Garrett Erin Reisman

Offiziell NASA-Foto

Garrett Erin Reisman (* 10. Februar 1968 in Morristown, New Jersey, USA) is en ehmalger US-amerikaansch Astronaut.

Utbillen

Reisman hett 1986 de Parsippany High School in New Jersey afslooten. Ansluutend hett he an de University of Pennsylvania Wertschap un Maschinenbau studeert. In beid Fackrichten hett he 1991 en Bachelor-Afsluss maakt. Dornah is he an dat California Institute of Technology wesselt, wo he sien Maschinenbaustudium fortsetten dee. Dat Studium hett he 1992 mit en Master un 1997 mit en Doktertitel afslooten.

Astronautentätigkeit

In' Juni 1998 wurr Reismann as Astronautenkandidat vun de NASA utwählt. Nah de Utbillen is he denn för de Langtietbesatten ISS-Expeditschon 16 to de Internatschonale Ruumstatschoon indeelt wurrn.

NEEMO 5

In' Juni 2003 weer Reisman as Aquanaut bi de NEEMO-5-Mission in dat Aquarius Ünnerwaterlaboratorium un hett dor ünner annern gemeensam mit Peggy Annette Whitson und Clayton Conrad Anderson 14 Daag lang arbeit.

ISS-Expeditschoon 16

An' 11. März 2008 is he mit STS-123 to de Internatschonale Ruumstatschoon ünner dat Kommando vun Dominic Gorie flagen, de en Deel vun dat japaansch Kibō-Modul un de kanaadsch Roboterhand Dextre to de ISS brocht hett. Pilot bi disse Mission weer Gregory Harold Johnson. Dorto keemen de Missionsspezialisten Robert Behnken, Michael Foreman, Richard Linnehan un de Japaner Takao Doi. Nah de Kopplung hett he Léopold Eyharts as tweeten Floogingenieur vun de 16. Langtietbesatten aflööst. An Bord vun de ISS hett he denn gemeensam mit Peggy Whitson un Juri Iwanowitsch Malentschenko arbeit. Mit Ankunft vun de STS-124-Mission an' 2. Juni 2008 övernehm sluutend sien US-Kolleeg Gregory Chamitoff de Upgaav vun den tweeten Floogingeneiur up de ISS, so dat he an' 14. Juni 2008 mit de Crew (Kommandant: Mark Kelly, Pilot Kenneth Todd Ham un de Missionsspezialisten Karen Nyberg, Ronald Garan, Michael Fossum un de Japaner Akihiko Hoshide) weer seker to de Eer torüchkehren kunn.

STS-132

An' 6. Mai 2009 wurr Reisman as Missionsspezialist för de Mission STS-132 ünner dat Kommando vun Kenneth Todd Ham nomineert. Dat weer de vörletzte Floog vun de Ruumfähre Atlantis. De Start weer an' 14. Mai 2010. Reisman führ wiels disse Mission, de ok weer to de ISS führen (mit de Crew Alexander Alexandrowitsch Skworzow, Tracy Ellen Caldwell-Dyson un Michail Borissowitsch Kornijenko twee Butenbordinsätze dör: en an' 17. Mai mit Stephen Bowen, den annern an 21. Mai mit Michael Timothy Good. De anner Liddmaaten vun de Crew weern Pilot Tony Antonelli un de Missionsspezialist Piers John Sellers.

In' März 2011 is he ut dat Astronautenkorps utscheeden. Insgesamt hett he 107 Daag un 3 Stünnen in' Weltruum verbrocht.

Nah de NASA

Nahdem he bi de NASA utscheeden is, is Reisman to dat US-Ruumfohrtünnernehmen SpaceX. wesselt. He arbeit dor doran, de Rakeet Falcon 9 un dat Ruumschipp Dragon seker noog för bemannte Insätze to gestalten.

Weblenken

Garrett Reisman. Mehr Biller, Videos oder Audiodateien to’t Thema gifft dat bi Wikimedia Commons.

• NASA: Biografie (engelsch)
• spacefacts.de: Körtbiographie