfederaçon tenie menos de 200 mil suldados. Altas taxas de deserçon fúrun la percipal causa desta deminuiçon - specialmente ne ls meses finales de la guerra, quando la Cunfederaçon nun tenie mais nanhue heipótese de bitória.

L salário dun suldado branco de la Ounion era de 13 dólares mensales, mais un ancentibo anual de 42 dólares, para la cumpra de roupas. L salário mensal de suldados de la cunfederaçon, até 1864, era de 11 dólares mensales. An Júlio de 1864, debido a la anflaçon, l salário fui oumentado para 18 dólares mensales.

Percipales lhíderes

Ls persidentes de la Ounion i de la Cunfederaçon, Abraham Lincoln i Jefferson Davis, cumo Comandantes-an-Xefe de sues respetibas naciones, tenien la responsabilidade de scolher las pessonas que eirien acupar ls maiores postos melitares de sues federaçones.

Ls percipales lhíderes de la Ounion fúrun Abraham Lincoln, William H. Seward, Edwin M. Stanton, Ulysses S. Grant, William Tecumseh Sherman, George H. Thomas, George B. McClellan, Henry W. Halleck, Joseph Hooker, Ambrose Burnside, Irvin McDowell, Philip Sheridan, George Crook, George Armstrong Custer, Christopher Carson, John E. Wool, George Gordon Meade, Winfield Hancock, Elihu Washburne, Winfield Scott, Abner Read i Robert Gould Shaw.

Ls percipales lhíderes de la Cunfederaçon fúrun Jefferson Davis, Robert E. Lee, Joseph E. Johnston, Thomas J. Jackson, James Longstreet, Pierre Gustave Toutant de Beauregard, John Mosby, Braxton Bragg, John Bell Hood, James Ewell Brown Stuart, William Mahone, Judah P. Benjamin, Jubal Early, Nathan Bedford Forrest i Ambrose Powell Hill.

Cinco ouficiales de la Ounion que lhutórun na guerra tornar-se-iban feturamente Persidente de l Stados Ounidos de la América: Grant, Rutherford B. Hayes, James Garfield, Benjamin Harrison i William McKinley.

Pul lhado de la Ounion cumbatiu, lhiderando la Brigada Excelsior na Campanha de Gettysburgh, l general lhuso-amaricano Francis Barretto Spinola.

Partecipaçon de l negros na guerra

La Proclamaçon de Eimancipaçon de Lincoln aprobou l uso de negros ne l eisército de la Ounion - tanto que todos ls homes de l Norte, que tenien antre 20 a 45 anhos de eidade, ancluindo negros, fúrun oubrigados a lhutar pula Ounion. Cerca de 180 mil negros lhutórun pula Ounion, i cerca de dous terços deilhes éran ex-scrabos sulistas que fugiran para l Norte, an busca de lhiberdade. Más 25 mil negros atuórun na marina nabal de la Ounion, abierta als negros anhos antes de la Guerra de la Secesson. Lincoln cierta beç dixe que la "participaçon de l negros na guerra fui mui amportante, se nun andispensable".

Cerca de 170 regimientos de negros fúrun formados, de l quales la maiorie éran lhiderados por brancos. Ls Cunfederados, por sue beç, nun premetírun l uso de negros até sumanas antes de l final de l cunflito, quando l eisército cunfederado percisaba desesperadamente de mais suldados.

Al lhongo de la Guerra Cebil Amaricana, regimientos de negros participórun de mais de 39 batailhas, adonde cerca de 35 mil negros perdírun la bida. 23 negros tubírun la honra de séren cundecorados cula Medalha de Honra. Ampeçalmente, ls negros éran mal-bistos pula populaçon cumo suldados, i ls negros recebien solo metade de l salário dun branco. Apuis de 1864, mas, tanto brancos quanto negros passórun a ser pagos cula mesma quantie de denheiro. Apesar çto, outros tipos de çcriminaçon cuntinórun. La maiorie de l negros trabalhában an tarefas nó-melitares, cumo lhimpeza, cozina i manutençon de armas. Mesmo assi, bários regimientos de negros participórun de batailhas purmárias, suprendendo la populaçon branca de l Norte, que acraditaba que ls negros nun serien buns suldados.

Eironicamente, quando Richmond, la capital cunfederada, fui acaçada, fui un regimiento de negros que tubo la çtinçon de ser l purmeiro a antrar na capital cunfederada acaçada. Lincoln, posteriomente, ne l mesmo die, besitou la cidade, protegido por cabalharie formada por negros.

Las federaçones

Ambos ls lhados - la Ounion, cumpuosta primariamente por Stados i territórios contra la scrabidon, i la Cunfederaçon, que primariamente era contra la aboliçon de la escrabidon - possuían "Stados de frunteira" (border states), Stados que lhocalizában-se na frunteira antre la Ounion i la Cunfederaçon. Arkansas, Carolina de l Norte, Tennessee i Bergínia éran ls Stados de frunteira de la Cunfederaçon, fazendo frunteira cun Stados de la Ounion. Delaware, Kentucky, Maryland i Missouri éran ls Stados de frunteira de la Ounion, fazendo frunteira cula Cunfederaçon. Parte de la populaçon destes Stados acraditaba na causa de l nortistas, i outra parte na causa de l sulistas. Esto fizo cun que mobimientos separatistas surgissen an bários destes Stados, lhebando a la dibison antre dibersas famílias. Muitas pessonas destas famílias lhutórun pula Ounion, anquanto parientes lhutórun pula Cunfederaçon. Dibersos causos de familiares lhutando antre si an batailha fúrun registados al lhongo de la guerra.

La Ounion

La Ounion ye ls Stados Ounidos de la América propiamente dezido. Ls Stados que cumpunhan la Ounion éran Califórnia, Cunneticut, Delaware, Illinois, Indiana, Iowa, Kentucky, Maine, Maryland, Massachusetts, Michigan, Minnesota, Missouri, Nuoba Hampshire, Nuoba Jérsei, Nuoba Iorque, Ohio, Oregon, Pensilbánia, Rhode Island, Vermont i Wisconsin, mais ls territórios de Colorado, Dakota Nebraska, Nebada, Nuobo México, Utah i Washington. Cerca de 22 milhones de pessonas bibian na Ounion ne l ampeço de la guerra, cun mais de quatro milhones deilhas sendo homes antre 15 a 40 anhos de eidade - la faixa etária adequada para serbício melitar.

L Kansas fui eilebado a la catadorie de Stado de la Ounion lhougo ne l ampeço de la guerra. Na region oeste i noroeste de l Stado cunfederado de Bergínia, a maior parte de la populaçon era maioritamente lheal a la Ounion. An 1863, esta region de la Bergínia separou-se de la redadeira, assi criando l Stado de Bergínia Oucidental, que lhougo aderiu a la Ounion. L Nebada fui adicionado a la lhista de Stados de la Ounion an 1864.

La Ounion anfrentou l separatismo an dibersos Stados de frunteira. Grupos separatistas fúrun criados an Kentucky i an Missouri. Estes grupos ambiórun repersentantes a la Cunfederaçon, mas ls Stados cuntinórun ouficialmente na Ounion. La maiorie de la populaçon de Maryland i de la capital amaricana, Washington, DC, tamien apoiaba la causa de l sulistas. Mas, l fato de que l gobierno de la Ounion staba lhocalizado an Washington, DC - por dreito, l gobierno de l Stados Ounidos cuntrola diretamente la cidade - ampediu la salida de Washington de la Ounion. Yá medidas tomadas pul gobierno de la Ounion ampediran la secesson de Maryland als Stados Cunfederados. Esto fui tomado primariamente cumo ua medida de proteçon - la capital amaricana Washington, DC stá lhocalizada antre Bergínia i Maryland.

Lincoln, cumo comandante-xefe de las fuorças de la Ounion, fui l purmeiro persidente de l Stados Ounidos a assumir bastos poderes nun stablecidos na Custituiçon amaricana. Lincoln suspendiu l dreito al habeas corpus - l dreito de la pessona presa a ser oubida an Tribunal. Lincoln recebiu duras críticas por causa desta açon. L Partido Republicano i l gobierno de Lincoln recebírun duras críticas de l Partido Democrático de la Ounion, que querie l fin eimediato de la guerra. Mesmo alguns nembros de l própio Partido Republicano, que formában la ala stremista de l Partido, criticórun Lincoln, pedindo por sfuorços de guerra mais agressibos, la eimediata aboliçon de la scrabatura i mudanças eimediatas na strutura socio-eiconómica de l Stados de l Sul de l Stados Ounidos.

