Koodwessel

Koodwessel (engelsch Code Switching, ok Spraakwessel) is en Utdruck ut de Spraakwetenschop för dat Wesseln vun de Spraak (oder Dialektform, Spraakregister) merrnmang in en Gespreek oder sogor enen Satz. Dat kann vörkamen, wenn de Person, de snackt, mehr as ene Spraak kann (un dat Gegenöver de ok verstaht).

Bestimmte Gedanken köönt in welk Spraakformen beter utdrückt warrn. Dat kann an de Spraakkompetenz vun de Person liggen, de snackt, oder an de Spraak sülvst. En Bispeel is dat Plattdüütsche, dat keen allgemeen Fachvokabular to Reekner- un Internett-Themen hett. Wenn nu Lüüd, de sünst jümmer Plattdüütsch snackt, op mal över Reeknerkraam snacken wüllt, denn wesselt se na dat Hoochdüütsche. De Koodwessel kummt mehrst dor vör, wo Lüüd in ene Sellschop vun Lüüd mit en annere Spraak leevt, un dorbi vulle Mehrsprakigheit entwickelt hebbt.