Bloodgift
En Bloodgift oder Hämotoxin (vun hämo „Blood“ un toxin „Gift“) is en Stoff, de dör sien cheemsch Egenschoppen dat Blood, dat Bloodstollen oder dat Bloodbilln so verännert, dat de Transport- un Stoffwesselfunkschonen vun’t Blood minnert oder vullstännig hinnert warrt. Bedropen sünd dorvun vör allen de Roden Bloodkörpers un dat Knakenmark, wat to’n Schaden an’n Bloodkreisloop bit hen to’n Kreisloopkollaps föhren kann
En bekannt Bispeel för en Bloodgift is Kohlenstoffmonoxid (CO). Dor sien Egenschoop, sik faster an’t Hämoglobin to binnen as Suerstoff, warrt dör dat Gas de Versorgen vun de Zellen mit Suerstoff över’t Blood minnert. Anners as bi’t Zellgift – dorto höört ünner annern eenige Slangengiften, Benzol oder Dioxinen – warrt dör dat Bloodgift de Zellen nich sülvst angrepen, man de Schaden warrt dör Ünnerversorgen vun Suerstoff oder Nehrstoffen veroorsaakt.
En Nervengift wirkt dorgegen schaadhaft op dat Nervensystem. Dorto höört eenige Drogen aver ok Pielgiften as Curare oder Bufotenin.