Fellatio

Fellatio (Teeknung)

De Fellatio (lat. fellare „sugen“) is en Form vun den Oralsex. Dor warrt de Pint dör den Sexualpartner sien Mund, Tunge un Lippen bi tarrt. Bi dat so nömmte Deepthroating kann de Tarreree ok dör de Strott tostannekamen. Bi de Fellatio kann an den Pint lutscht, blasen un suugt weern. In de mediziensche Spraken warrt se ok Coitus per Os („Inföhren vun den Pint in den Mund“) nömmt. In de Umgangsspraak heet se unner annern „een blasen“, dat „up franzöösch maken“ oder warrt mit en Utdruck, de ut dat amerikaansche Engelsch kummt, „Blowjob“ nömmt. Wenn de Geslechtsorgane vun en Fro tarrt weert, warrt nich vun Fellatio, man vun Cunnilingus snackt.

Tosamenhang

Faken warrt Fellatio bi dat Vörspeel utöövt, vunwegen datt dor de Lust mit anprickelt weern kann, oder wenn en Erektschoon tostanne brocht weern schall. Se is ok en Form vun dat Petting, wenn utprobeert warrt, wat sexuell mööglich is.

Fellatio mank de Deerter

Fellatio bi de Paarung vun Fleeghunnen

Fellatio is ok bi annere Aarden mank de Primaten bekannt. Sunnerlich bi Bonobos is se sehn wurrn, man dor warrt se mank junge Mannslüde utöövt. Nich bloß mank Primaten kummt Fellatio vor. Se is up jeden Fall beschreven wurrn bi de Paarung vun en Fleeghunnen-Aart (Cynopterus sphinx).

Risiko

Fellatio is en Form vun Sexualkontakt. Dor besteiht dat Risiko bi, datt Geslechtskrankheiten over dragen weert. En Ejakulatschoon in den Mund bedutt en Risiko for de Infektschoon mit HIV un de klassischen Geslechtskrankheiten, as Syphilis un Gonorrhoe, sunnerlich for den Partner, den sien Mund bedrapen is (sunnerlich, wenn dat Fleesch an’n Böhn verwunnt wurrn is) De düütsche AIDS-Hilfe oder de Bundeszentrale für gesundheitliche Aufklärung slaht vör, sik bi Sexualkontakten an bestimmte Safer Sex-Regeln to holen. So kann dat Risiko vun en Infektschoon afminnert weern. To de Präventschoon gegen HIV warrt vorslahn, en Kondom to bruken oder anners dor for to sorgen, datt keen Sperma in den Mund kummt. Dat Risiko for en Infektschoon dör Präejakulat oder Spee warrt as man minne ankeken. Bi de wecken Studien is rutkamen, datt en Tosamenhang besteiht twuschen Oralsex un Halskrebs. Annahmen warrt, dat kummt vun Humane Papillomviren. Dat sünd Viren de dor meist achter steken doot, wenn Boormudderhalskrebs utbreken deit. In tahlrieke Studien sünd düsse Viren ok in Geweev vun Halskrebs funnen wurrn. Dat warrt annahmen, datt Minschen mit een bit fiev (orale) Sexpartners in’t Leven en dubbelt Risiko vun Halskrebs dreegt, gegen de over, de nie nich Oralsex maakt harrn. Un Lüde mit mehr as fiev Oralsexpartners dreegt dor en 250 % höger Risiko.

Kiek ok bi

• Negenunsesstig

Literatur

• Vern L. Bullough, Bonnie Bullough: Human Sexuality: An Encyclopedia, Taylor & Francis, 1994, Seiten 426 bis 429, ISBN 0-8240-7972-8
• Julius Rosenbaum: Geschichte der Lustseuche im Altertume nebst ausführlichen Untersuchungen über den Venus- und Phalluskultus, Bordelle, Νοῦσος θήλεια der Skythen, Paederastie und andere geschlechtliche Ausschweifungen der Alten als Beiträge zur richtigen Erklärung ihrer Schriften dargestellt. 7. Uplage, H. Barsdorf, Berlin 1904, S. 204–220 (Das Irrumare und Fellare) und 220–232 (Krankheiten des Fellator).

Weblenken

Fellatio. Mehr Biller, Videos oder Audiodateien to’t Thema gifft dat bi Wikimedia Commons.

• Oralsex und Infektionsrisiko