Kenneth McKellar
| Kenneth McKellar | |||
| Fødd | 23. juni 1927 | ||
|---|---|---|---|
| Fødestad | Paisley | ||
| Død | 9. april 2010 (82 år) | ||
| Dødsstad | South Lake Tahoe | ||
| Opphav | Storbritannia | ||
| Aktiv | 1947–2010 | ||
| Instrument | vokal | ||
| Stemmetype | tenor | ||
| Plateselskap | Parlophone | ||
| Verka som | skogbruksforsker, operasongar, plateartist | ||
Kenneth McKellar (23. juni 1927–9. april 2010) var ein skotsk tenorsongar.[1]
Bakgrunn
[endre | endre wikiteksten]McKellar var fødd i Paisley i Skottland og studerte skogbruk ved University of Aberdeen. Seinare jobba han for den skotske avdelinga av britiske Forestry Commission.[2] Så studerte han musikk ved Royal College of Music som operasongar, men gjekk seinare over til å syngja tradisjonelle skotske songar og musikkstykke.[2] Frå 1959 til 1977 turnerte han jamleg i USA og Canada saman med andre skotske underhaldarar som Helen McArthur. Utover i 1960-åra opptredde han også i fleire pantomime-stykke i Storbritannia.[3]
I 1965 valde BBC McKellar til å representera Storbritannia i Eurovision Song Contest i Luxembourg. I den britiske finalen song han fem songar, der britiske tv-sjåarar stemde fram «A Man Without Love» som vinnar. Ifølgje John Kennedy O'Connors The Eurovision Song Contest – The Official History, hadde McKellar skifta til kilt like før sendinga, og publikum reagerte med å gispa.[4] I den internasjonale finalen enda bidraget på niandeplass av 18 land – den svakaste plasseringa til Storbritannia frå debuten i 1957 og fram til 1978.[4] «A Man Without Love» nådde 30. plass på UK Singles Chart i mars 1966.[5] Albuma The World of Kenneth McKellar (1969) og Ecco Di Napoli (1970) låg til saman ti veker på den britiske albumlista.[5] Han spelte også inn eit album på afrikaans, kalla Kuier By Ons, som blei gitt ut like før han drog på turné i Sør-Afrika i oktober 1970.
I tillegg til å laga musikk skreiv McKellar også ein sketsj som komikargruppa Monty Python framførte i The Secret Policeman's Ball. Dette er den einaste Monty Python-sketsjen som er skriven av nokon utanfor gruppa.[6]
McKellar gav ut dei fleste av innspelingane sine på Decca Records.[2] Han spelte også inn fleire klassiske verk, mellom anna Händels Messias saman med Joan Sutherland under leiing av Adrian Boult.[2] Då han forlét Decca i 1970-åra, skreiv han kontrakt med Lismor Records for perioden 1983–1996 og spelte inn fleire album før han pensjonerte seg i slutten av 1990-åra.
McKellar spelte også inn musikalen Kismet med Robert Merrill, og han spelte inn fleire gæliske songar.
Kjelder
[endre | endre wikiteksten]Kjelder
[endre | endre wikiteksten]- ↑ Laing, Dave (12. april 2010). «Kenneth McKellar obituary». The Guardian (på engelsk). ISSN 0261-3077.
- ↑ 2,0 2,1 2,2 2,3 «Famous Scots – Kenneth McKellar». Rampantscotland.com. 8. november 2009. Henta 15. november 2011.
- ↑ Alhambra Glasgow by Graeme Smith ISBN 9780955942013
- ↑ 4,0 4,1 O'Connor, John Kennedy. The Eurovision Song Contest – The Official History. Carlton Books, UK. 2007 ISBN 978-1-84442-994-3
- ↑ 5,0 5,1 Roberts, David (2006). British Hit Singles & Albums (19th utg.). London: Guinness World Records Limited. s. 340. ISBN 1-904994-10-5.
- ↑ «Kenneth McKellar: Scotland's Great Tenor». The Secret Policeman's Ball. 12:40 minutt frå start. BBC One.
- Denne artikkelen bygger på «Kenneth McKellar» frå Wikipedia på bokmål, den 6. august 2024.