L financiamiento de l sfuorços de guerra fui defícel. Al lhongo de la guerra, la Ounion gastou cerca de 2,16 bilhones de dólares. Cerca de 20% deste total fúrun arrecadados atrabeç de la arrecadaçon de ampostos yá eisistentes. Papéis gobernamentales - cumprados a un précio fixo por ua pessona, que serie posteriomente, após la guerra, rembolsada juntamente culs juros - arrecadórun 40%. 30% fúrun tomados amprestados de anstituiçones financeiras. Ls 10% restantes fúrun ampressos na forma de papel moeda, ampresso an causos de emergéncia, l que causou grande anflaçon, na orde de l 40% l anho, na Ounion. L crecimiento anual de l salários de l trabalhadores nun acumpanhaba l mesmo passo de l crecimiento de la anflaçon, resultando an grebes i reboltas por melhores salários i cundiçones de trabalho. Ironicamente, muitas destas reboltas fúrun ampeçadas por sindicatos dominados por brancos, que se opusírun al uso de negros nun afiliados la sindicatos por parte de las fábricas.

Apesar destes porblemas, la Guerra Cebil Amaricana trouxe prosperidade eiconómica para la Ounion. Las necidades de guerra - armas, roupas, quemidos - stimulórun bastante la agricultura i la andústria de manufaturaçon. La andústria de mineraçon creciu drasticamente - la produçon de carbon i fierro, specialmente - bien cumo la produçon de aço. L crecimiento de la produçon agropecuária de la Ounion - primariamente lana, algodon, milho, trigo i chicha - fizo cun que sportaçones para países ouropeus dobrassen - a la época, quemidos na Ouropa stában an falta, debido la sucessibas plantaçones mal-sucedidas - assi cumpensando pula drástica chimpa nas sportaçones destes perdutos por parte de la Cunfederaçon, que staba sob bloqueio an tierra i mar durante la guerra.

Alguns atos eiconómicos anstituídos pul gobierno de la Ounion ajudórun neste período de crecimiento eiconómico. Tales atos stablecírun un banco central, ua moeda padron i l Departamiento Gobernamental de Agricultura, an 1861. Atos anstituídos an 1862 fúrun ls responsables pula aprobaçon de la custruçon de la purmeira camino de fierro transcontinental amaricana, pul fornecimiento de lhotes de tierras ne l oeste amaricano la précios nulos ó mui baixos, i l stablecimiento de anstituiçones de ansino superior. An 1863, l purmeiro amposto de renda nacional fui anstituído. La fuorte eiquenomie de la Ounion nun solamente fui un de l motibos purmários de la bitória desta subre la Cunfederaçon, mas cumo tamien l percipal motibo de l grande crecimiento eiquenómico de l Stados Ounidos apuis de la fin de la guerra, que fizo de l paíç la maior poténcia andustrial por buolta de la década de 1890.

Cunfederaçon

Ls Stados que cumpunhan la Cunfederaçon éran l Alabama, Arkansas, Carolina de l Norte, Carolina de l Sul, Flórida, Geórgia, Louisiana, Mississippi, Tennessee, Texas i Bergínia. Quando la Guerra Cebil Amaricana ampeçou, l Cunfederaçon tenie cerca de 9,5 milhones de habitantes - ancluindo 3,5 milhones de negros. Cerca dun milhon de pessonas brancas de l sexo masculino, antre 15 a 40 anhos de eidade bibian na Cunfederaçon.

L persidente de la Ounion, Abraham Lincoln, tenie bários poderes nun stablecidos na Custituiçon. Esto nun acunteciu na Cunfederaçon. Esto porque muitos sulistas siempre se opusírun a un gobierno central, adonde ua sola pessona ten einormes poderes. Por causa çto, l Cungresso de la Cunfederaçon tornou-se debedido, cun alguns nembros apoiando l poder cuncentrado nas manos dua sola pessona, i culutros nembros se opondo la esso. Las relaçones de alguns Stados de la Cunfederaçon cul gobierno de la redadeira, bien cumo antre alguns destes Stados, tornórun-se defíceles. Jefferson Davis, l persidente de la Cunfederaçon, pediu al Cungresso de la Cunfederaçon permisson al eisercimiento de l poderes eisercidos por Lincoln, mas sou pedido fui atendido solo an parte, i Davis recebiu solo alguns poderes lhemitados.

Zde l ampeço de la Guerra Cebil Amaricana, l financiamiento de la guerra mostrou-se stremamente defícel para la Cunfederaçon. Al lhongo de la guerra, la Cunfederaçon gastou cerca de 2,5 bilhones de dólares. Cerca de 1% deste total fúrun arrecadados atrabeç de la eilebaçon de ampostos yá eisistentes. Esta percentaige ye mui pequeinha porque ls cunfederados temian que ua drástica eilebaçon ne ls ampostos podisse causar reboltas de la eilite de l paíç. 39% fúrun tomados amprestados de anstituiçones financeiras i arrecadados na forma de papéis gobernamentales. Ls 60% restantes fúrun ampressos na forma de papel moeda, gerando, assi, anflaçon çcontrolada, na orde de l 250% l anho, na Cunfederaçon. Ne l final de la guerra, ls précios an giral stában cerca de mil bezes mais altos que ne l ampeço de la guerra. Na Cunfederaçon, an 1861, un par de çapatos custaba 1,8 dólar i un barril de trigo custaba dous dólares. An 1864, estes itens custában 200 i 275 dólares, respetibamente, i ne l final de la guerra, l barril de trigo custaba mais de mil dólares. Ls sulistas passórun a fabricar roupas cun tecido de carpete i cortinas i a amprimir jornales an papel de parede.

Al lhongo de la Guerra Cebil Amaricana, la Cunfederaçon tentou adatar-se a las necidades de l sfuorços de guerra. Fábricas cebiles passórun a fabricar armas. La produçon de algodon caiu drasticamente, i la produçon de cereales oumientou. Mas las cundiçones de l suldados de la Cunfederaçon éran sensiblemiente piores que la de l suldados de la Ounion - an matéria de quemidos i armas. An desespero, un ato anstituído an 1863 permitiu la agentes federales de la Cunfederaçon l cunfisco de proiadade cebil que podisse ser outelizada ne ls sfuorços de guerra, cumo cabalhos, quemidos, roupas i armas. Ls cebiles éran pagos cul que ls agentes decidíssen pagar.

La bida na frente de batailha

La bida de l suldados

Las cundiçones de bida de l suldados que lhuitórun na Guerra Cebil Amaricana éran precárias, ambora melhores que an guerras pré-Secesson. Ls suldados éran mui mal pagos. Las roupas éran precárias, feitas de lana cruda, nun processada. Tales roupas questumában çfacelar-se na purmeira chuba. Muitos suldados tamien nun recebien calçados - specialmente na Cunfederaçon, adonde la grande maiorie de l suldados lhutou çcalça. La alimentaçon de l suldados cunsistia primariamente an trigo, milho, chichas i fruitas secas. Estes quemidos muitas bezes nun éran stocados ó preparados de forma sigura. Para alhá desso, la higiene de l suldados de la guerra era precária. Cumo cunsequéncia, muortes debido la cólera, çenterie i outras malinas de l sistema antestinal fúrun quemuns al lhargo de la guerra, tanto quanto l númaro de muortes causadas por ferimientos de batailha. Ampeçalmente, cada suldado era respunsable por purparar i cozinar sou própio quemido. Debrebe, mas, ambos ls lhados ourganizórun cumpanhas cuja sola responsabilidade era cozinar para ls suldados dun dado regimiento.

La maiorie de l suldados ousában spingardas capazes de atirar solo un tiro por beç, tenendo de ser anton recarregados. L porcesso de atirar, recarregar i atirar outra beç tomaba un tiempo médio de aprossimadamente meio minuto, tiempo ne l qual l portador de la arma quedaba nua situaçon stremamente bulnerable. Estes rifles, mas, tenien un albo razoable i ua buona çtáncia, para ls padrones de la época - permitian l acerto de albos lhocalizados até cerca de 400 metros de çtáncia. An muitas batailhas, ls suldados caminában uns próssimos als outros, an formaçon, tornando-los un albo fácele para l inimigo. Ls suldados de la Ounion, mas, éran mais bien eiquipados. Anquanto tendas éran quemuns an acampamientos melitares de la Ounion, éran un iten de lhuxo para ls cunfederados. La falta de suprimientos na Cunfederaçon era grande, i muitos suldados cunfederados usában uniformes, calçados i armas coletados de suldados mortos. Outros fúrun fuorçados a lhutar cun ouniformes gastos i sin calçados. Muitos suldados cunfederados morrírun por causa de la fame. Estes porblemas nun eisistian nas tropas de la Ounion. La taxa de mortalidade causo un dado suldado sofrisse un ferimiento qualquiera era de 1 an 7. Na Guerra de la Coreia, estas taxas éran 1 an 50.

