Ciyak lmiqu/ Bkiluh/ Krung bkiluh(野苦瓜)

Ciyak lmiqu ani inu ttaan meniq lmiqu eebun, ma siyo eluw. Dheran bbsuring kuxul na hhreyan. Hndure ka ngalan ppyahan sphuma duri di. Pssengan qnedis ma paru ka hei na; ini kngihun, ma madis tikuh mssibus ka hei na puqun di.

　　Speriq muudus kingal knkawas, wahil pgkaro, niqal ngudus spgeriq ma niqal uban runge. Mtumun mdeka rima betaq mpitu ka waso na. Mprbagan, betaq rbagan mgceyas ka pnhepah na, mgsama ka qmuru na peni.

　　Qnedis mtumun so balung hari ka hnyegan hei na, mgquwaq mghungun ka putting putting na. Brkiluh mhungun ka qraqil na baro, biciq ma malu ba qtaan knugtumun. Mgsama mgmudu ka rako na da mhada, mhada ba blbale de, mquri nganguc mpgeriq mtteru mddeka, tkriyak rehak na plbuwan tbaro kntanah bale ka mgqraqil ka rehaq na. madis tikuh ini pntena sknexan peni. Ini mkmekan ido, so ddooyan bgihur mssekuy hei ma mnddengu qelu mngihun hema, malu prayan qsiya siimah, ini beyo malu ka kuxul. Anaq mngihun mahan, remux rqenan kbrinah msibus ba ka gelu peni.