The Avengers (Film)

Filmdaten
Plattdüütsch Titel:	—
Originaltitel:	The Avengers
Düütsch Titel:	Mit Schirm, Charme und Melone
Produkschoonsland:	USA
Johr vun’t Rutkamen:	1998
Läng:	89 Minuten
Originalspraak:	Engelsch
Öllersfreegaav in Düütschland:	FSK 12
Filmkru
Speelbaas:	Jeremiah S. Chechik
Dreihbook:	Don MacPherson
Produkschoon:	Jerry Weintraub Susan Ekins
Musik:	Joel McNeely Laurie Johnson (Thema) Sinéad O'Connor (Summer’s End)
Kamera:	Roger Pratt
Snitt:	Mick Audsley
Dorstellers
Ralph Fiennes: John Steed Uma Thurman: Emma Peel Sean Connery: Sir August de Wynter Fiona Shaw: „Vadder“ Jim Broadbent: „Mudder“ Eileen Atkins: Alice Eddie Izzard: Bailey John Wood: Trubshaw Carmen Ejogo: Brenda Patrick Macnee: Invisible Jones (Stimm)

The Avengers (op Platt so veel as „De Afrekers“, dt. Titel: Mit Schirm, Charme un Melone) is de Titel vun en US-akermaanschen Speelfilm ut dat Johr 1998. De Film grippt dat Motiv vun de fröheren Feernsehreeg The Avengers op. Speelbaas weer Jeremiah S. Chechik, de Hööftrullen hebbt Uma Thurman un Ralph Fiennes speelt.

Inholt

John Steed is en Agent vun’n britischen Geheemdeenst ünner dat Regeer vun „Mudder“ un „Vadder“. Steed kriggt den Opdrag, Kuntakt to de bannig emanzipeerte Wetenschopplersche Emma Peel optonehmen. Tosamen schüllt se de Achtergrünnen rutfinnen, worüm in en Forschungsinstitut inbroken worrn is. De Kameras wiest Dr. Peel as Inbrekersche, man se seggt, dat se nix dormit to doon hett. Peel hett neemlich an een geheem Projekt mitarbeit hatt, bi dat dat üm en Schuulschirm för’t Weder geiht. Dr. Peel kriggt Verlööf, an’t Opkloren vun den Fall mittowirken.

Steed un Peel maakt sik an de Arbeit un söökt Sir August de Wynter op, en schottischen Meteoroloog, de dör snaaksche Ansichten opfallt. Se kamt em ok wohrhaftig op de Spoor, vun wegen dat de Wynter en Apparat boet hett, mit den man dat Weder stüern kann. Dormit will he Geld vun de Weltregeeren foddern. Üm sik hett he en Reeg vun Mackers, de em bi sien Plaan helpen doot. As in London en Weltministerdrapen afhollen warrt, beleggt he de Stadt mit Sneestörm un verlangt 10 % vun’t Bruttosozialprodukt för beter’t Weder.

Dat stellt sik rut, dat Mrs. Peel en Dubbelgängersche hett, de ehr Deensten an de Bösen verköfft. Bi jemehr Ünnersöken kamt Steed un Peel in jümmer ne’e Gefohren. De echte Peel warrt vun ehr Double un vun „Vadder“, de mit de Wynter gemeensome Saak maakt, roovt. In en Ballon wüllt se ehr wegbringen, den se aver to’n Explodeeren bringen kann. „Vadder“ un dat Double kamt dorbi üm, man de echte Peel kann vörher in’n Snee afspringen un warrt vun Steed funnen. Üm ruttofinnen, wat dat de richtige oder de verkehrte Peel is, gifft he ehr ’n Söten.

Steed un Peel künnt opletzt in dat Kontrollzentrum för de Wynter sien Wedermaschien instiegen, dat sik in London befinnt. Se maakt de Maschien tonichten, un künnt de Wynter un sien rechte Hand utschalten. Tosamen mit „Mudder“ fiert se an’t Enn jemehrn Spood.

Kritik

• Lexikon vun’n internatschonalen Film: „Ein trotz der akzeptablen Besetzung der Hauptrollen fehlinszenierter Film, dem es für eine Satire an Leichtigkeit, für einen Actionfilm an Einfällen mangelt.“
• Prisma Online: „Die Neuauflage der beliebten TV-Serie aus den Sechzigerjahren von Jeremiah S. Chechik ist ein echtes Unikum: Das holprige Werk war so peinlich, dass die drei Hauptdarsteller sich bei der Weltpremiere in London gar nicht erst blicken ließen. Immerhin ist Patrick Macnee, Seriendarsteller des John Steed, als "unsichtbarer Jones" dabei.“
• Patrick Macnee in’n TV Guide: „Es war ein furchtbarer Flop. Gott sei Dank!“,
• Matt Roush in’n TV Guide: „Es mag das schlechteste Remake einer Fernsehvorlage sein, das je gedreht wurde“
• Stephen Hunter in de Washington Post: „Dies ist ein Film in dem, stolz und siegessicher, nichts funktioniert. […] Er blamiert jeden, der damit zu tun hatte.“

Utteken

De Film weer in’t Johr 1999 in negen Kategorien för de Goldene Himbeer nomineert wesen. Uttekent worrn is he mit een dorvun in de Kategorie Slechst Remake. Butendem weer he vörslahn för den Golden Reel Award in de Kategorie Best Toonsnitt.

Anners wat

• De Film is bi Opföhren to Proov slecht opnahmen worrn. Dorna weer he bannig op sien hüütige Läng tosamenkört. Vele vun de Logikfehlers in’n Film sünd eerst dör dat Snieden tostannen kamen.
• De Rahmengeschicht vun’n Film is an de Episood A Surfeit of H₂O anlehnt, man ok op annere Episoden warrt anspeelt, as to’n Bispeel op de Episood Target ut The New Avengers (Vörspann) oder op de Episood The House That Jack Built (dat in sik slaten Huus).
• De oorsprüngliche John Steed, Patrick Macnee, hett in den Film en Cameo-Optritt as de „unsichtbore Jones“, den sien Stimm he snackt hett. Diana Rigg, as de oorsprüngliche Emma Peel is de Rull vun de Alice anboden worrn. Se hett aver aflehnt.
• De Produkschoon vun den Film warrt op ruchweg 60 Millionen US-Dollar schätzt. In de USA hett he aver blots 23,3 Millionen US-Dollar inspeelt. Dorto kemen üm un bi 25,2 Millionen ut annere Länner.

Weblenken

• The Avengers in de Internet Movie Database (engelsch)
• Kritiken to’n Film op Rotten Tomatoes
• Rezension op „The Avengers Forever“