Centre de Formacion Professionala d'Occitània-Miègjorn-Pirenèus
Lo Centre de Formacion Professionala d'Occitània Miègjorn-Pirenèus (CFPO-MP) es una associacion culturala segon la lei de 1901 que nasquèt en 1997 a Tolosa. Es un organisme professional al servici de la transmission de la lenga e la cultura occitanas als adultes.
Assegura aquela transmission en prepausant d'estagis e corses per tot public o especificament a l'usatge dels professionals. Lèu, deuriá metre tanben en plaça una formacion de formators "de contunh".
Lo CFPO-MP a per vocacion de prepausar als estajants de la Region de Miègjorn-Pirenèus una ofèrta professionala per la lenga e la cultura occitanas. La tòca es de provesir a cadun los mejans de perfeccionar sas coneissenças en occitan, tant coma se pòt far per d'autras lengas mai espandidas.
La part màger de l'activitat del Centre tòca la formacion per los que la lenga lor fa mestièr dins la practica professionala. Organizarà tanben lèu una formacion pels formators en lenga e cultura occitanas.
Lo CFPO-MP fa part de la ret de Centres de Formacion Professionala Occitans que s'estructura dins tres regions occitanas : Lengadòc-Rosselhon (Besièrs), Aquitània (Ortès) e Miègjorn-Pirenèus (Tolosa).
Lo CFPO-MP prepausa divèrsas formacions, caduna adobada amb d'exigéncias de qualitat precisas :
- Los estagis. Formacions intensivas d'un a tres jorns en immersion lingüistica. S'i tròban mescladas mantuna activitat que permeton d'aquesir o de perfeccionar la lenga, e d'aspèctes de la cultura.
- Los setmanièrs. Corses del ser de cada setmana assegurats per un formator professional.
- Formacions a distància en e-learning del nivèl A2 al nivèl C1.
- Formacions professionalas (ajuda mairalas...).
- Formacions individualas.
- Formacion intensiva a l'occitan modèrne - Preparacion als mestièrs ligats a la lenga e la cultura occitanas (Sièis meses a temps complet per aténher lo nivèl B e bastir un projècte professional).
- BAFA occitan.
Las formacions del CFPO M-P son concebudas a respècte de lo Quadre Comun Europèu de Referéncia per las Lengas (QECRL). Cada formator lo coneis e l'utiliza.
Las formacions inicialas que lo CFPO Miègjorn-Pirenèus prepausa los diplòmas "ESCAPOLAIRE-A2", "Nivèl B1", "Nivèl B2" e "Nivèl C1" per validar los nivèls de competéncia del QECRL, (l'Escapolaire es estat lo primièr diplòma d'aquela mena per la lenga occitana). Aquelas certificacions validan un nivèl de lenga a l'oral e a l'escrich.
Lo CFPO Miègjorn-Pirenèus es reconegut coma Centre de Formacion Professionala per la prefectura de Miègjorn-Pirenèus. A aquel títol, pòt beneficiar de finançament per la formacion continua dins lo quadre de plans de formacion, DIF o CIF.
Contacte
[modificar | Modificar lo còdi]45 carrièra Gatien Arnoult
31000 TOLOSA
tel :0561239931
Ligam extèrne
[modificar | Modificar lo còdi]- (oc) (fr) Site oficial del CFPO-MP
.svg){kind=small}