Puebl

Puebl
Puebla de Zaragoza
Lidnanznam;	Flag;
Valdkund	Meksik
Eläjiden lugu (2020)	1,692,181 ristitud
Pind	206,55 km²
Pämez'	Klaudia Rivera Vivanko; (sügüz'ku 2018—,; Claudia Rivera Vivanco)
Telefonkod	+52−221, 222
Aigvö	tal'vel UTC−6,; kezal UTC−5

Puebl (isp.: (Heroica) Puebla de Zaragoza [ˈpweβla], nauatl': Cuetlaxcoapan) om Meksikan nellänz' surtte lidn, sijadase valdkundan keskuzpalas. Se om Puebl-štatan administrativine keskuz.

Istorii

Pueblan tahond oli kaikenaigaižeta ristitištota edel evropalaižiden tulendad. Eländpunktan aluz om pandud vn 1531 16. päiväl sulakud tel Mehikon i Verakrus-meriportan keskes.

Puebl šingotase avtopaloiden pästandal (Fol'ksvagen- i Hylsa-kompanijoiden edheotandad), metallurgijal, himižel i tekstiližel sarakoil, sömtegimištol, turizmal.

Geografjan andmused

Lidn sijadase 1980..2680 m korktusil, 2135 m ü.m.t. keskmäižel korktusel. Matkad Mehikohosai om sada kilometrad päivlaskmha-lodeheze.

Klimat om subtropine korktoiden mägiden, valdmeren valatoitusenke, päivoikaz lujas päiči vihmsezonas. Kun keskmäine lämuz om +13,9 (viluku) ..+19,8 (semendku) C°. Il'man lämuden maksimum om +36,5 C° (semendku), kaikiš lujemb hala oleli −5,5 C° (viluku) i −6,0 C° (tal'vku). Lämuz voib sadas läz +30 Cel'sijan gradushasai da sen korktemba miččel taht kul. Ei voi panda halad sulakus-elokus i redukus. Paneb sadegid 969 mm vodes, enamba kezakus-sügüz'kus (162..197 mm kus), kuiv sezon oleskeleb kül'mkus-keväzkus (5..18 mm kus). Kun keskmäine relätivine nepsuz vajehtase 62..68 % röunoiš kezakus-redukus, 47..55 % vilukus-semendkus i kül'mkus.

Eläjad

Vl 2010 lidnan eläjiden lugu oli 1 434 062 ristitud, lidnan municipalitetan — 1 539 819 ristitud 534,32 km² pindal. Vl 2015 lidnan municipalitetan ristitišt oli 1 576 259 eläjad. Läz 3 mln ristituid elädas lidnaglomeracijas (2015).

Transport

Privatižed avtobusad i kiruhavtobusoiden jonod oma kundaližeks transportaks lidnas. Velosipedoiden kortoman verk radab.

Pueblan rahvahidenkeskeine civiline lendimport Serdan-velliden nimed (PBC / MMPB, 790 tuh. passažiroid vl 2023) sijadase lodehližes Uehozingo-ezilidnas 23 kilometras lidnan keskuzpalaspäi. Tehtas reisid Hjustonha (AÜV) i Meksikan surihe lidnoihe. Toine lähembaine rahvahidenkeskeine lendimport äjidenke reisidenke radab sadas kilometras Mehiko-pälidnas. Pueblan lendimport om varalendimportaks sen täht.

Irdkosketused

Lidnan oficialine sait (pueblacapital.gob.mx). (isp.)

Puebl Vikiaitas