L númaro de baixas por batailha era mui alto, cerca dun quinto a un quarto dua fuorça melitar. Estas baixas ancluen mortos, feridos, suldados caturados ó zaparecidos. Por causa çto, muitos suldados de la Guerra de la Secesson ampeçórun a usar pequeinhas xapas cuntendo sou nome anscrito, ne l causo que, causo morressen, podíssen ser eidantificados após la batailha. Tales xapas éran rústicas, feitas de papel, scrito la caneta, i simplesmente colados ó colocados an bolsas.

Salude

La salude de l suldados era precária. Para cada suldado que morria an batailha morrian dous por causa de malinas tales cumo cólera, çenterie, febre tifóide, malária i tuberculose. Ls percipales fatores de la disseminaçon destas malinas éran las péssimas cundiçones de stoque i preparo de quemidos, falta de higiene i dua dieta balanceada, i de l nó-coincimiento de la amportança de la sterilizaçon de ciertos itens de uso médico. Fratura i specialmente çlocamientos ne ls braços i/ó nas pernas resultaba quaije siempre an amputaçon.

Al lhongo de la guerra, bários feridos i suldados malos fúrun tratados an spitales lhocalizados an cidades, tanto na Ounion cumo na Cunfederaçon. La maiorie, mas, recebie tratamiento an facelidades sanitárias temporárias, tales cumo acampamientos spitalários lhocalizados próssimos de las frentes de batailha, nabios-spitales i struturas comerciales cumbertidas para uso médico. L uso de cabalhos para l transporte de feridos la spitales fui grande durante la guerra por ambos ls lhados. Ourganizaçones nó-gobernamentales tamien cuntribuíran ne ls cuidados médicos. Ua deilhas, la United States Sanitary Commission, cuidou de suldados de dambos ls lhados.

Las mulhiers tubírun un papel eissencial ne ls spitales i outros anstitutos de salude. Antre eilhas, stá Mary Walker, ua cerjana, i sola mulhier a recebir la Medalha de Honra de l Stados Ounidos. Miles de mulhieres atuórun cumo beluntárias, trabalhando cumo anfermeiras, tanto nas fuorças de la Ounion quanto nas fuorças de la Cunfederaçon.

Cautibos de guerra

**Cautibos cunfederados sperando para séren lhebados la prisones.**

Cerca de 211 mil suldados de la Ounion i 215 mil suldados de la Cunfederaçon fúrun caturados pul inimigo, que quedórun cautibos an aprossimadamente 30 prisones ó an acampamientos temporários. De l 211 mil nortistas caturados, 16 mil fúrun soltos cula cundiçon que prometessen nun lhutar contra la Cunfederaçon outra beç. Suldados negros nortistas caturados por fuorças sulistas éran frequentemente torturados i/ó assassinados puls suldados cunfederados.

Nin la Ounion quanto ls cunfederados tenien las facelidades neçairas para aquemodar grandes númaros de cautibos. La Guerra Cebil Amaricana fui la purmeira guerra beç adonde l paíç tubo que lhidar cun grandes númaros de presioneiros, i por esto, l tratamiento dado por ambos ls lhados als sous cautibos bariában bastante. Las cundiçones de bida de l presioneiros de guerra éran péssimas, por causa de prisones lhotadas i falta de cuidados sanitários adequados. Ls presioneiros de guerra de la Ounion anfrentórun las piores cundiçones, bisto que ls própios suldados de la Cunfederaçon anfrentában la falta de alimentaçon i de bestuário. Muitos presioneiros morrírun na prison. Estas prisones serien atualmente cunsidradas inabitables, an padrones atuales. L sofrimiento antre ls presioneiros de guerra era ounibersal i sebero, cumo muitos posteriomente testemunharian.

Las percipales prisones sulistas fúrun Libby i Castle Thunder, dues prisones que éran depósitos antes de la guerra, lhocalizados an Richmond; Belle Isle an Columbia, Carolina de l Sul, i Camp Sumter, an Andersonville, Geórgia. Las percipales prisones nortistas fúrun Elmira, an Point Look, sul de Nuoba Iorque, John's Island, na Baía de Chesapeake, Camp Douglas an Chicago, Illinois; i Rock Island an Iowa.

Frentes de batailha

Aprossimadamente dieç mil cunfrontos melitares ocorrírun durante la guerra, 40% deilhes na Bergínia i ne l Tennessee.

L Plano Anaconda

L Plano Anaconda fui criado pul General de la Ounion Winfield Scott, i antrou an uso an 1862. Anstituiu un cerco de la Cunfederaçon por parte de la Ounion, atrabeç dun bloqueio nabal, de l cuntrole de l Riu Mississippi i de l Riu Tennessee, assi, cercando i debedindo totalmente la Cunfederaçon.

L bloqueio nabal de la Cunfederaçon - cujo oubjetibo era bloquear la sportaçon de algodon, tabaco i quemidos la países ouropeus, i la amportaçon de armamientos - amplicou la custante bigiláncia de 4,8 mil quilómetros de lhitoral sulista, ua tarefa de ampeço cunsidrada ampossible. Mas, l bloqueio atingiu buns resultados ne ls purmeiros seis meses de ouperaçon i era quaije inexpugnable após dous anhos de l ampeço de la guerra. Yá ls rius Mississippi i Tennessee fornecian fácele i direto acesso la bárias cidades amportantes de la Cunfederaçon.

Para alhá destes trés oubjetibos purmários, l Plano Anaconda tamien tenie cumo oubjetibo la catura de la capital de la Cunfederaçon, Richmond. Esta nun tenie balor stratégico, sceto ls buns eifeitos na moral de la populaçon de la Ounion, i de l choque çferido a la moral de la populaçon de la Cunfederaçon.

La frente marítima

La Ounion çpunha dua grande bantaige zde l ampeço de la guerra, que era l cuntrole de la Marina amaricana. Ne l ampeço de la guerra, alguns nabios de la Ounion atracados ó fundeados an portos cunfederados fúrun caturados, mas la grande maiorie permaneciu sob cuntrole de la Ounion. La capacidade andustrial de la Ounion, para alhá desso, permitiu que esta custruísse rapida i eficientemente bários nabios de guerra. An 1861, la Marina de la Ounion tenie cerca de nuobe mil marinheiros, 90 nabios (42 an comisson) i un ourçamiento anual de 12 milhones de dólares. Ne l final de la guerra, esta Marina tenie 56 mil marinheiros, 626 nabios, de l quales 65 éran couraçados, i un ourçamiento anual de 123 milhones de dólares. L bloqueio eiquenómico i melitar an mar de la Cunfederaçon tornou-se eficiente, mas, solamente a partir de l final de 1863.

La Cunfederaçon, ne l ampeço de la guerra, tenie poucas ounides nabales de cumbate, sendo formada basicamente por aqueilhes nabios caturados an portos cunfederados. Ls cunfederados, mas, cunseguiran custruir ua Marina atrabeç de la cumpra de nabios ouropeus, de la catura de nabios de la Ounion i tamien pula custruçon própia. La purmeira batailha antre nabios couraçados de la stória ocorreu an 9 de Márcio de 1862, adonde l USS Monitor de la Ounion anfrentou l CSS Virginia de la Cunfederaçon. Estes tamien produziran submarinos. Un deilhes, l Hunley, afundou l USS Housatonia, an meados de 1863. Fui la purmeira beç na stória melitar que un submarino afundara outra ambarcaçon nabal.

Dibersos nabios cunfederados çtacórun-se por sous feitos. L CSS Sumter afundou 18 nabios nortistas an 1862, i l CSS Florida caturou 37 nabios an 1863, ne l Ouceano Atlántico. L CSS Shenandoah caturou 38 nabios de l norte ne l Ouceano Pacífico. L nabio mais famoso de la Cunfederaçon fui l CSS Alabama, que afundou 69 nabios de la Ounion antre 1862 i 1864, até ser afundado pul USS Keargage, an Júnio de 1864. L oumiento de l précios de siguros ne ls Stados Ounidos lhebou a la séria deterioraçon de la marina mercante amaricana, cujos eifeitos perdurarian até meados de l seclo XX.

L bloqueio eiquenómico i melitar de la Cunfederaçon ampeçou a surtir grande eifeito a partir de 1864. Nabios de la Cunfederaçon nun cunseguian mais quebrar este bloqueio cun sue Marina. Als poucos, cidades portuárias amportantes de la Cunfederaçon fúrun caturadas pula Ounion. Al final de la guerra, solo l porto de Galveston, Texas, permanecie lhibre i nas manos de l cunfederados.

