Pravdinsk

Pravdinsk
Правдинск

Lidnanznam	Flag
Valdkund	Venäma
Eläjiden lugu (2023)	3,934 ristitud
Pind	10 km²
Pämez'	Vladimir Bakalin (sügüz'ku 2016—)
Telefonkod	+7−40 157-xx-xxx
Avtokod	39, 91
Aigvö	UTC+2 (MSK−1)

Pravdinsk (ven.: Пра́вдинск, saks.: Prawdinsk, pol'š.: Prawdinsk / Frydland, litv.: Bartų Romuva / Pravdinskas; edel 1946. vot Fridländ / Fridland, ven.: Фри́дланд, saks.: Friedland in Ostpreußen) om Venäman lidn Kaliningradan agjan suves. Se om Pravdinskan ümbrikon (edel vn 2022 vilukud — lidnümbrikon) administrativižeks keskuseks da palaks.

Istorii

Eländpunktan-lidnusen aluz om pandud vl 1312 prussijalaižiden vanhan eländpunktan sijas. Se sai lidnan oiktusid vn 1335. Zavottihe sauvondad lidnusen irdpolel 16.-17. voz'sadoil. Suren sodan aigan Rusked Armii anasti lidnad.

Pravdinsk šingotase sömtegimišton edheotandoil i penel GES:al.

Geografijan andmused

Lidn sijadase Lav-jogen randoil (ven.: Ла́ва, pol'š.: Łyna, saks.: Alle 289 km pitte, padosein da pen' GES), 20 m ü.m.t. keskmäižel korktusel.

Matkad Pol'šanman röunhasai om kümne kilometrad suvhe orhal, lähembaine kontrol'punkt sijadase Bagrationovskas 30 km suvipäivlaskmha avtotedme. Matkad Kaliningradan keskushesai om 43 km lodeheze orhal vai 53 km avtol. Toine lähembaine lidn om Gvardeisk 23 km pohjoižhe orhal vai 44 km avtotedme.

Eläjad

Vn 2010 Venäman rahvahanlugemižen mödhe lidnan eläjiden lugu oli 4 323 ristitud, lidnümbrikon videndez, vn 2021 — 3 986 ristitud. Kaik 4 171 eläjad oli lidnas vl 2017. Kaikiš suremb lidnan ristitišt oli 4 410 eläjad vl 1939 i läz 4 500 eläjid vll 1996−2009.

Rahvahad (lidnan eläjad, enamba 0,4 % vl 2010, ozutadud rahvahudenke): venälaižed — 84,6 %, vaugedvenälaižed — 7,7 %, ukrainalaižed — 2,1 %, armenijalaižed — 1,4 %, azerbaidžanlaižed — 1,3 %, saksalaižed — 0,9 %, totarlaižed — 0,6 %, litvalaižed — 0,4 %, toižed rahvahad — 1,0 %.

Ortodoksižen hristanuskondan ph. Jurgii-vägestusenkandajan jumalanpert' radab vspäi 1990. Se om agjan kahtenz' surtte istorine pühäpert', kivine om saudud vll 1360−1380, ende oli katoline, sid' lüteranine pühäpert', nevondkundaližen aigan kävutihe varažomaks.

Lapsiden opendusen aluzkundad oma severz'-se päivkodid, keskškol. Professionaližen opendusen aluzkundad ratas lähembaižiš lidnoiš.

Galerei

• 
  Torg lidnümbrikon administracijan pertinke (ruzan mujun, 2016)
• 
  Ph. Jurgijan jumalanpert', vn 2018 nägu (ende Fridlandan kirh)
• 
  Pravdinskan GES vl 2016
• 
  Keskškol (2016)
• 
  Policijan palakund (2016, ende kapell)

Irdkosketused

• Lidnan da sen ümbrikon tobmuden aluzkundoiden oficialine sait (admpravd.ru). (ven.)
• Pravdinskan ümbrik Kaliningradan agjan ohjastusen gov39.ru-saital. (ven.)