Belousovo (lidn)

Belousovo
Белоусово

Lidnanznam	Flag
Valdkund	Venäma
Eläjiden lugu (2023)	10,980 ristitud
Pind	2,27 km²
Pämez'	Tat'jana Grigorjeva (reduku 2013—)
Telefonkod	+7−48 432-xx-xxx
Avtokod	40
Aigvö	UTC+3 (MSK+0)

Belousovo (ven.: Белоу́сово) om Venäman lidn da lidnankund Kalugan agjan pohjoižpäivnouzmas, Obninskan päivnouzmaine ezilidn. Mülüb Žukovan rajonha, sen kaikiš penemb lidn koumen kesken.

Istorii

Belousovon kangazfabrik

Eländpunkt mainitase ezmäižen kerdan vl 1782 kuti Belousovo-külä. Nimitihe hibusheinän venäkel'žen nimen mödhe (белоус), se hein kazvoi äjüdes küläs ümbri. Saudud 19. voz'sadal kangazfabrik (vate, šuuk) andoi radod külän da ümbrišton eläjile. Toižen mail'man sodan aigan okkupacii oli heittud vn 1942 vilukus. Kätihe žilod lidnanvuiččeks vl 1962. Vn 2004 tal'vkun 28. päiväspäi om lidnan statusanke.

Belousovo šingotase kangazfabrikal, sömtegimištol (maidtegim, lindfabrik), tegesiden räzinaspäi i plastikaspäi pästandal, mecanümbriradmižen edheotandal. Magistraližiden gazanveimiden sol'm, kompressorstancii radab läz lidnad.

Geografijan andmused

Lidn sijadase rajonan lodehes, Diročnai-jogen randoil (ven.: Дырочная 15 km pitte, ende Derešn', ven. Дерешня, Okan hurapol'ne bassein), 170 m ü.m.t. keskmäižel korktusel. Jogi läbitab lidnan keskuzpalad, uit om saudud sil.

Matkad Kalughasai om 69 km suvipäivlaskmha-suvhe orhal vai 78 km avtotel. Lähembaižed lidnad oma Žukov-rajonkeskuz kahesas kilometras suvipäivnouzmha orhal vai avtotedme, Obninsk ühtes kilometras päivlaskmha i lodeheze orhal vai avtotedme, i Balabanovo kümnes kilometras pohjoižhe vai 13 km avtotedme. «Moskv — Roslavl'»-avtote läbitab lidnad, «Moskv — Bränsk»-avtote (M3-trass) mäneb ühtes kilometras päivlaskmha lidnaspäi.

Tobmuz

Belousovo om lidnankundan üks'jäižeks eländpunktaks. Lidnankundan pind — 2,27 km².

Lidnankundan tobmuden pämez' om sen Duman ezimez'. Lidnan Administracijan pämez' om Taras Zvažii vn 2021 kezakuspäi. Edeline Administracijan pämez' om Dmitrii Leksunin (tal'vku 2018 — kezaku 2021).

Eläjad

Vl 1970 žilon ristitišt oli 5 990 eläjad. Vn 2010 Venäman rahvahanlugemižen mödhe lidnan eläjiden lugu oli 8 412 ristitud, rajonan videndez, vn 2021 — 10 946 ristitud. Kaik 9 288 eläjad oli lidnas vl 2017. Kaikiš suremb lidnan ristitišt oli 12 600 eläjid vl 2001.

Rahvahad (2010): venälaižed — 90,3 %, armenijalaižed — 2,9 %, ukrainalaižed — 1,9 %, totarlaižed — 1,3 %, toižed rahvahad — 3,6 %.

Ortodoksižen hristanuskondan ph. Jelisaveta-kunigaznaižen-moknikan jumalanpert' om saudud lidnas vodele 2004.

Lapsiden opendusen aluzkundad oma koume päivkodid, keskškol (nomer 2), čomamahtoiden škol, Fakel-sportškol («tervač»). Lähembaižed professionaližen opendusen aluzkundad sijadasoiš Obninskas.

Irdkosketused

• Lidnankundan tobmuden aluzkundoiden sait (adm-belousovo.ru). (ven.)