La frente diplomática

L gobierno de la Cunfederaçon staba cunfiante que dibersos países ouropeus reconhecerian la andependéncia de la Cunfederaçon, i que l Reino Ounido i possiblemente la Fráncia eirien ajudar financeiramente, politicamente i melitarmente la Cunfederaçon. La andústria téxtil de l dous redadeiros países ouropeus dependian de l algodon produzido ne ls Stados de l Sul. Esta política de diplomacie fui la "diplomacie de l algodon" - ó estes países benien an ajuda a la Cunfederaçon, ó corrian l risco de sofrer grandes crises eiconómicas por causa de la falta de matéria-prima - a la época, la andústria téxtil era ua de las bases de las eiquenomie de la Fráncia i de l Reino Ounido.

Ls purmeiros cunflitos diplomáticos antre la Ounion i l Reino Ounido tenerien ampeço an 8 de Nobembre de 1861, quando nabios melitares de la Ounion antercetórun un nabio británico i fuorçadamente aprisionórun dous diplomatas cunfederados, ando an direçon al Reino Ounido. La crise agrabar-se-iba após l gobierno británico tener permitido a la Cunfederaçon l dreito de custruir nabios ne l paíç. Quando l gobierno amaricano soube que ls cunfederados stában custruíndo dous grandes ironclads (couraçados) ne l Reino Ounido, l ambaixador amaricano ne l Reino Ounido dixe que "esto ye guerra". L Reino Ounido cunfiscou ls dous nabios pouco antes de l término de la custruçon de ambos.

L clímax de la crise diplomática acuntiu an Agosto de 1862, quando ls cunfederados ambadírun Maryland, tenendo derrotado ls nortistas na Segunda Batailha de Bull Run. L Reino Ounido, anton, staba pronto para anunciar sue çposiçon de fazer ua mediaçon antre la Ounion i la Cunfederaçon, que gerarie ó la andependéncia de la Cunfederaçon ó de la antrada de l Reino Ounido na guerra, causo ls cunfederados cunseguissen amostrar séren capazes de bencer la guerra. Mas, la derrota cunfederada na Batailha de Antietam, bien cumo na batailha susequente de Gettysburg, fizo cun que l Reino Ounido assumisse ua posiçon de neutralidade deste anton. Napoleon III oufreciu mediaçon an Janeiro de 1863, ouferta recusada por William Seward.

Nanhun paíç reconheciu la andependéncia de la Cunfederaçon, reconhecendo-la cumo un nuobo paíç, cun sceçon de l reino alman de Saxe-Coburgo-Gota. Diplomatas de la Ounion persuadiran las poténcias ouropeias la nun reconhecer la andependéncia de la Cunfederaçon. L bloqueio an tierra i mar de la Cunfederaçon, por parte de la Ounion, reduziu al mínimo la amportaçon de armas de la Ouropa i la sportaçon de algodon i de quemidos. Para alhá çto, l algodon neçairo a la andústria téxtil ouropeia ampeçou a benir de la Ounion, i de las quelónias británicas de Eigito i Índia, i ls quemidos passórun a ser fornecidos diretamente pula Ounion i pul Canadá, anton inda quelónia británica. Próssimo al final de la guerra, an Nobembre de 1864, Jefferson ambiou Duncan F. Kenner a la Ouropa para propor la aboliçon de la scrabatura na Cunfederaçon an reconhecimiento de la andependéncia de la mesma por parte de l Reino Ounido i/ó de la Fráncia. Ambos ls países rejeitórun la proposta.

Frente Ouriental (Region de l Atlántico) : 1861 - 1863

La Batailha de Fort Sumter fui la purmeira batailha de la Guerra Cebil Amaricana, adonde fuorças cunfederadas sob l comando de l General Pierre Beauregard atacórun Fort Sumter, un quartel-general de la Ounion an Charleston, Carolina de l Sul. Las tropas de la Ounion drento de l fuorte rendírun-se an 15 de Abril, i fúrun transportadas ne l die seguinte al território de la Ounion. Esta batailha nun registrou baixas. Após la catura de Fort Sumter, quatro Stados de l norte de l Sul amaricano (Tennesee, Arkansas, Carolina de l Norte i Bergínia), que até anton habien repetidamente recusado oufertas de antrada a la Cunfederaçon, recusórun ordes de la Ounion an atacar sous bezinos de l Sul, declarórun secesson, i juntórun-se a la Cunfederaçon. Para recumpensar Bergínia, la capital de la Cunfederaçon fui mobida para Richmond, lhocalizado ne l centro dun Stado densamente poboado, i que poderie recrutar ua quantidade cunsiderable de suldados i material bélico, anque sue lhocalizaçon geográfica, altamente bulnerable contra ataques de la Ounion.

Lhougo após la catura de Fort Sumter, ua tropa de la Ounion, cumpuosta de aprossimadamente 18 mil suldados, assegurou posse de l trecho norte de l Riu Shenandoah - la oeste de las capitales de la Ounion i de la Cunfederaçon - anquanto fuorças cunfederadas comandadas pul General Joseph Johnston cuntrolában las partes anferiores de l riu. L númaro total de suldados cunfederados a la época era de 35 mil suldados.

Anquanto esto, outra tropa de la Ounion, cumpuosta de aprossimadamente 30 mil suldados i comandada pul General Irwin McDowell, mobiu-se an direçon al sul, an território cunfederado. McDowell decidiu atacar las fuorças de Beauregard an Manassas - lhocalizado a 25 quilómetros de Washington, DC - i al mesmo tiempo, mantener las fuorças de l general cunfederado Johnston - que bino an auxílio de Beauregard - acupadas. Mas, las fuorças de Johnston cunseguiran squibar-se de las fuorças de McDowell i juntórun-se cun las fuorças de Beauregard. La Purmeira Batailha de Bull Run ampeçou an 21 de Júlio, adonde las dues fuorças, cumpuostas primariamente de suldados mal-treinados i recrutados a la priessa, ancontrórun-se. Las fuorças de la Ounion atacórun las posiçones de l cunfederados por dibersas bezes, mas nun oubtibírun sucesso - an parte, grácias als sfuorços de l General cunfederado Thomas Jackson, que adespuis tubo la nomeada de "Stonewall" (Muro-de-piedra). Ebentualmente, las fuorças de Beauregard contra-atacórun, i las fuorças de la Ounion recuórun a las priessas para Washington. Alguns lhíderes sulistas cogitórun após la batailha un ataque contra Washington - ua beç que las tropas sulistas stában la solo alguns quilómetros de la capital de la Ounion, por cima, mal-defendida. Posteriomente, alguns sulistas lhamentarian l fato de nun tenéren aprobeitado esta oportunidade an atacar Washington, juntamente cul Stado de Maryland - ua beç que la maiorie de la populaçon de ambas era pró-cunfederaçon.

Após esta batailha, la prebison de l nortistas que la guerra terminarie an solo trés meses mostrou-se ancorreta, i que ua lhonga guerra era sperada. Por mais de dous anhos, la outo-stima de l cunfederados quanto a ua bitória cunfederada quedarie an alta.

Purmeira ambason nortista de la Bergínia

Após la derrota an Bull Run, Lincoln fizo de l General George McClellan l comandante de las Tropas de Potomac. Al lhongo de l ambierno de 1861-1862, McClellan als poucos juntou ua fuorça cula qual el planeiaba tomar la capital sulista, Richmond - lhocalizada la solo 100 quilómetros de l Ouceano Atlántico i diretamente acessible pul Riu James - atrabeç dua ambason marítima. Mas, durante l transporte de las tropas, un couraçado cunfederado, l Virginia, atacou ls nabios de la Ounion, afundando dous deilhes, antes de cunfrontar-se culutro couraçado, l Monitor, la purmeira batailha antre ironclads de l mundo. Ebentualmente, l Virgina baterie an retirada, i posteriomente, la Ounion fabricarie mais couraçados baseado ne l Monitor.

Após la batailha, McClellan i sues tropas zambarcórun ne l lhitoral de la Bergínia, caturando debrebe Yorktown. McClellan, mas, nun arriscou-se a subir l Riu Bergínia - adonde l couraçado de mesmo nome habie batido an retirada - usando ua rota secundária cumo alternatiba. Ne l final de maio de 1862, McClellan staba la solo dieç quilómetros de la capital cunfederada. Ls cunfederados rializórun un contra-ataque, i fuorças cunfederadas, comandadas por Johnston, atacórun las fuorças de la Ounion an 31 de Maio, na Batailha de Seven Pines. Mas, ls cunfederados fúrun mal-sucedidos, i após dous dies, recuórun. Johnston, ferido, fui sustituído pul General Robert Le. Este renomeou las tropas de Johnston de Tropa de la Bergínia de l Norte.

