Forno di veld
E forno di veld ta un forno di calki primitivo. Al contrario na e forno di calki traha di bloki, e ta un metodo temporario di solamente un usa. E dimension di un forno asina por varia considerablemente, e ta depende principalmente di e cantidad di palo pa kimamento cu por a obtene.[nota 1]
Dominee Bosch ta duna un splikashon detayá den su obra, Reizen in West-Indië, en door een gedeelte van Zuid- en Noord-Amerika ("Biahando den Antias, y door di partinan di Sur y Noord America"). E no a solamente describi extensivamente e folklor rond di kimamento di calki (fiesta di forno di calki),[2] pero tambe ta duna un splicacion exacto di e construcion di su mesun forno di veld na plantashi Zeelandia na Corsou.
E forno di veld cu un diameter di 24 pia (7.3 meter) Ds. Bosch ta considera un forno chikito. Na un haltura di casi 5 meter, e forno ta consisti di e montamento di cuater capa di palo y piedra.[nota 2] E capa fundamental ta semper un di palo di 5 pia (1.5 meter) halto. Monta ariba esaki un capa di piedra (4 pia; 1.2 meter), sigui pa palo (4 pia; 1.2 meter), y alafin piedra (3.5 pia; 1 meter).[nota 3] Segun calculacion, e forno di calki aki ta produci 43 meter cubico di calki hidrata (Ca(OH)2).
Tur buraco y e areanan habri ta wordo yena cuidadosamente cu pida palo y piedra chikito durante montamento. Esaki tabata wordo haci cu intencion, pa evita cu biento ta stroba e proceso di kimamento di calki. Demasiado biento lo causa e candela pa flama en bes di bria, strobando e piedranan di comberti completamente den calcio oxida (CaO). Pa e mesun motibo aki, un muraya di taki ta proteha e forno. Tin biaha tabata coba un keilo no mucho hundo cu e mesun tamaño di e superficie di e capa fundamental. Na Boneiro y Aruba, fuera di e superficie circular, tambe tabata usa un superficie cuadra.
E forno tin un flambeu memey di e monton, di un pari decimeter hancho, ta core for di e fundeshi te na e top di e forno. E flambeu aki ta consisti di palo fini y tabata sirbi como e punto pa sende e forno. E candela ta move bay abou na e fundeshi, cua ta causa cu e forno ta kima for di paden pa pafo. Na luganan caminda e forno ta kima mucho lihe, ta plama poco awa ariba e area ey. Despues di algun dia e forno ta completamente kima.
Debi na scarsedad di palo, el a bira mas y mas difícil pa kima calki. Descripcionnan despues di forno di veld ta mustra cu nan tabata wordo construi considerablemente mas chikito.
|