Mamulö'ö Evolusi

'''Evolusi''' no fa'alua wa'atebulö fefu zauri ba gulidanö si no ahou sibai wa'aluania irege tenga ngaotu ba hiza ngahö-ngahönö fakhe wa'ara. Ba mböröta me ibörötaigö wangoguna'ö wehede andre [[Charles Darwin]], ''proses'' andre lafotöi na sa ''teori'', andrö asese laŵa'ö ia ''teori evolusi''. Ba hiza ma'ökhö no oya sa'ae nifotöi ''bukti ilmiah'' he ba mbolo [[biologi]], [[antropologi]], [[geografi]], btn. irege no tobali ia tenga ha teori sa'ae.

No ara la'osisi'ö ira ere [[biologi]] hadia ia nifotöi ''biologi evolusioner''. Ba hiza awena tebörögö teboka wangera-ngera niha me isura mbukunia [[Charles Darwin]] sotöi [[On the Origin of Species]] niraka me ndröfi 1859.

== Börötania ==

Teori evolusi no sambua lala wangera-ngera nifa'anö [[Charles Darwin]], samösa sangosili [[geologi]] ba [[biologi]] (sangosili fefu zauri ba gulidanö). Iŵa'ö Darwin wa fefu zauri ba gulidanö iada'a töra-töra gaurifö no tumbu moroi ba zaliŵa-liŵa tanöbö'ö nifotöi ''furugö gaurifö fefu'' ([[li Inggris]]: ''common ancestor'').<ref>[[Charles Darwin|Darwin, Charles]], 1809-1882. (2006). ''[[On the Origin of Species|On the origin of species by means of natural selection, or, The preservation of favoured races in the struggle for life]]''. Dover Publications. ISBN&nbsp;9780486450063. OCLC&nbsp;62857845. n. 102</ref>

Heŵa'ae lö niŵaö Darwin wa niha no manumbu moroi ba mba'e, aefa tohare zurania [[On the Origin of Species|''On The Origin Of Species'']] labörögö niha wanguma'ö wa si lötolalö'ö aekhu ita ba wanguma'ö wa niha no manumbu moroi ba mba'e, na la'o'ö mbua wangera-ngera nisura Darwin andrö.

Ba hiza sindruhunia tenga da'ö niŵa'ö Darwin. Tola manö wa so na sa zaliŵa-liŵa ba danö tanöbö'ö, ba moroi ba da'ö mangali mba'e ba niha. Fefu zaliŵa-liŵa ba danö no oi fakhai hulö döla geu ba ndraha-ndrahania. Fefu ndraha tumbu moroi ba döla geu. Moroi ba ndraha segebua tumbu ndraha-ndraha sigide-ide.

Aefa da'ö molo'ö Darwin haniha zabölö da'ö zofozu, tenga ba wa'abölö mboto (ma laŵa'ö ba khöda, haniha zabölö tesu da'ö zanau gölö) ba hiza ba wa'onekhe. Heŵa'ae mo'amböta samösa gurifö ma niha ba wa'abölö mboto, na onekhe-nekhe ia tola mofozu ia. Da'ö nifotöi ''positive eugenics'' ba li Inggris.

Eluahania fefu zaliŵa-liŵa ba danö ni'ilada ma'ökhö tola mofozu ira börö wa'onekhera. Oya sa zaliŵa-liŵa ba danö si no ahori mate, hatö duriara nirongoda ma'ökhö.

== Fanema'ö ==

=== Niha Keriso ===
Börö teori evolusi andre ato niha sanguma'ö wa tenga ni'a'azökhi [[Lowalangi]] gulidanö andre ba fefu zaliŵa-liŵa ba detenia. Tola manö la'oguna'ö mbua wehede simanö samösa niha na lö mamati ira khö Lowalangi. Ba hiza lö sala na taŵa'ö göi wa [[Lowalangi]] zamazökhi töla geu evolusi andrö, moroi ba da'ö oi manga'ali fefu zaliŵa-liŵa ba danö.

Baero da'ö tola taŵa'ö, te lö na sa la'ila ira satuada sanura [[Sura Ni'amoni'ö|Zura Ni'amoni'ö]] wa ulidanö andre itugu tumbu ba manöi (molo'ö goi-goi ''[[fisika]]'', manöi-nöi manö na sa wa'ebolo mbanua si yaŵa andre i'otarai me tefagamaöi ia ba ginötö wamazökhi banua si yaŵa awö danö nifotöi ''[[Big Bang]]'').

Lö na sa ibe'e khöra Sokhö wa'onekhe-nekhe wangila si mane ni'ila ndra sangi'ila ba ''[[fisika]]'' ma'ökhö. Fefu zi tola laŵa'ö me luo da'ö ya'ia wa fefu hadia ia zi so andre no nifazökhi [[Lowalangi]] (fao ba da'ö fefu ni'a'azökhi [[Lowalangi]] ba ginötö ''Big Bang'' andrö). Balazi [[Lowalangi]] ''hewisa lala'' wamazökhinia ulidanö ba banua si yaŵa andre, ba tenga dali wamati ''hewisa lala'' andrö. Duma-dumania faduhu dödöda wa badagahe no nifazökhi ba ''pabrik'', heŵa'e lö aboto ba dödöda hewisa lala wamazökhi ya'ia (no fabö'ö-bö'ö molo'ö ''[[pabrik]]'' ba ''[[teknologi]]'' ni'oguna'ö ba wamazökhi ya'ia).

Aefa da'ö molo'ö [[Sura Ni'amoni'ö]] i'a'asogö gulidanö ba gofu hadia ia [[Lowalangi]] fitu ngaluo wa'ara. Na sindruhu niŵaö ndra sangi'ila ba ''[[fisika]]'' no mege yaŵa, wa banua si yaŵa manöi-nöi na sa irugi ma'ökhö, ba tola manö wa lö na sa tarugi ngaluo si fitu wanga'asogö ulidanö si mane nisura ba sura [[Moze I|Moze Sisara]]. Tola manö sa wa awena na tarugi ngaluo si önö, ya'ia da'ö inötö wanga'azökhi niha.

== Umbu ==
<references />

[[Kategori:Biologi]]
[[Kategori:Evolusi]]