Heinrich Lübke
Heinrich Lübke (in siene Heimaat Schaumäkers Heini nöömt[1]; * 14. Oktober 1894 in Enkhausen/Arensperg; † 6. April 1972 in Bonn) weer en düütschen Politiker (CDU). He weer vun 1. Juli 1959 af an bet 1969 as Bunnspräsident Staatshööft vun de Bunnsrepubliek Düütschland.
Lübke is 1894 in Enkhausen in’t Siuerland boren. Sien Vader is Schomaker wesen un Lübke hett dorvun Schaumäkers Heini heten. Na sien Abitur fung Heinrich Lübke en Studium an de Landweertschapliche Akademie in Bonn an. Van 1914 bit 1918 muss he dat unnerbreken, wiel he an den Eersten Weltkrieg deelnehm. 1921 sloot he dat Studium mit dat Examen as Vermetens- un Kulturingenieur af un studeer bit 1924 Natschonaalökonomie in Mönster un Berlin. Van 1924 bit 1933 weer he Geschäftsführer bi de „Düütsche Buurnschap“ un de „Siedlungssellschap Buurnland“. 1933 muss he up Druck van de Natschonaalsozialisten de Ämter upgeven. 1934 wurr Lübke van de Nazis fastnahmen un eerst na annerthalv Jahren wedder freelaten. He weer arbeitslos un harr Unnenkumst bi sienen Broder Friedrich Wilhelm up enen Hoff bi Flensborg. Van 1937 bit 1947 weer he in verschedene Bo- un Siedlungsbüros anstellt.
Al 1946 wurr he Mitglied van den westfälschen Landdag, den de Militärregeren inricht harr, un 1947 Afornten van den Landdag Noordrhien-Westfalen. Van 1949 bit 1950 un wedder van 1953 bit 1959 weer he Bunnsdagsafornten in Bonn. Na de Bunnsdagswahl 1953 wurr he as Bunnsminister för Nähren, Landweertschap un Forsten beropen. Van 1959 bit 1969 weer he de Bunnspräsident van de Bunnsrepublik Düütschland. Wat Heinrich Lübke in siene Reden de Lüüd to seggen harr, kunn jedereen goot verstahn. Dat he sik darbi ok af un to verspreken de, nehmen em de mehrsten nich övel, aver de Journalisten schreven daröver in ehre Artikels mit utverschaamten Spott un vergeten darbi, siene goden Sieten heruttostrieken.
Heinrich Lübke treed 1969, dree Maanden vör dat Enn van siene Amtstiet torüch. Na sienen Doot wurr he an’n 13. April 1972 in den Plenarsaal van’n Bunnsdag in Bonn in enen Staatsakt ehrt.
Footnoten
[ännern | Bornkood ännern]
Karl Arnold (komm.) | Theodor Heuss | Heinrich Lübke | Gustav Heinemann | Walter Scheel | Karl Carstens | Richard von Weizsäcker | Roman Herzog | Johannes Rau | Horst Köhler | Jens Böhrnsen (komm.) | Chrischan Wulff | Horst Seehofer (komm.) | Joachim Gauck | Frank-Walter Steinmeier