Pixies

De Pixies sünd en Independent-Band ut Boston (Vereenigte Staten vun Amerika). Liddmaten sünd Black Francis (egentlich Charles Michael Kittridge Thompson IV), later solo as Frank Black, Joey Santiago un David Lovering.

Geschicht

1985–1993

De Pixies worrn 1986 grünnt, nadem dat sik Black Francis un Joey Santiago an de University of Massachusetts in Boston kennenlehrt harrn un tosamen beslaten harrn, en Band to grünnen. Dörch en Annonce (söcht weer en Bassist, de sowoll op de Hardcore-Punk-Band Hüsker Dü as ok op de Folk-Grupp Peter, Paul and Mary stahn schull) sloten sik de Bassistin Kim Deal un de Drummer Dave Lovering an. Bi en Konzert in'n Vörprogramm vun de Throwing Muses fullen se ehr tokamen Manager Gary Smith op, de mit jüm en Demo-Band mit söventeihn Stücken produzeren dee (The Purple Tape).

Düt Demo-Band keem ok in de Hannen vun de Plattenfirma 4AD, wat jüm dorop ünner Verdrag nehmen dee. Ut acht Stücken vun'n Demo keem 1987 de eerste Apenbormaken vun de Pixies, de EP Come on Pilgrim. In't Johr 1988 keem dat eerste Album vun de Band, Surfer Rosa, produzeert vun Steve Albini. Surfer Rosa höllt den hüüt seker beröhmtsten Song vun de Band, Where Is My Mind?, un gellt mit Rüchblick as een vun de wichtigsten Rockplatten vun de 1980er. Beid Alben worrn bi neegste Apenbormaken op en CD tohoopfaat.

1989 verscheen dat Album Doolittle, wat en weniger rauhen Sound harr as sien Vörgänger un en relativ groten Spood harr. Mit sien Singles Here Comes Your Man un Monkey Gone To Heaven kreeg de Band ehr eersten Top-10-Hits in Grootbritannien. Na Doolittle begunnen dochens ok vermehrte Solo-Aktivitäten vun de Bandliddmaten. Black Francis speel Solokonzerten un Kim Deal grünn mit Tanya Donelly vun de Throwing Muses de Band The Breeders. Dat geev vermehrt Konflikten vunwegen den nu ümmer grötteren Infloot vun Francis op dat Songwriting. He möök den Song Wave Of Mutilation för den Film Pump Up The Volume apenbor.

Dat neegste Pixies-Album ut dat Johr 1990, Bossanova, worr kumplett vun Black Francis schreven. De Konflikten in de Band wussen stüttig, un nadem dat 1991 Trompe Le Monde apenbor worrn weer, möök de Band in'n Ansluss an en opwrievern Tournee as Vörgrupp för U2 en tietlich unbegrenzte Paus, wieldes welke de jewieligen Soloprojekten in'n Vörgrund stahn schullen.

1993 verkloor Black Francis dann ahn to weten, wat de anneren Bandliddmaten dorvun funnen, in en Interview dat Enn vun de Pixies. Later schull he wedderhaalt ütern, dat düsse Entscheidung en Fehler west weer, wieldat genau as de Pixies vöreerst vun de Bühn verdwenen, begunn de Hoochtiet vun'n Grunge – also vun en Musikstil, för wat de Pixies en wichtigen Wegbereider weren, un vun welk sien Spood se avers nich profiteren kunnen.

Na dat Afsplieten

Na de Oplösen folgen noch veer Platten mit deelwies noch nich apenbormaakte, dochens nich nee produzeerte Songs. Liekers düsse geringe Antall an apenbormaakt Material harrn de Pixies en langduerlichen Infloot op de Musikszene vun de domalige Tiet. De britsche Musiktietschrift NME harr dat Pixies-Album to't tweetbeste Album överhaupt kasen.

Black Francis speel na dat Afsplieten solo as Frank Black un mit de Catholics. Kim Deal kunzentreerte sik op ehr beid Bands Breeders un The Amps. David Lovering speel en korte Tiet bi Cracker, dann as Wicker un Töverer ünner den Naam The Scientific Phenomenalist. Joey Santiago produzeer Musik för Film un Feernsehn un speel wiederhen in sien Band The Martinis, wat he mit sien Fro Linda Mallari 1993 grünnen dee.

Wedderverenigen

In't Johr 2003 sloten sik de Pixies wedder tohoop un begunnen in'n April 2004 to touren. De US-Konzerten weren wietgahn utverköfft un dat, liekers de Band siet twölf Johren keen Platten mehr apenbormaakt harrn. Butendem pädden se in'n Sommer 2004 bi mehrere europääsche Festivals op. Düsse Spood weer ok dorvun weert to bemarken, wieldat de Musikers do noch nich proovt harrn un dat överto noch eenmal to Konflikten in de Band keem. So schull sik Drummer Lovering weigert hebben, sien Alkoholkonsum to minnern. In'n Juni 2004 möök de Pixies exklusiv över iTunes den Song Bam Thwok apenbor.

An'n 14. Juni 2013 geev de Band över ehr Facebook-Siet bekannt, dat Kim Deal de Pixies verlaten harr. Se worr op't Eerste dörch Kim Shattuck vertreden, ehr dat Paz Lenchantin an ehr Stell treden dee.

An'n 28. Juni 2013 verscheen de Single Bagboy. Twüschen September 2013 un März 2014 möök de Band nee Material apenbor op de dree Platten EP1, EP2 un EP3. De Tracks vun de dree EPs worrn in'n April 2014 op dat Album Indie Cindy tohoop apenbormaakt.