Riga

Riga is de höyvdstad van Letland. Med 605.802 inwoaners is et ouk de grötste stad. Dat antal is ouk eyndarde van et heyle inwoanertal van et land. Med vöärstäden der by kümt et antal in 2023 up 860.142. De stad ligt an den Gulv van Riga an wår de rivyr de Daugava up de baltiske sey uutkümt. Riga beslöt 307,17 kilometer in et veerkant up ligt 1 töt 10 meter boaven sey, up ne sanderige plate.

Riga wör esticht in 1201 un is ne vöärmålige hansestad. De olde binnenstad steyt up de wearldarvgoodlyste van UNESCO. Et steyt bekend üm de vöäle bouwwarken in art nouveau/jugendstil un 19.-eywske höltene hüse. Riga was Kulturele höyvdstad van Europa in 2014 samen med Umeå in Sweyden. In de stad wör al es ne NAVO-top ehölden (2006), et Eurovisy Leedfestival (2003), et wearldkampioonskap Curling vöär vrouwlüde un et wearldkampioonskap yshockey vöär kearls (2006, 2021 un 2023). In Riga sit et officiäle EU-kantoor vöär Elektroniske Kommunikaty (BEREC).

In 2019 kümmen der 1,4 miljoon butenlandske turisten de stad bekyken. Riga is med et vleegtüüg to bereiken up den Internationalen Lochthaven van Riga, den grötsten un drokst bevlöägenen luchthaven van de Baltiske Ståten. Riga is lid van de Eurocities, de Vereynigde Baltiske Städen (UBS) un de Vereynigde Höyvdstäden van de Europääske Uny.