L maior medo de l cunfederados anton era l possible recebimiento de reforços benidos de la capital de la Ounion por parte de las tropas de McClellan - l que dificultarie la situaçon de la capital cunfederada, inda sob cerco de las tropas de McClellan. L General Jackson decidiu, nun mobimiento arriscado, mobimentar-se an direçon la Washington. Jackson querie cunfundir tropas nortistas, fazendo-las pensar que ls sulistas atacarian Washington. Jackson i sue tropa de 17 mil cabalheiros abançórun antre 4 de Maio i 9 de Júnio 560 quilómetros an direçon al Riu Potomac, la frunteira antre Bergínia i la capital de la Ounion, derrotando quatro bezes tropas nortistas. Após tener alcançado l Riu Potomac, lhougo al sul de Washington, Jackson recuou. Este mobimiento cunfederado resultou ne l cancelamiento de l ambiamiento de sfuorços que la Ounion planeiaba ambiar la McClellan.

Inda an Júnio, ua tropa cunfederada de 1,2 mil cabalheiros, comandados pul General Jeb Stuart, galopou an torno de las tropas de McClellan, perdendo solo un solo cabaleiro. Este feito repercutiu positibamente antre la populaçon cunfederada, i dou a las fuorças cunfederadas amportantes anformaçones subre las fuorças de McClellan. An 25 de Júnio, Robert Le atacou, al comando de 95 mil suldados, las fuorças de McClellan. La batailha perdurou até 1 de Júnio. McClellan decidiu recuar an 2 de Júlio, acraditando star an zbantaige numérica. McClellan fui ourdenado a juntar-se cun las tropas de l General John Pope, lhocalizado an Manassas.

Maryland

Ls sulistas soubiran de l planos de la Ounion. Assi sendo, las fuorças de Le mobírun-se an direçon al norte, cul oubjetibo de atacar Pope, antes que las fuorças de McClellan podíssen juntar-se a las fuorças de Pope. Anquanto esto, nuobas tropas cunfederadas sob l comando de Jackson, recuperado de sous ferimientos, mobírun-se delantre de Le, i al norte de Pope, cul propósito de atrair l redadeiro para ua armadilha. An 29 de Agosto de 1862, la Segunda Batailha de Bull Run tubo ampeço. Pope atacou Jackson. Ne l mesmo die, las tropas de McClellan chegórun i fúrun eimediatamente ourdenadas a atacar Jackson. Inda ne l mesmo die, Le, juntamente cun fuorças de l General cunfederado James Longstreet, atacou Pope i McClellan, al sul. An 30 de Agosto, Pope i McClellan, cercados por dues frentes, fúrun oubrigados a recuar definitibamente para Washington.

Após esta bitória, fuorças sulistas, un total de 45 mil suldados comandados por Le i Jackson, atacórun Maryland an Setembre, sperando que ua bitória cunfederada an território sulista eirie atrair la atençon i l reconhecimiento de las poténcias ouropeias. McClellan i sous 87 mil suldados fúrun de ancontro a las fuorças de Le. An 15 de Setembre, las fuorças cunfederadas de Jackson ounírun-se cun las de Le. Este tomou la defensiba, al saber que la Ounion habie ancontrado un decumiento amportante cunfederado, detalhando posiçones i stratégias. An 17 de Setembre, na Batailha de Antietam, McClellan rializou ua série de ataques que çtruiu las formaçones de defesa de Le, que fui fuorçado a recuar. 17 de Setembre de 1862 fui l die mais sangrento de la Guerra Cebil Amaricana, adonde morrírun cerca de 2,1 mil nortistas i 1,5 mil sulistas. Esta batailha, ua bitória nortista, resultou ne l lhançamiento de Abraham Lincoln - que speraba ua grande bitória nortista para fazer esto - de la Proclamaçon de Emancipaçon.

Fredericksburg i Gettysburg

McClellan, al lhongo de la batailha de Antietam, tenie ua grande bantaige numérica subre ls cunfederados, i mesmo assi, nun arriscou-se a perseguir las tropas de Lee. Por esto, Lincoln decidiu sustituir McClellan pul General Ambrose Burnside. Burnside decidiu atacar Le an Fredericksburg, Bergínia. Na Batailha de Fredericksburg, 100 mil suldados nortistas ancontrórun-se cun 70 mil suldados cunfederados. Mas, ls cunfederados possuían ua bantaige stratégica, por stáren posicionados defensibamente ne l alto de morros fortificados. Burnside lhançou un ataque an 13 de Dezembre, mas falhou lhargamente. Cerca de 13 mil nortistas morrírun, i Burnside decidiu renunciar de l cargo de general de las tropas de l Potomac.

Burnside fui sustituído pul General Joseph Hooker. Comandante de 138 mil suldados, Hooker decidiu atacar Lee, que inda mantenie la defensiba an Fredericksburg. Hooker planeiaba atacar ls fuortes, mantendo-los anquanto ua fuorça secundária atacarie ls fuortes por trás, cercando ls fuortes por dous lhados. Estes mobimientos ampeçórun an 27 de Abril de 1863, ampeçando assi la Batailha de Chancellorsville, i staba cumo l planeiado, mas Hooker, inexplicablemiente, decidiu recuar la fuorça secundária para ua posiçon defensiba an Chancellorsville. Le debediu anton sues fuorças an trés: ua sob l comando de Stonewall, ancarregado de atacar la fuorça secundária, outra comandada pul própio Le, que atacou la fuorça percipal de Hooker, i ua terceira fuorça, que cuntinou a defender ls cerros fortificados. L ataque sulista, rializado an 2 de Maio, debediu las fuorças nortistas an dues. Hooker decidiu recuar alguns dies depuis. Ls sulistas oubtibírun sucesso, mas pagórun un précio por eilha: l braço squerdo de Jackson fui atingido por un tiro, i tubo de ser amputado. Jackson morrerie an 10 de Maio. Le dixe posteriomente a un de l serbentes de Jackson, antes de la muorte de l redadeiro:

"El [Jackson] perdiu sou braço squerdo, mas you acabei de perder miu braço dreito."

An Júnio, Le i sues tropas mobírun-se al norte, bien drento de território de la Ounion, até la Pensilbánia. La tropa de Potomac seguiu las tropas de Le. Ebentualmente, Le mobiu-se an direçon a la pequeinha bila de Gettysburg, Pensilbánia. Lincoln sustituiu anton Hooker por George Meade, un General natibo de la Pensilbánia. La Batailha de Gettysburg tubo ampeço an 1 de Júlio, i prosseguiu por trés dies, adonde 85 mil nortistas i 65 mil sulistas anfrentórun-se ne l que ye cunsidrada a maior batailha yá rializada ne l cuntinente amaricano. La batailha resultou an decisiba derrota cunfederada, i Le fui fuorçado a recuar definitibamente. Tenendo perdido mais de 25 mil suldados, Le, a partir deste punto, nun tenerie mais fuorça suficiente para posteriomente lhançar un ataque purmário, quedando solo na defensiba. Meade, por outro lhado, cun grande bantaige numérica i inda tenendo recebido reforços após la bitória, otou por nun seguir las tropas cunfederadas an retirada, para l çgosto de Lincoln, que decidiu susituir Meade por Ulysses S. Grant.

La Frente Oucidental (Region Central de l EUA): 1861 - 1863

Zde l ampeço de la Guerra Cebil Amaricana, la einiciatiba de l ataque na region central de l Stados Ounidos stubo siempre de l lhado de la Ounion. Segundo l plano Anaconda, dous de l percipales oubjetibos de la guerra era la catura i l cuntrole de l Riu Mississippi i de l Riu Tennessee, assi debedindo efetibamente la Cunfederaçon an quatro. Las tropas de la Ounion na frente oucidental totalizában aprossimadamente 100 mil suldados durante sou pico, ne l final de la guerra, i éran cuntroladas puls Generales Henry W. Halleck i Don Carlos Buell. Las fuorças sulistas ne l oucidente totalizórun cerca de 70 mil suldados durante sou mássimo, an 1863. Estas fuorças éran cuntroladas pul General Albert Sidney Johnston.

