Patrick Macnee

Patrick Macnee (1998)

Daniel Patrick Macnee (* 6. Februar 1922 in London, Grootbritannien; † 25. Juni 2015 in Rancho Mirage, USA) weer en engelschen Schauspeler, Filmproduzent un Snacker in Höörspelen.

Vun de Tokiekers weer Macnee faken oder fast blots mit de Rull John Steed identifizeert, den he johrelang in de bekannten Feernsehreeg The Avengers (dt.. Mit Schirm, Charme und Melone) speelt hett.

Leven

Macnee weer de Söhn vun Daniel Macnee, de Peerd ünnerichten de – en Drinker, de dat Geld vun de Familie över’n Barg brocht hett. De Vadder güng weg vun sien Familie un Patrick Macnee is bi sien lesbisch Mudder un ehr Partnerin opwussen. Bit to sien ölvten Levensjohr weer he dwungen, en Kilt to dregen, ofschoonst de Familie in Süüdengland leven de. Wiel sien Schooltiet weer Macnee meist vun’t Eton College flagen, wieldat he dor en Kreis vun Glücksspelers optogen harr.

Patrick Macnee weer vun 1942-1956 mit Barbara Douglas verheiraadt, mit de he twee Kinner, Rupert un Jenny, harr. 1965-1969 weer he mit Katherine Woodville verheiraadt un vun 1988 bit to ehrn Dood 2008 mit Baba Majos de Nagyzsenye. Mit sien Kinner ut eerste Eh leev Macnee toletzt in Rancho Mirage un in La Jolla in Süüdkalifornien. 1959 harr he de US-amerikaansche Staatsbörgerschap annahmen.

Wark

Patrick Macnee hett na’n Afsluss vun de School toeerst en Tiet lang as Theaterschauspeler arbeidt un harr 1938 en eerste lütte Filmrull in Pygmalion (1938). He kreeg bi’n Film jüst so recht de Fööt op de Eer, as sien Karriere vun’n Tweeten Weltkrieg ünnerbroken weer. He weer vun de Royal Navy intogen. Na den Krieg besoch Patrick Macnee mit en Stipendium de Webber Douglas School of Dramatic Art in London un künn sien Filmloopbahn wietermaken. Man Macnee weer nich tofreden mit dat Rullenanbott in England un güng as Filmproduzent na Kanada un in de USA. In Kanada gellt he as en Pionier vun’t Feernsehn dor.

1954 is he mit en Theatertruppe vun dat Old-Vic-Theater ut London an’n Broadway un later na Hollywood, wo he in verscheeden Feernseh- un Filmprodukschonen to sehn weer. 1959 is he na England torüchgahn, wo he dör sien Insichten in Amerika Vördeelen harr. 1960 is he Co-Produzent vun de Feernsehreeg Winston Churchill: The Valiant Years worrn.

Kort dorna kreeg he de Rull, de em rud üm de Welt bekannt un beropen maakt hett: John Steed in de Feernsehserie The Avengers, de 1961 anfüng. De eng Verbinnen to sisse Serie hett em aver teemlich to schapen maakt, as 1969 de Serie instellt worrn is, wiel he dorna kuum ne’e Anbotten kregen hett. To sien Glück weer de Serie 1976 ünner den Titel The New Avengers nee opleggt, wo he noch mol as John Steed to sehn weer – man al so en beten in de Johren kamen. (In’n Kinofilm The Avengers, de 1998 in de Kinos keem, weer he mit sien Stimm as „Invisible Jones“ ok wedder dorbi.)

In de 1980er un 1990er Johren weer he to Gast in verscheeden amerikaansch Serien as Gavilan, Empire, Thunder in Paradise un Night Man. Twüschendör hett he ok mehrere Höörböker opnahmen. En gröttere Nevenrull hett he 1985 in den James-Bond-Film A View to a Kill (dt. Im Angesicht des Todes) un noch in wietere Feernsehserien. Sien opstunns letzten Kinofilm hett he 2003 mit The Low Budget Time Machine maakt. Insgesamt hett he in mehr as 130 Film- un Feernsehprodukschonen mitspeelt.

De düütschen Synchroonstimmen vun Patrick Macnee weern ünner annern Gert Günther Hoffmann un Hans Sievers.

Filmrullen (Utwahl)

Johr	Titel	Synchroonsnacker
1938	Pygmalion
1949	The Small Back Room dt.: Experten aus dem Hinterzimmer
1950	The Elusive Pimpernel dt.: Das dunkelrote Siegel
1951	Scrooge dt.: Charles Dickens – Eine Weihnachtsgeschichte	Werner Bruhns
1955	Billy Budd, Feernsehn
1956	The Battle of the River Plate dt.: Panzerschiff Graf Spee	Heinz Piper
1956-58	Kraft Television Theatre, Feernsehfolgen
1957	Les Girls dt.: Die Girls	Siegfried Schürenberg
1959	The Twighlight Zone, Feernsehepisood dt.: Unglaubliche Geschichten	Günter Kieslich
1961-69	The Avengers, Feernsehreeg dt.: Mit Schirm, Charme und Melone	Holger Mahlich Gert Günther Hoffmann Hans-Werner Bussinger
1970	Incense for the Damned
1976-77	The New Avengers, Feernsehreeg dt.: Mit Schirm, Charme und Melone	Gert Günther Hoffmann
1977	Dead of Night, Feernsehn dt.: Mit der Nacht kommt der Tod
1978-79	Battlestar Galactica, Feernsehreg dt.: Kampfstern Galactica	Hans Sievers (Rull) Hans Paetsch (Verteller)
1979	The Fantastic Seven, Feernsehn dt.: Sieben Stuntmänner räumen auf
1980	The Sea Wolves dt.: Die Seewölfe kommen	Joachim Kerzel
1981	The Howling dt.: Das Tier	Gert Günther Hoffmann
1982	Rehearsal for Murder, Feernsehn dt.: Eine Probe für den Mörder	Hans Sievers
1983	The Creature Wasn’t Nice dt.: Trottel im Weltall
1983	Sweet 16 dt.: Sweet Sixteen – Blutiges Inferno	Gernot Duda
1985	A View to a Kill dt.: Im Angesicht des Todes	Gert Günther Hoffmann
1986	Club Med dt.: Crazy Weekend
1989	Masque of the Red Death dt.: Die Maske des roten Todes
1989	Dick Francis: Blood Sport, Feernsehn dt.: Entführt, kein Lösegeld
1989	Sorry, Wrong Number dt.: Mit dem Tod verbunden
1991	Transformations dt.: Alien Transformations	Reinhard Glemnitz
1992	Waxwork II: Lost in Time dt.: Spaceshift – Waxwork 2	Reinhard Glemnitz
1997-98	Night Man, Feernsehfolgen dt.: NightMan	Gerhard Paul
1998	The Avengers dt.: Mit Schirm, Charme und Melone	Hans Teuscher
2003	The Low Budget Time Machine

Utteken

Macnee is 1983 mit den Ehrenpries vun de Golden Kamera uttekent worrn för sien Levenswark in’t Feernsehngewarf. De Academy of Science Fiction, Fantasy and Horror hett em butendem mit de goot ansehn Golden Scroll-Utteken ehrt.

Literatur

• Patrick Macnee: Blind in One Ear: The Avenger Returns (Autobiografie), Mercury House (1992) - ISBN 0916515850

• Patrick Macnee, Dave Rogers: The Avengers And Me (Biografie), Titan Books (2004) - ISBN 1852868015

Websteden

• Patrick Macnee in de Internet Movie Database (engelsch)
• Patrick Macnee sien Websteed (engelsch)