Sassiese bouwstiel

Vuurbeeld van ne Sassiese boerderieje

De Sassiese bouwstiel is in de architektuur ne wieze van huze en boerderiejen bouwen. t Meest kenmaarkende an Sassiese geböwwe beent de in verhoolding lege muren en de hoge peuntkappe der op. De kappe kan wal 2/3 van de heugte oetmaken.

Sassiese geböwwe beent op etrökken um n ekenhoolten geraamte, wat zowal binnen als boeten in t totaalbeeld terugge is te zeene. Tusken dat geraamte beent de muren met steender dichte messeld, en vrauer wal met leem. De kappe is vake van reet, mer wörd um de kosten vake ook van pannen emaakt. Ook wörd der wal es ne reetne kappe met nen pannenraand der oonderlaanks emaakt.

De veansters beent vake veerkaant en bestoat oet verskeadene kleane ruutjes. Ze köant met luken of eslötten worden. Disse luken beent mangs eskilderd in de kluren van de hearenfemilie woer at t hoes vrauer tau heuren.

Vake zit de vuurdure ook direks an de vuurgiewel, en in de achterdure zit vake ne veerkaante of of-eroonde niejndure, ne grote dubbele dure den't direks op de delle anslot. De vuurgewel is vanof de eerste verdeping vake met heultene plaanken besloan. Mangs stekt dit beskot nog nen halven meter oawer de begoane groond.

Disse bauwstiel is direkt of-eleadt van de middeleewse Sassiese bouwstiel. Daudestieds hadden dee al de lege ziedwaanden en de grote, meesttieds reetne kappe. t Grötste verskil was dat daudestieds de fundering helemoal van hoolt was. Later maakten ze dit van kleai of semeant-achtigen briej, wat op zikzölf wier volget wör duur bakkeies. In de oorsproonkelke heultene geböwwe leawden de leu en de beeste met mekaar in ene kamer. Dau't de bakkeie mear in gebroek köm, wörren der ook verskeadene kamers emaakt.