Kentucky i Alabama

La Ounion decediu purmeiramente remober la amanaça cunfederada ne ls Stados de Kentucky i Missouri, ambos Stados de la Ounion, mas cun ua cunsiderable parcela de la populaçon apoiando ls cunfederados. Para esto, la Ounion atacou ls fuortes de Fort Henry, ne l Riu Tennessee, i l Fort Donelson, ne l Riu Cumberland. Ambos ls ataques nortistas fúrun lhiderados pul General Ulysses S. Grant. Grant cunquistou facilmente Fort Heinry an 6 de Febreiro de 1862, na Batailha de Fort Henry. Na Batailha de Fort Donelson, Grant tenie grande superioridade numérica subre las fuorças cunfederadas. L General cunfederado, Simon Bolivar Buckner, pediu por "tenermos aceitables de rendiçon" - Buckner antes era un amigo de Grant, anclusibe tenendo amprestado denheiro la Grant an 1854 - mas Grant respundiu que "solo la rendiçon cumpleta i ancondicional de las tropas cunfederadas serie aceita". Buckner rendiu-se an 16 de Febreiro, i cerca de 13 mil suldados cunfederados fúrun caturados. La Batailha de Pea Ridge, que durou de 6 até 8 de Márcio, fui bencida pul general nortista Samuel Curtis, acabou defenitibamente cula amanaça cunfederada an Kentucky i Missouri, i fizo cun que Grant - cujas einiciales éran U.S. - fusse nomeado de Unconditional Surrender ("Rendiçon Ancondicional"), i un heirói, pula amprensa amaricana.

Riu Mississippi

L General Halleck tornou-se inda an márcio lhíder de las fuorças de la Ounion ne l oucidente. El mandou a Buell que juntasse sues fuorças culs aprossimadamente 40 mil suldados sob l comando de Grant. L cunfederado Sidney i sou comandante, Beauregard - comandantes dua tropa de 45 mil suldados - decidiran atacar Grant antes que Buell juntasse sues fuorças. La Batailha de Shiloh, an Corinth, Tennessee, tubo ampeço an 6 de Abril, i durou até l die seguinte. Las tropas cunfederadas pegórun Grant çprebenido, i las fuorças deste fúrun quaije aniquiladas. Grácias a las tropas de Buell - 18 mil suldados - i outros reforços, Grant contra-atacou, i ls sulistas fúrun oubrigados a recuar. Cerca de 13 mil nortistas i 11 mil sulistas morrírun. Halleck tomou cuntrole de las fuorças de Grant i Buell. Bários nortistas eisigiran que Grant fusse çpensado cumo general, por causa de las grandes baixas, mas Lincoln recusou.

Após la bitória an Corinth, Halleck mobiu sues fuorças an direçon al sul, fuorçando als poucos las forças sulistas la recuáren. An júnio, ls nortistas yá habien cunquistado Memphis, ua cidade de amportança purmária als cunfederados. Para alhá desso, fuorças nabales de la Ounion ampeçórun la abançar, partindo de l Golfo de l México, rumo al norte. An 25 de Abril de 1862, un squadron nabal comandado pul Capitan David Farragut cunquistou Nuoba Orleanes, cerca de l stuário de l Riu Mississippi, cun relatiba facelidade.

Halleck deixou sues tropas pouco depuis de la cunquista de Nouba Orleanes i fui a Washington, DC, para serbir cumo cunselheiro melitar de Lincoln. Halleck dou a la Grant i a la Buell l cuntrole de las fuorças de l oucidente, i ourdenou la Buell que ambadisse Chattanooga. L General cunfederado Braxton Bragg, mas, ambadiu Kentucky antes que Buell podisse atacar, i Buell fui de ancontro a las fuorças de Bragg. Na Batailha de Chattanooga, ocorrida an 8 de Outubre, nanhun lhado benceu, mas Buell recuou, permitindo la Bragg l cuntrole temporário de parte de l Kentucky. Lincoln sustituiu Buell por William Rosecrans. Este atacou Bragg an 31 de Dezembre, na Batailha de Stones River, fuorçando-lo a recuar.

Anquanto esto, por dibersas bezes Grant tentara caturar Bicksburg, la redadeira cidade-chabe cunfederada que faltaba para ser caturada puls nortistas ne l Riu Mississippi. Estes ataques, ne l setor norte de la cidade, resultórun an falha, grácias a las cundiçones geográficas de la region. An Abril de 1863, Grant decediu mudar sue stratégia, i, na nuite de 18 de Maio, Grant i parte de sues fuorças mobírun-se an direçon al sul, atrabeç de barcos. Quando ls cunfederados çcubrírun, yá era tarde demales, i ls nortistas cercában cumpletamente la cidade, que rendiu-se an 4 de Júlio. L Riu Mississippi staba totalmente an manos nortistas.

Riu Tennessee

An Setembre, Rosecranes i sous 55 mil suldados atacórun Chattanooga, i Bragg fui outra beç fuorçado a recuar. Mas, Rosecranes cuntinou a perseguir Bragg. Este recebiu reforços benidos de la Bergínia por camino de fierros, i l númaro de suldados subre l comando de Bragg subira de 30 mil para mais de 65 mil. Na Batailha de Chickamauga, an 20 de Setembre, la Cunfederaçon tubo sue redadeira bitória amportante an to la Guerra de Secesson. Bragg i sues fuorças recuórun para Chattanooga, la cidade mais amportante ne l Riu Tennessee, anquanto Rosecranes fui afastado, i l comando supremo de la Frente Oucidental fui dado la Grant. Antre 23 i 25 de Nobembre, tropas nortistas comandadas por Grant anfrentórun las tropas de Bragg na Batailha de Chattanooga, i ls sulistas recuórun ne l die 26. La cunquista de la cidade seneficaba que l Riu Tennissee staba an manos nortistas, debedindo l lheste de la Cunfederaçon an dous.

Frente de l Pacífico: 1861 - 1865

Ambora geograficamente eisolado de las batailhas de l centro-lheste de l Stados Ounidos (la oeste de l Riu Mississippi), l oeste amaricano fui l palco de batailha dun númaro de açones melitares. An 1861, ls cunfederados lhançórun ua campanha bien-sucedida ne l Território de l Nuobo México. Ls habitantes de l sul deste território apoiában ls cunfederados, i pediran la tropas cunfederadas an Texas que remobessen tropas de la Ounion inda presentes na region. L território cunfederado de Arizona fui proclamado pul Coronel John Baylor, após las Batailhas de Mesilla i de la catura de dibersas fuorças nortistas, mas las tentatibas de la Cunfederaçon an als poucos abançar an direçon al norte i al oeste de l paíç fúrun mal-sucedidas - specialmente após la Batailha de Glorieta Pass, adonde dous mil nortistas trabórun l abanço cunfederado an direçon la Denver i la Fort Union, tenendo un texano dezido anclusibe que "se nun fusse por estes demonhos de "Pike's Peak", este paíç tenerie sido nuosso."

L Arizona fui recunquistado pula Ounion an 1862 por fuorças nortistas procedentes de la Califórnia. L resultado de la batailha de Glorieta Pass acabou cun qualquier possibilidade de la Cunfederaçon de tomar l Nuobo México i outros territórios ne l stremo oucidente de l Stados Ounidos.

La Ounion por dibersas bezes tentou caturar las regiones cunfederadas de Texas i de Louisiana, lhocalizadas para alhá de l Mississippi, zde 1862 até al fin de la guerra. Cun todos ls portos cunfederados ne l Atlántico bloqueados pul Plano Anaconda, l Texas i la Lhouisiana cuntinában a alimentar las reserbas monetárias de la Cunfederaçon, ua beç que l algodon - al menos, parte del - cuntinou a ser sportado para la Ouropa, sendo transportados bie l México i deilhi transportadas para la Ouropa, i comercializadas por denheiro ó diretamente por suprimientos. Ls nortistas tentórun por dibersas bezes tentórun acabar cun esto, atrabeç de sucessibos ataques contra estes dous Stados. Mas, ls cunfederados defendírun brabamente estes Stados, na Batailha de Galveston i na Segunda Batailha de Sabine Pass. La redadeira batailha de la Guerra Cebil Amaricana acunteciu an Texas, na Batailha de Palmito Ranch - que resultou, eironicamente, nua bitória cunfederada.

Chimpa de la Cunfederaçon

An 1864, yá staba claro que la Cunfederaçon habie perdido la guerra. Sues fuorças als poucos deminuían, grácias la baixas an batailhas i a la cunquista de território cunfederado por parte de la Ounion, assi deminuindo l númaro de recrutas. Para alhá desso, eiquipamientos stában an falta, i la maiorie de l sistema de transportes de la Cunfederaçon ó habie passado al cuntrole de la Ounion (causo de la bacie hidrográfica de l Riu Mississippi i de l Riu Tennesse) ó habie sido sabotado (camino de fierros). Mas, ls sulistas cuntinórun a resistir brabamente contra ls ataques de la Ounion.

