En poor Wöör to’n Geleit: In’t wohre Leven bün ik Ingo Wölbern, Bojohr 1970 un opwossen in Woonst, en lütt Dörp in’n Landkreis Rodenborg (Wümm) in Neddersassen, Twüschendör hebb ik ’n Tiet in Kiel studeert un dorna in Berlin leeft, wieldat ik in Potsdam mien Dokter in de Eerdphysik maakt heff. To Tiet leef ik in Frankfort an’n Main.
Op Wikipedia geef ik nu överall mien Semp dorto, wo ik glööv, dat ik vun wat Ahnen heff. Un wokeen dat al’n Tiet mitankieken deit, de weet woll ok, woneem min Intressen leegt. Wovun ik ’n düchtig wat weet, dat sind Saken ut de Eerdwetenschoppen, Chemie, Physik un Astronomie, aver ok de Rest vun de Naturwetenschoppen is mi nich so ganz frömd. Un wokeen dorto ’n Fraag hett oder en sünnern Artikel socht, kann mi geern ansnacken...
Wat mi ok intresseert, sünd Saken de mit’n Film, mit Theater un de ganze Schauspeleree to kriegen hebbt. Un de Medizin, de Ruumfohrt un de Landkreis Rodenborg (Wümm) sünd ok Rebeden, wo ik dat een oder annere bidrägen künn, un seker finnt sik noch dat en oder annere mehr, wo ik af un an mol min Nees rinsteken do...
