Chełmno

Restant van ne müre van et vernetigingskamp Chelmno

Chelmno (of verdüütsked Kulmhof) was en vernetigingskamp van de nazi's in den tweyden wearldoorlog. Et leade 50 kilometer up et noorden van Łódź, by et städken Chełmno nad Nerem. Et kamp deenden gin enkel ander dool as et vernetigen van lüde un was in gebruuk van den 8. december 1943 töt den 11. april 1943 as deyl van Operaty Reinhard. Dårnå güng et vannys lös van den 23. juni 1944 töt den 18. january van 1945 tydens den teagenanval van de sovjetten. Vanaf 1943 must der anders emoard worden, ümdat de untvangsthalle al vord was ehaald.

Ten minsten 152.000 lüde wörden vermoord in Chelmno. Dårmed was et up veer nå et doudelikste vernetigingskamp, nå Auschwitz, Treblinka, Belzec un Sobibor. By de Chelmnoprocessen van 1962 töt 1965 kümmen de Westdüütske anklagers skounwal med nazi-cyfers vöär 180.000 slachtoffers. Officiäle poolske skattingen kort nå den oorlog weysen up sou'n 340.000 kearls, vrouwlüde un kinder. Et Martelaarsmuseum Kulmhof höldt et getal 200.000 an. De meysten van disse slachtoffers warren jöäden uut et midwesten van Polen. Anderen warren ümwoanende romani un butenlandske jöäden uut Hongarye, Bohemen un Moravie, Düütskland, Luksemburg un Oustenryk dee via den Getto van Łódź wörden anevoord, nöäst russiske krygsgevangenen. De lüde wörden ümmebracht med gaswagens. In Chelmno probeerden de nazi's öäre moordmetoden eyrst uut, vöärdat se in andere kampen topassing kreagen.

Et Roude Leyger nöäm up den 17. january 1945 et städken Chelmno in. Teagen den tyd hadden de düütskers et bewys vöär et bestån van et kamp al vernetigd. Gevangenen wörden neet leavend achterelåten. Eyne van de oaverleavenden, nen jungen van 15 jår, getüügden dat et mär dree jöädske kearls elükked was üm vord to kummen. De Holocaust Encyclopedia meynt at der söäven jöäden vordkummen. Eyne dårvan was den skryver van et Grojanowskiraport, wat under den skuulname Szlama Ber Winer eskreaven was.. Hee was lid van en jöädsk sonderkommando en wüst vord to kummen, mär wör later as noch in Belzec vergasd nå et uprümen van noch ne jöädenwyke in düütsk Polen. In juni van 1945 getüügden twey oaverleavenden by et proces teagen de kampleiders in Łódź. De dree bekendste oaverleavenden getüügden oaver Chelmno by et proces van Adolf Eichmann in Jerusalem in 1961. Twey oaverleavenden getüügden ouk teagen kampbewakers in de processen dee Westdüütskland van 1962 töt 1965 höld.