Lorenzo II de' Medici

Lorenzo II de' Medici (Firenze, 12 september 1492 - Firenze, 4 meie 1519) regeerdeg’ over Firenze van van 1513 tout an zyn dôod. Je krêeg ôok den titel van hertog van Urbino. Zyn dochter Catharina de' Medici trouwde me Hendrik II van Frankryk en wierd moeder van drie keuningn en twi keuniginn.

Niccolò Machiavelli droeg zyn bekend boek De Prins an hem ip.

Zyn leevn

Lorenzo was de zeune van Piero de' Medici, den oungelukkign en Alfonsina Orsini. Je was twientig joar oud on de Medici weregekommn woarn en zyn nounkel Giuliano, die styf geirn gezien was, regeerdeg’ over Firenze. In 1513, besliste zyn andere nounkel Giovanni, die paus Leo X gewordn was, da zyn broere platse most moakn vo Lorenzo, omdat ’n de wettign erfgenoam was van zyn voader. In 1516 miekt ’n Lorenzo hertog van Urbino en je benoemdeg’ hem ôok tout generoaloverste van de kerke.

Zyn vrouwe en dochter

Lorenzo, die e grôot gedacht van z’n zelvn had en enorm uut was ip macht, wildege per se e vrouwe van keuninklik bloed lik zyn tante Philiberta van Savoye. Je was styf content ot ‘n de keure krêeg van Madeleine de la Tour d’Auvergne, die ofstamde van keunink Lodewyk IX van Vrankryk. Je liet zyn portret schildern deur Rafaël vo z’n trouw. Mo zyn vrouwe stierf den 28stn april 1519, direct achter de geboorte van hunder ênigste dochter Catharina. Lorenzo stierf minder of e moand loater.

Lorenzo was officieel de voader van Alessandro de' Medici, den êestn hertog van Toscane. Alessandro krêeg zyn bynoame il Moro omdat ‘n e môorse moeder had. Mo loater ounderzoek wyst uut dat Alessandro den ounwettige zeune van Giulio de' Medici, de loatern paus Clemens VII, moe gewist zyn van e korte reloasje met e bediende van vô den tyd dat ’n kardinoal was.

Zyn dôod

Lorenzo stierf kort achter de dôod van zyn vrouwe. Zyn grafmonument, in de Medici-kapelle van de San Lorenzokerke in Firenze, is versierd me drie beeldn van Michelangelo: êen van Lorenzo zelve en de beeldn schemerienge en doageroad.

Omdat ’n hêlegans dezelfste noame het van zyn grôotvoader Lorenzo de' Medici (Lorenzo di Piero de’ Medici), zyn d’r vele die peizn da zyn graf da van zyn grôotvoader is.

Me Lorenzo II stierft de Cafaggiolo-tak, den hoofdtak van de Medici, in directe mannelikke ipvolgiengslyne uut. Loater, achter Alessandro ’s regerienge ols hertog, gienkt de macht over no de twidde lyne, de Popolani, de toekomstige grôothertoogn van Toscane.

Giulio de' Medici, den ounwettige zeune van Giuliano de' Medici volgde Lorenzo ip mor in 1523 dêed ’n ofstand van zyn functie vo tout paus Clemens VII verkoozn te wordn.