Gondwana

Gondwana is 'n vôorhistorisch supercontinent genoemd achter de Gondwanastreke in Indië (van 't Sanskriet gondavana, 't bus van de Gond). Da supercontinent ê van in 't Precambrium (ongevêer 570 Ma) toet an de vormienge van Pangaea (deur 'n botsienge mê Laurasia omtrent 300 miljoen joar geleen) bestoan. De hudige continentn Zuud-Amerika, Afrika, Antarctica, Australië tope mê de klêndere fragmentn Indië, Madagascar en Nieuw-Zeiland maktn d're ollemolle dê vanuut en vô 't meirendêel ê Gondwana in 't zudelik holfround geleegn.

Den term Gondwana wordt ook gebruukt vô biogeografische definities, wô det er nô de verspreidienge van bêestn en plantn wordt verweezn die kunn gexplikeerd wordn deur under ofkomste van 't oude supercontinent achter det round 200 miljoen joar geleen upgebrookn et.