Castel Gandolfo

Castel Gandolfo

Castel Gandolfo binn'n de metropolitoane stad Rome
Regio	Lazio
Provinsje	Rome Ôofdstee (metropolitoane stad)
Coördinoatn	41°45′NB 12°39′OL
Ippervlak	14,19 km²
Inweuners Bevolkiengsdichtheid	8.940 (2017) 630 inw./km²
Postcode	00073
Website	Officieeln site van Castel Gandolfo

Castel Gandolfo es en Italioansche gemêente binn'n de metropolitoane stad Rome Ôofdstee in de regio Lazio. 't Ligt o de zuudôostkantn van Rome zelve, ip apeupri 25 kilomèiters van't center van Rome, in d'Alboanse Euvels. O d'ôostkantn van Castel Gandolfo ligt et Meer van Albano. Castel Gandolfo es weireldwyd surtout gekend lyk de plekke van't zomerlogement van de paus, da eigntlyk en ounderdêel es van Vaticoanstad.

Liggienge

Castel Gandolfo grenst an de gemêentn Albano Laziale, Grottaferrata, Marino, Rocca di Papa en an't stad Rome zelve. De gemêente èit drie wykn en gehuchtn (frazioni): Mole di Castel Gandolfo, Laghetto en Pavona. In tydde van de Romein'n lag Castel Gandolfo dichte by de Via Appia (de heirboane die liep van Rome noa 't zuudn tout in Brindisi).

Beziensweirdigeedn

't Apostolisch Paleys, ofte 't zomerlogement van de paus, es gebouwd vanoaf 't joar 1624 in ipdracht van paus Urbanus VIII noar en ountwerp van Carlo Maderno. 't Paleys en de by-ôornde Villa Barberini (die der an wierd bygevoegd deur Pius XI) ein zogenoemde extraterritoriale rechtn sedert 't Verdrag van Lateroan'n van 1929 tusschn 't Vaticoan en d'Italioansche stoat en es dus officiël Vaticoans groundgebied. Tusschn 1870 en 1929 bleef 't gebouw oungebruukt mè da de pausn ton zwoar boel ad'n mè d'Italioansche stoat oovr 't statuut van de pauselyke eigndomm'n. 'n Uudign paus Franciscus èi nog mo letter gebruuk gemakt van't paleys, kontreir an z'n veurgangers. Sedert moarte 2014 eit Franciscus d'n hof van Castel Gandolfo van de moandoage tout de zoaterdoag anderolf ure oopngesteld vo publieke roundleydiengn.
Villa Cybo, gebouwd in ipdracht van kardinoal Camillo Cybo, wierd by de pauselyke eigndomm'n gesmeetn in tydde van paus Clemens XIV die da't kocht in 1774 van Francesco III d'Este, den ertog van Modena.
Villa Barberini, gebouwd vo Maffeo Barberini de koozn van Urbanus VIII, wierd ôok en ounderdêel van de pauselyke eigndomm'n in 1929 mè 't Verdrag van Lateroan'n. In d'n hof dervan stoan restn van d'antieke villa gebouwd deur de Romeynsche keyzer Domitianus.
De San Tommaso da Villanova-kerke, genoamd nor 'n illign Thomas van Villanova, es gebouwd deur Bernini tusschn 1658 en 1661 in ipdracht van paus Alexander VII. 't Eit en mêer vierkantig groundplan in de vorm van en Grieks Kruus en der angt e bekend schildereye van Pietro da Cortona die de kruusigienge van Christus toogt.

't Apostolisch Paleys
Villa Barberini
De San Tommaso da Villanova-kerke

Ofbeeldiengn die ier by passn ku je vien in de categorie Castel Gandolfo van Wikimedia Commons.