Brabants

Brabants is en nedderlannschen Dialekt, de in Noord-Brabant un in de belgischen Provinzen Antwerpen un Fläämsch-Brabant snackt ward. In’n Noordwesten vun Brabant üm Willemstad ümto ward Hollandsch sproken. Traditschonell warrt dat Südgeldersche as en anner Dialekt ansehn.

Brabants warrt nich as ene Minnerheitenspraak gellen laten.

De drüdde Deel vun de Lü in de Benelux-Länner, de Nedderlannsch snacken doot, leevt in’t Rebeet vun’t Brabants. In grote nedderlannsche Steder, to’n Bispeel Breda un Eindhoven, wo vele Hollänners leevt, warrt Brabants nich veel spraken. In Tilburg un ’s-Hertogenbosch gifft dat avers vele Lü, de Brabants snackt. In Belgien warrt Brabants vun mehr Lü snackt. In Brüssel warrt Brabants vun nich vele Lü snackt, ofschoonst Brabants in Brüssel in vele kulturellen Aktivitäten bruukt warrt un dor enen hogen Status hett. Brabants weer in’t Middelöller en Deel vun’t Dietsche, wat ene nedderfranksche Dialektgrupp weer.