Turri Cabrera
La Turri Cabrera è na turri di difisa custruita ppi prutizzioni di lu Caricaturi dô Puzzaddu, 'n Pruvincia di Rausa. Nta lu XV sèculu lu situ di l'attuali cità era canusciutu di li navicanti ppi li surgenti d'acqua chiamati "Puzzufétu" e "Sinìa" , a ddi tempi numinati assai e macari signaliati nta lu purtulanu e nta li carti nàutichi.
Quannu li Conti Chiaramunti di Muòrica fabbricaru un "Caricaturi", ca è nu nzemi di malazzeni, puntili e scìvuli ppi putiri mbarcari la merci supra li vileri, e a ddi tèmpura era muntuatu comu lu secunnu di tutta la Sicilia, s'appi a pinzari macari pp'addifinnìrilu. Sempri nta lu XV sèculu lu re Alfonsu V Arauna ci desi l'autorizzazzioni a lu conti Giuanni Binnardu Cabrera, ppi custruiri na turri di difisa e iddu ci desi lu sò nomu.
Lu fabbricatu era granniusu e mpurtanti ppi l'avvistamentu n tempu ùtili di li navi pirata ca nta ddi tempi circàvanu sempri di assartari li malazzeni di lu Caricaturi, sempri chini di frummentu di la Cuntìa di Muòrica, ca mbarcatu a lu Puzzaddu junceva nta li cchiù luntana porti di lu Miditirràniu. Nta la turri cci facèvanu sirvizzu surdata e cannuneri ca tinèvanu pronti li cannuna mpustati nta li tirrazzi àuti mentri li cavaleri pattugghiàvunu la costa.
Ntornu a la Turri Cabrera si svuluppau lu primu villaggiu di surdata e piscatura ca appoi addivintau la cità dô Puzzaddu.
Oi la turri è Munumentu Nazziunali, e s'attrova addisignata nta lu stimma di la cità dô Puzzaddu.
Lijami di fora
[cancia | cancia u còdici]
