Glogau
| Głogów/Glogau | |
|
|
| Daten | |
|---|---|
| Staat: | Polen |
| Woiwodschop: | Nedderslesien |
| Landkreis: | Głogowski |
| Inwahners: | 69.366 (31. Dezember 2004) |
| Flach: | 35,0 km² |
| Hööch: | ? m ü. NN |
| Postleettall: | 67-200 bet 67-210 |
| Telefonvörwahl: | (+48) 76 |
| Geograafsche Laag: | 51° 40′ N, 16° 5′ O |
| Kennteken: | DGL |
| Stadtverwalten | |
| Börgermeester: | Zbigniew Rybka (2004) |
| Adress: | Rynek 10 67-200 Głogów |
| Websteed: | www.glogow.pl |
Glogau oder op Poolsch Głogów [ˈgwɔguf] is ene poolsche Stadt in de Woiwodschop Nedderslesien. Se liggt in'n Westen vun Polen so wat 80 km noordwesten vun de neddersleesche Hööftstadt Breslau an de Oder. In'n Tweten Weltkrieg wörr de Oort binah vullstännig in Schutt un Asch leggt.
Historie
[ännern | Bornkood ännern]
In't Johr 1010 wörr Glogau as urbs Glogua bi Thietmar von Merseburg dat eerste Maal in en Oorkunn nöömt. 150 Johren later (1157) leet de Hertog vun Slesien de Stadt in Brand setten. He glööv, dat he se nich gegen Barbarossa verdedigen kunn. 1253 kreeg Glogau Stadtrecht. De Stadt harr denn mehr as 2.000 Inwahners.
Vun 1499 bet 1506 regeer de latere poolsche König Sigismund I. de Stadt un ok dat Hertogdom Glogau; in de Stadt wörrn nu ok egene Münten (Glogauer Groschen) präägt. 1630 wörr de Bo vun Befestigungen anfungen; de Inwahnertall weer dör dat Zerstören vun de Vörstäder dör den Dörtigjohrigen Krieg vun üm un bi 20.000 bet 24.000 op so wat 7.000 rünnergahn. 1632 hebbt de Protestanten de Stadt innahmen, 1633 füll de Stadt wedder an de Gegenreformatschoon. To'n Sluss weer se 1642 bi de Sweden.
1741 hebbt de Preußen denn de Stadt innahmen. Na de Slacht vun Jena 1806 keem se to de Franzosen. Üm de Stadt wedder trüch to kriegen, wörr de Stadt binah een Johr lang vun 1813 bet 1814 belagert. De Festung Glogau, de vun so wat 9.000 franzöösche Soldaten besett weer, kapituleer to'n Sluss na ene Blockaad vun söven Maanden. De Rest vun 1.800 Verdediger ünner General Laplane geev an'n 10. April 1814 op.
Siet den 1. April 1920 weer de vörher kreisangehörige Stadtgemeen Glogau denn en Stadtkreis. Dormit weer de fröhere Kreis Glogau denn en Landkreis. De Landraad för den Landkreis Glogau harr noch jümmer sien Seet in de Stadt. An'n 1. Juli 1931 kemen Delen vun de Gemenen Brostau, Lerchenberg, Rauschwitz, Weidisch, Zarkau un Zerbau ut den Landkreis Glogau to de Stadt. An'n 31. März 1938 kemen nochmal Delen vun de Gemenen Brostau, Rauschwitz un Zarkau an Glogau. In't Johr 1939 harr de Stadt Glogau denn 33.558 Inwahners, de Landkreis Glogau 62.280 Einwohner. Bet 1945 höör Glogau den Regerensbezirk Liegnitz in de Provinz Nedderslesien vun dat Land Preußen to.
Korte Tiet vör dat Enn vun'n Tweten Weltkrieg wörr Glogau to en Festung maakt, so dat de Rode Armee se söss Weken belagern dei. Dorbi güngen mehr as 90 % vun alle Hüüs twee, de hele Ooltstadt leeg in Trümmer. 1945 keem Glogau an Polen, de Düütschen mussen all na Düütschland, dat nu an de Oder toenn weer. Dat poolsche Głogów weer in de Randbezirken vun de ole Stadt nee boot, de Ruinen vun de Ooltstadt wörrn nich wedder opboot. De Ruinen vun de Nikolauskark bleven as Mahnmaal stahn, de Corpus-Christi-Kark un dat Slott wörrn restaureert, de evangeelsche Kark Zum Schifflein Christi un dat Raathuus afreten. En Opswung verleev de Stadt eerst as se 1967 ene Kopperhütt boen dein, de noch hüüt de gröttste Industriebedrief in de Stadt is. Bet in de 1980er Johren bleev dat ole Stadtzentrum unbeboot. Hüüt warrt de olen Börgerhüüs ok hier wedder op ole Fundamenten opboot.
Partnerschaften mit annere Städer
[ännern | Bornkood ännern]
- Amber Valley (Grootbritannien)
- Iesenhüttenstadt (Düütschland)
- Laholm (Sweden)
- Langenhagen (Düütschland)
- Middelburg (Nedderlannen)
- Kamjanez-Podilskyj (Ukraine)
- Riesa (Düütschland)
Bekannte Glogauer
[ännern | Bornkood ännern]- Heinrich I. der Bärtige, Seniorhertog vun Polen
- 1616, 2. Oktober, Andreas Gryphius, † 16. Juli 1664 in Glogau, Dichter
- 1821, 27. Februar, Paulus Stephanus Cassel, † 23. Dezember 1892 in Friedenau bi Berlin, Journalist, Theoloog un Schriever
- 1845, 3. Juni, Arthur von Posadowsky-Wehner, † 23. Oktober 1932 in Naumborg, düütsch Politiker (Freekonservative Partei, DNVP), MdR, Viezkanzler vun't Düütsche Kaiserriek, Fraktschoonsvörsitter vun de DNVP in de Weimarer Natschonalversammlung
- 1887, 10. November, Arnold Zweig, † 26. November 1968, in Berlin (Ost), Schriever
- 1905, 27. Dezember, Paul Krause, † 19. Oktober 1950, Politiker (Zentrum), MdB
- Johannes von Glogau
- David Cassel
Weblenken
[ännern | Bornkood ännern]
- Offizielle Seite der Stadt (poolsch)
- Festung Glogau (poolsch)
- Seite der Stadt Glogau - Gross Glogau (poolsch)