پریکلس اتا آتن ِسیاستمدار بی‌یه که یونان باستان دوره شهرت داشته. ونه مقوم «استراتاگوس» (استراتژیست) بی‌یه و دراصل اتا نظامی رهبر بی‌یه. وه آتن ره اتا گتِ امپراتوری تبدیل هاکرده و ونه دوره اینتا شهر هخامنشیون و اسپارت جه سرشاخ بینه. وه دموکراسی ره گت‌ته هاکرده و تموم آتنِ مردهایی که آزاد بینه ره رأی برابر هادا. وه حتا باته ونه روستایی‌ها که آتنِ دور-وَر جه شه کار و زراعت ره ول کنّه و انّه تا میلس دله شرکت هاکنن و سیاست ره تن انّه ره حق ایاب-ذهاب هدائن. حتا ونه دوره یارانه دانه که فقیر آتنی مردمون وشنی نمیرن و اختلاف طبقاتی کمته بوو.
پریکلس شه اولین زنا جه دِتا ریکا بیارده که هر دِ پیش از وه طاعون بیتنه و بمردنه. وه اتا زنا غربتی، آسپاسیا، جه رابطه داشته که ونجه هم اتا ریکا داشته ولی قانونی که شه قبلاً بی‌یشت بی‌یه، باعث بیّه که ونه این اتا ریکا ره شهروند ندونن. زمونی که پریکلس هم طاعون بیته و دَر-مِرده، ونه سربالا مردم حاضر بینه و رأی هدانه که استثناً ونه اتا ریکا ره شهروند هاکنن.
