Ґусли
Ґусли то сербски народни смикови инструмент. Назва за инструмент ґусли приходзи од праславянского слова ,,gǫdsli” а то значи струна. Тот инструмент ма єдну лєбо два струни. Ґусли направени найчастейше зоз яворового древа, ясенового алє и орехового. Мож их справиц так же би були видлабани з єдного фалата древа. Правя ше виключно лєм ручно. Кед ґусли єднострунови вец их стретаме у Чарней гори, Босни, Герцеґовини, Далмациї, Сербиї. Ґусли зоз Лики и Босанскей країни найчастейше маю по два струни.
Випатрунок и збудва инструмента
[ушориц | ушор жридло]Ґусли ше состоя зоз древеней шкатули чий корпус у форми грушки. Корпус прецагнути зоз мембрану-скору животиньского походзеня дзе вивартани даскельо мали дзирки (перфорация) пре резонантносц звука. На корпус ше надовязує длугша шия, хтора ше на концу закончує зоз главу на хторей заокруглєна резбарена часц даєдней животиньскей глави (найчастейше коньскей, козорога), лєбо птицовей (орловей, соколовей) а може и чловековей найчастейше вец даєдного националного героя. Скорей тей заокруглєней часци, на глави инструмента находзи ше клїнок -закрутка на хтору ше квачи и нацагує струна єдна лєбо два.
Доставанє звука
[ушориц | ушор жридло]При граню виводзач хтори шедзи, кладзе себе корпус ґуслох на колєна а при верху притримує шию зоз дланю єдней руки. Струну (струни - кед су два) ше нє прициска, лєм ше благо дорушую зоз пальцами. Звук на ґуслох ше достава зоз прецагованьом смика по струни.
Струна на ґусли направена зоз 30 - 50 фалаткох коньскей шерсци зоз хвоста, хтори заплєцени так исто як и на смику. Смик направени зоз гладко обробеного полукружного конара (лєбо древа) на хторим нацагнута струна тиж заплєцена зоз коньскей шерсци. Смик ше прецагує по зацагнутей струни (лєбо двох) на целу-корпусу и так ше достава оштри, драматични звук, хтори винїмково експресивни - упечатлїви.
За гранє на ґуслох потребна велька схопносц, бо за нїх нєт написани нотни партитури. Постоя лєм тексти. Виводза ше зоз граньом по традициї, геройско-епски писнї зоз рецитативним стилом приповеданя.Сербска традиция ґуслох Ґусли мали значну улогу у историї сербскей епскей поезиї, прето же ґусларе – народни шпиваче, ошпивовали подїї националней историї хтори ше збували през вельо вики. Зоз часом тоти епски тексти позаписовани до зборнїкох. Векша часц писньох приповеда и описує часи отоманскей власци и єй панованя на просторох Балканского полуострова як и националну борбу за нєзависносц. Зоз усиловносцу Вука Караджича велї сербски епски писнї записани и зачувани ище початком 19. вику.
Зоз документох историчарох - хронїчарох, дознаваме же сербски ґусларе наступали у велїх реонох Европи и були барз популарни. У даєдних кнїжкох и публикацийох постої записани податок же зоз сербскима ґуслами - ґусларе дочекали Фридриха I Барбаросу, кед ше стретнул у 12. вику у Нишу зоз сербским владаром Стеваном Неманїчом. Теди му Стеван Неманя понукнул помоц сербскей держави у крижарскей войни. Приповеда ше же Фридрих I бул одушевени зоз звуком ґуслох и з граньом на нїх зоз шпиваньом та ше заинтересовал вецей и ширше за поєдиносци вязани за ґусли.
Походзенє
[ушориц | ушор жридло]Ґусли як степски инструмент, з далєкей историї о їх походзеню, дознаваме же походза зоз штреднєй Азиї. Серби як єдно зоз славянских племенох степского походзеня, принєсли тот инструмент на простор юговосточней Европи. Найзроднєйши инструменти були моринхур и иґил. На верху глави ґуслох, часто резбарена коньска глава лєбо глава цапа, як символ статкарства и номадских народох. Смик найчастейше направени як форма гада, як символ гнїву жительох хтори жию у горох. Познєйше ше на ґуслох могло видзиц направени глави националних геройох. Нє случайно ше ґусли правя зоз явора, прето же явор як древо ма символику предхристиянскей релиґиї и означовал култ предкох. Тиж зоз граньом на ґуслох ше часто описую и славя предки.
Найпознатши сербски виводзаче на ґуслох бул Филип Вишнїч, Тешан Подруґович, Старик Рашко, Дюро Милутнович, Милош Шапонїч и велї други.
Примена ґуслох у других державох
[ушориц | ушор жридло]Ґусли мож видзиц и у Сириї. При Лужичких Сербох мож видзиц смикови инструмент зоз трома струнами вєдно и наволує ше гусли. Тиж так Серби хтори пременєли виру до исламскей, затримали гранє на ґуслох и ошпивали зоз ґуслами своїх муслиманских геройох. Нєшка ше тота традиция при нїх страцела.
Шпиванє и гранє на ґуслох 2018. року записане и до Унесковей репрезентативней лїстини нєматериялного културного нашлїдства чловечества.[1][2][3]
Референци
[ушориц | ушор жридло]- ↑ Поред кола и славе и гуслање се нашло на репрезентативној листи (Б92, 29. новембар 2018)
- ↑ Певање уз гусле на листи Унеска („Политика”, 29. новембар 2018).
- ↑ „Упис гусала у Унескову листу - признање и памћење(СПЦ, 29. новембар 2018).”