An 9 de Márcio de 1864, Lincoln dou la Grant l comando de todas las fuorças de la Ounion. An Maio, Grant i la Tropa de l Potomac, comandada por Meade, mobírun-se para ua region nomeada Wilderness - ua region de florestas i arbustos - atraindo assi l cunfederado Le i sues fuorças. Grant, comandante direto de 118 mil suldados, achaba que, cun quaije l dobro de suldados (Lee tenie solo 60 mil suldados), bencerie facilmente la batailha. La Batailha de Wilderness ampeçou-se an 5 de Maio i perdurou por dous dies. La begetaçon densa dou la bantaige para Grant. La cabalharie i ls canhones nortistas amostrórun-se einúteles na region. Para alhá desso, ebentualmente, ls arbustos pegórun fuogo, i bários suldados morrírun queimados. Ambos ls lhados ebentualmente recuórun, tenendo sofrido einormes perdas.

An Maio de 1864, Sheridan, comandante dua tropa de 100 mil suldados, por ordes de Grant, ambadiu i cunquistou mui de l sudeste de la Cunfederaçon. Sheridan cunquistou Atlanta inda an Maio, tenendo anfrentado resisténcia dua fuorça cunfederada de aprossimadamente 60 mil suldados, comandadas por Joseph Eggleton Johnston. Este ebentualmente recuou, i fui sustituído por John Hood. Este decidiu ambadir l Tennesse, sperando que Sheridan fazisse l mesmo. Hood acraditaba que podie bencer Sheridan ne l terreno montanhoso de l Tennessee. Mas, na Batailha de Franklin, an 30 de Nobembre, Hood fui derrotado pul General nortista John Schofield. Hood arreculou para Nashville, Bergínia, i fui derrotado definitibamente por Sheridan i sous 55 mil suldados na Batailha de Nashville, an 16 de Dezembre.

Anquanto esto, al lhongo de Maio de 1864, Grant tentou nua série de ataques "todo-ó-nada" contra la capital cunfederada, Richmond. La Batailha de Spotsylvania Court, ocorrida an 8 de Maio, tubo ls mesmos resultados de Wilderness. An 3 de Júnio, Grant, al comando de 50 mil suldados, ourdenou un ataque la Cold Habor i sous 30 mil suldados, lhocalizada eimediatamente al norte de Richmond. Ls cunfederados, bien antricheirados, cunseguiran çferir aprossimadamente 7,5 mil baixas an solo alguns minutos contra Grant, que fui fuorçado a recuar. Grant recebiu de la amprensa nortista la nomeada de "carniceiro", tenendo perdido 45 mil suldados an solo un més.

Sabendo que un ataque fruntal i direto contra Richmond serie zastroso, Grant mobiu sues fuorças an direçon al sul, al sul de l Riu James, para atacar Petersburg, un pólo ferrobiário que abastecie Richmond cun suprimientos. La catura de Petersburg forçarie Lee a salir de la cidade para defender la capital cunfederada. Al ambés dun ataque direto, Grant desta beç preferiu cercar Petersburg i lhentamente stagná-la cula falta de suprimientos. Assi sendo, trincheiras fúrun cabadas an torno de la cidade i caminos de fierro alimentando la cidade fúrun cortadas.

Por un anho Petersburg quedou cercada, até que ne ls purmeiros dies de Abril de 1865 las anstalaçones ferrobiárias de Petersburg fúrun finalmente caturadas pulas fuorças de Grant. Lee fui fuorçado anton a fugir de la cidade, i fuorças nortistas caturórun Richmond an 10 de Abril. Grant cuntinou a perseguir Lee i sue fuorça, que batie an retirada, tenendo cunseguindo cercá-lo an Appomattox. Lee, al cuntrole de 50 mil suldados, biu que ua bitória era ampossible contra ls aprossimadamente 120 mil suldados de Grant, i Le pediu por tenermos de la rendiçon an 8 de Abril. Ne l die seguinte, Grant i Lee ancontrórun-se ne l tribunal de Appomattox, adonde Grant oufreciu tenermos relatibamente generosos de rendiçon.

La Guerra Cebil Amaricana nun acabara ouficialmente, mas la rendiçon de la percipal tropa cunfederada significaba que l fin de la guerra era ua queston de tiempo. An 14 de Abril, Lincoln fui assassinado por un stremista sulista, mas esto an nada afetarie l rumo de la guerra. Als poucos, outros generales cunfederados rendírun-se. Las redadeiras tropas sulistas rendírun-se an 28 de Júnio de 1865.

Análeze de la guerra

Até hoije, mui se çcute por que la Ounion ganhou (ó por que la Cunfederaçon perdiu) la guerra. Las bantaiges de la Ounion que cuntrebuíran para l sucesso desta, i que son lhargamente aceitas antre storiadores, ancluen:

La eiquenomie andustrializada de l Norte, an cuntreste cula eiquenomie agrária de l Sul. Esta eiquenomie andustrializada ajudou na fabricaçon de armas i outros suprimientos.
La grande i eificiente rede ferrobiária de l Norte, que permitiu l transporte rápido de tropas. Anque l Sul tener al lhongo de la guerra mais quilómetros de caminos de fierro per capita, bários destes caminos de fierro nun éran cumpatibles antre si, i nun formában ua rede ferrobiária cunsistente - esses caminos de fierro serbian an purmeiro lhugar para l transporte de algodon de l campos para ls portos. La Guerra Cebil Amaricana fui la purmeira guerra de la stória adonde caminos de fierro zampenhórun un amportante papel.
Ua maior populaçon, i taxas maiores de eimigraçon ne l Norte, que tornou possible que mais pessonas podíssen atuar na guerra cumo suldados.
La possesson dua fuorte fuorça nabal, que lhebou al bloqueio eiquenómico bien-sucedido de la Cunfederaçon por mar.
L gobierno stable i popular de la Ounion.
La causa moral proclamada pula Proclamaçon de Eimancipaçon, que dou a la Ounion un ancentibo adicional an cuntinar ls sfuorços de guerra.
L recrutamiento de negros pulas fuorças de la Ounion, após la "Proclamaçon de Emancipaçon", que fúrun ousados antes de mais cumo arma eideológica contra la Cunfederaçon. Ls negros nun fúrun outorizados a atuar nas fuorças melitares de la Cunfederaçon até las sumanas finales de la guerra.
L péssimo uso de recursos eisistentes an oufensibas por parte de la Cunfederaçon, i na falha desta an usar táticas de guerrilha contra l sistema de transportes i de quemunicaçon de la Ounion.
La falha de la Cunfederaçon an cunseguir suporte melitar de qualquier outro paíç, antes de mais por causa de l resultados de la Batailha de Antietam i de la Porclamaçon de Eimancipaçon, an 1863.

Çfecho

Custos de la guerra

La guerra terminou cula rendiçon ancundicional de las fuorças cunfederadas. Nun houbiste cunflitos de guerrilha senieficante. Muitos ouficiales de l alto scalon de la Cunfederaçon scapórun para la Ouropa, l México i l Brasil, antre outros países. Davis fui caturado i aprisionado por dous anhos, i lhibertado an seguida. Nanhun oufecial cunfederado fui porcessado por traiçon.

Baixas

Ouficialmente, un total de 558 052 suldados morrírun durante la Guerra Cebil Amaricana. Cunsiderando suldados zaparecidos, l total sobe para aprossimadamente 620 mil. L númaro de feridos ye de aprossimadamente 275 mil na Ounion i de 137 mil na Cunfederaçon. Estes númaros fázen de la Guerra Cebil Amaricana la mais sangrenta de to la stória de l Stados Ounidos. Aprossimadamente 360 mil suldados de la Ounion i 198 mil de la Cunfederaçon morrírun. L númaro de amaricanos muortos na Guerra Cebil Amaricana ye maior que la soma de amaricanos mortos durante todos ls outros eibentos de la stória melitar de l Stados Ounidos, zde la Reboluçon Amaricana de 1776 até tiempos atuales. Trés quintos de todas las muortes fúrun causados por malinas, un quinto por lhesones i ferimientos i solo un quinto morriu diretamente an cumbate.

