Bussa de istùdiu
Una bussa de istùdiu est unu finantziamentu de sos istùdios cuntzèdidu a istudantes meressidores, pro narrer in su casu chi non disponzant de un'arrimu econòmigu adeguadu dae bandas de sa famìlia issoro, o puru comente prèmiu pro resurtados particulares logrados in sas artes, in sas sièntzias, o àteras dissiplinas. Podet esser dispensadu dae particulares, dae fundaduras pùbrigas, o finas in forma de minimonzu de sos impòsitos de allistamentu, dae bandas de sas entidades chi zestionant sas universidades o sas iscolas.
Sos tipos de bussas de istùdiu chi esistint in su mundu sunt medas bariadas, e duncas si podent basare in sos fatores sighidores (o cumbinaduras issoro):
- su mèritu (in sos istùdios, in sas artes, in sos isportos);
- sa netzessidade (pro isempru, in su casu de istudantes sena o cun pagas siendas econòmigas);
- sa pertenèntzia a una minoria, che su grupu ètnigu o limbìstigu.
In Itàlia e Sardinna, sas bussas de istùdiu istitussionales sunt dispensadas dae su Ministèriu de s'Edugadura, de s'Universidade e de sa Busca, e dae sas Reziones. S'Istadu tràmudat a sas Reziones sos montos apartados a su Fundu Integrativu Nassionale pro sa Cuntzessura de sas Bussas de Istùdiu. Pro cuntzeder sas bussas de istùdiu, sas Reziones impreant in prioridade sas siendas pròpias issoro, sas chi derivant dae sa coberada de s'impòsitu rezionale pro su deretu a s'istùdiu e sas de su Fundu antisfontomadu.