Masatoshi Koshiba
Masatoshi Koshiba (japaansch: 小柴 昌俊}}, Koshiba Masatoshi; * 19. September 1926 in Toyohashi, Aichi, Japan; † 12. November 2020) weer en japaansch Physiker, de 2002 mit den Nobelpries för Physik „för bahnbreekend Arbeiten in de Astrophysik, insbesünnere för den Nahwies vun kosmisch Neutrinos“ uttekent wurr.
Leven
[ännern | Bornkood ännern]Koshiba hett an de Universität Tokio studeert. Nah den Afsluss 1951 fung he in Tokio mit sien Dokterarbeit an un is 1953 an de University of Rochester in Rochester, New York wesselt. 1955 kreeg he den Doktertitel (Ph.D.) för sien Arbeit över ultrahochenergetische Phänomene vun de Kosmische Strahlung.
Koshiba wurr in‘ März 1970 to’n Perfesser an de Universität Tokio nömmt. Nah en Gastsemester an de Universität Hamborg 1987 is he an de Tōkai-Universität wesselt.
Wirken
[ännern | Bornkood ännern]Koshiba hett sück in de 1950er- un 60er-Johren mit de hochenergetischen Kosmisch Strahlung un de de dordör utlööst Wesselwirkungen in de bövere Atmosphäär befaat. Dat führ hüm in de 1970er-Johren to de Myonen- un Neutrinophysik as ok to de Deelkenphysik sülvst. Nah en Bedeeligen an JADE, en düütsch-japaansch Tosommenarbeit bi DESY in Hamborg, hett he den Kamiokande-Detektor to Nahwies vun de vun eenig Theorien postuleerten Protonenzerfalls konzipeert. Wiel disse Nahwies aber nich mögelk weer, hett he den Detektor to en Neutrinodetektor umbaut un kunn 1987 eerstmals kosmische Neutrinos nahwiesen: In den Verloop vun de Supernova 1987A kunnen in den Kamiokande-Detektor 12 Neutrinos nahwiest wurrn, dorvan 9 binnerhalv vun de eerst 2 Sekunnen. Dat weer de eerste direkte experimentelle Bestätigung vun de Theorien över de Perzesse bi den Kollaps vun een Steern, insbeünnere de Neutrinokühlung.
2002 wurr hüm tosommen mit Raymond Davis junior de Hälft vun den Nobelpries för Physik tospraaken, de anner Hälft gung an Riccardo Giacconi.
Utteknungen
[ännern | Bornkood ännern]- 1985 Groot Bundsverdeenstkrüüz vun de Bundsrepubliek Düütschland
- 1987 Nishina-Pries vun de Nishina Foundation
- 1987 Asahi-Pries stellvertreedend för dat Kamioka Neutrino Observatory
- 1988 Ernennung to’n Bunka Kōrōsha, to Person mit besünner kulturellen Verdeensten
- 1989 Academy Award vun de Japaansch Akademie vun de Wetenschapen
- 1989 Bruno-Rossi-Pries vun de Amerikaansch Physikalisch Sellschopp
- 1996 Spezialpries vun de Europääsch Physikalisch Sellschopp
- 1997 Humboldt-Forschungspries vun de Alexander von Humboldt-Stiftung
- 1997 Fujiwara-Pries vun de Fujiwara Science Foundation
- 1997 Kulturorden vun de japaansch Regeeren
- 1999 Diploma di Perfezionamento honoris causa in Fisica vu den Scuola Normale Superiole, Pisa
- 1999 Ehrendokterwürde vun de Universität Hamborg
- 2000 Rochester's Distinguished Scholar Award vun de University of Rochester
- 2000 Wolf-Pries vun de Wolf Foundation vun den israeelschen Präsidenten
- 2002 Panofsky-Pries (gemeensam mit Takaaki Kajita un Yoji Totsuka) un Fellow vun de American Physical Society
- 2002 Nobelpries för Physiks
- 2002 Liddmaat vun de Japaansch Akademie vun de Wetenschapen
- 2003 Benjamin-Franklin-Medaille
- 2003 Utwärtig Liddmaat vun de Russisch Akademie vun de Wetenschapen