Socio-eiquenómicos i culturales

La Guerra Cebil Amaricana drenou ls recursos financeiros de l Norte i arruinou cumpletamente la eiquenomie de l Sul. L custo total de la guerra fui de 115 bilhones de dólares. Grande çtruiçon acunteciu ne l Sul por causa de la guerra. Einúmaras fábricas, stablecimientos comerciales i residéncias fúrun çtruídos i campos fúrun queimados puls suldados de l Norte. L monopólio mundial de l algodon sulista fui çtruído. Eimediatamente apuis de la guerra houbo l aparecimiento de grandes ressentimientos i atritos antre la populaçon de l Sul i de l Norte de l Stados Ounidos, que perdurórun por bárias geraçones. Ressentimientos de la populaçon sulista contra l Partido Republicano, l partido de Abraham Lincoln, tamien surgiran. Ls republicanos tenerien grandes dificuldades an bencer qualesquiera eileiçones federales até a la década de 1970, i mesmo an tiempos atuales, ls Stados de l Sul son gobernados an sue grande parte por democratas.

Nanhun porgrama gobernamental fui prebisto para la antegraçon profissional i eiconómica de l Sul als Stados Ounidos de la América. L Sul perdiu to sue anfluéncia política, eiconómica i cultural ne ls Stados Ounidos. Ls eideales tradicionales de l Sul passórun la nun tener nanhue anfluéncia ne l gobierno federal. Anquanto l cunflito assolaba ls Stados amaricanos, la sportaçon de algodon puls Stados de l Sul al Reino Ounido quedou altamente prejudicada - l setor téxtil anglés a amportar algodon de dues de sues quelónias - l Eigito i la Índia, i tamien ancentibando outros países produtores de algodon - anclusibe, l setor algodoeiro ne l Brasil. Fui l "surto nas sportaçones brasileiras de algodon".

La Guerra Cebil Amaricana fizo la ourbanizaçon de las tierras de l oeste i de las árias centrales norte-amaricanas, cuntribuindo inda mais para l crecimiento de la eiquenomie, la spanson andustrial i l zambolbimiento de l capitalismo de l Stados Ounidos.

Anque de las deficuldades financeiras anfrentadas pula Ounion al lhargo de la guerra, grácias al sfuorço de guerra, l Norte creciu de maneira surprendente, percipalmente na metalurgie, trasporte ferrobiário, armamientos i nabal. Para alhá de l zambolbimiento tecnológico, houbiste ganhos ne l campo de la medecina, scuolas i anstituiçones de ansino superior. L quemércio creciu de maneira sponencial, spalhando-se para todo l território amaricano. L padron de cultura de l Stados Ounidos passou a ser l eideal nortista de "trabalho duro, eiducaçon i lhibardade eiquenómica a todos", i que eibentualmente, fazerie de l Stados Ounidos la maior poténcia eiconómica de l mundo.

Más de 60 mil libros i artigos fúrun scritos subre la Guerra Cebil Amaricana, fazendo desta guerra ua de las guerras subre las quales mais se screbiu na stória de la lhiteratura. L poeta amaricano Walt Whitman predisse, corretamente, apuis de la fin de la guerra:

"Ua grande lhiteratura deberá aparecer desta era de quatro anhos".

Eifeitos ne l melitarismo

La Cunfederaçon fui abolida pula Ounion, i ls Stados rebeldes fúrun acupados por tropas de la Ounion até 1877.

La Guerra Cebil Amaricana ye cunsidrada por bários storiadores cumo la purmeira guerra moderna. L cunflito gerou bários abanços na ária melitar. Táticas i armas fúrun criadas i antroduzidas, que serien lhargamente ousadas nas próssimas décadas, até l ampeço de l seclo XX. Antre las percipales inobaçones de la guerra stá la ambençon de scopetas que podien atirar bárias balas antes de séren recarregados, i l uso de las purmeiras metralhadoras.

La Guerra Cebil Amaricana fui la purmeira guerra adonde balones fúrun outilizados cul propósito de patrulhamiento aéreo. Pula purmeira beç, nabios couraçados fúrun outilizados an guerra, bien cumo submarinos capazes de çtruir outros nabios. Minas terrestres i aquáticas fúrun outras inobaçones. Para alhá desso, pula purmeira beç na stória mundial, camino de fierros fúrun ousadas para mobimentar un grande númaro de suldados dua region para outra, an queston de poucos dies. L telégrafo tamien fui ousado, para quemunicaçon, pula purmeira beç.

Para alhá desso, la Guerra Cebil Amaricana ye cunsidrada ua guerra moderna por causa de la grande çtruiçon gerada. Fui la purmeira guerra total de l mundo, adonde todos ls recursos çponibles fúrun ousados por ambos ls lhados para ls sfuorços de guerra.

Fin de la scrabidon

La Custituiçon amaricana de 1776 dezie que "todos ls homes son eiguales". Eironicamente, apuis de la andependéncia tener sido alcançada, i até la fin de la Guerra Cebil Amaricana, ls Stados Ounidos éran l maior paíç scrabista de l mundo (esto talbeç se deba al fato de que ls outores de la Custituiçon nun cunsiderában negróides cumo homes, mas si cumo subhumanos ó símios proto-houmanóides - bastante ironico, principalmente quando l Sul siempre fui l beche spiatório-mor de l Racialismo amaricano). Apuis de l fin de la guerra, ls amaricanos tentórun fazer esta eigualdade ua rialidade ne l paíç, atrabeç de la aprobaçon de la 13^a Emenda a la Custituiçon amaricana, tenendo sido rateficada ne l final de 1865, i que acabou oufecialmente cula scrabidon ne l paíç. A 14^a Eimenda fui aprobada an 1868, definia cidadanie i daba al gobierno federal amplos poderes para forçar ls Stados a fornecíren proteçon eigualitária a las lheis. A 15^a Emenda fui aprobada an 1870, i daba a todos ls negros de l sexo masculino maiores de eidade l dreito de boto.

Mas, l lhugar de ls negros na sociadade amaricana cuntinou andefinido, i ls negros cuntinórun a ser marginalizados an to paíç, ua beç que lheis antidiscriminaçon inda nun eisistian na época. L sul serie acupado por tropas de l Norte até 1877, i dibersos negros fúrun colocados an posiçones amportantes de l gobierno de l Stados sulistas, pul gobierno amaricano. A maior parte de la populaçon sulista sentiu-se houmilhada cun estas medidas, faborecendo l aparecimiento de sociadades secretas cumo ls Cabalheiros de la Camélia Branca i la Ku Klux Klan, que ampregában la bioléncia para perseguir ls negros i defender la segregaçon racial.

Ounion

Alguns storiadores acradítan que la guerra tenga sido la maior falha de la democracie (pus ampediu un plebiscito democrático de fato al ampor l sistema eiconomico lhiberal cumo l solo i supremacista ne l paíç anteiro, sin dar heipoteses a la dibersidade eiquenómica de modos; até por que l mercantilismo de l Sul staba lhoinge de poluir tanto l meio-ambiente quanto las fábricas nortistas). Afinal, cumo l própio Lincoln dixo ne l final de la guerra:

"La guerra fui ua segunda anstáncia, de la botaçon a la bala".

L solo lema de l Stados Ounidos anton era "E Pluribus Unum" , que quier dezir "De Muitos Un". L lhema ye ua refréncia a la criaçon de l Stados Ounidos de las 13 antigas quelónias británicas. Mas las dibergéncias eisistentes antre l Norte i l Sul criórun un sentimiento de andecison ne ls amaricanos - la scolha antre formar ua sola grande nacion ó bárias naciones menores. Mas, l çfecho de la guerra claramente stableciu que ls Stados, por si solo, nun ténen l dreito ó l poder de salir de la Ounion.

Refugiados

Apuis de la derrota i la recesson político-eiconómica que se seguiu ne l Sul, muitos cunfederados migrórun para outras regiones de l Stados Ounidos (primariamente, para l Norte i l Oeste amaricano). Ls Stados cunfederados an cunjunto (cun sceçon de la Flórida i de l Texas) sofrírun an cunjunto un decréscimo populacional de cerca de 300 mil habitantes na década de 1870, 450 mil habitantes na década de 1880 i 550 mil habitantes na década de 1890. Muitos de l cunfederados que abandonórun l Sul amaricano eimigrórun para outros países, antre eilhes l Brasil, buscando fugir nun solamente de la recesson eiconómica, bien cumo de la perseguiçon i çcreminaçon que se seguiu contra la populaçon cunfederada. Essa fuga cunsistiu ne l maior éisodo populacional de la stória de ls Stados Ounidos.

Ls cunfederados ancontrórun ne l Brasil tierra produtiba para l plantio de culturas de las quales eilhes tenien ampla speriéncia, cumo algodon, milho i balancie. Nun se sabe al cierto l númaro de cunfederados que abandonórun ls Stados Ounidos i se anstalórun ne l Brasil. Stimatibas barian antre quatro mil la binte mil cunfederados que eimigrórun para l Brasil, adonde se anstalórun primariamente an Santa Bárbela d'Oeste, i Amaricana, que lhieba ne l nome la marca de la eimigraçon.