Clotche

Grosse clotche di l' eglijhe di Transene

Ene clotche u cloke, c' est come ene dimeye bole di bronze, pus longowe al copete, avou ene båre di fier å mitan (li bata u l' mårtea), k' on pind et l' fé hossî por leye souner.

Motlî

Gn a des clotches dins les clotchîs d' eglijhes et dins les befrwès.

Gn aveut eto des pus ptites dins les scoles, metowes so ene potince.

Les clotches sont fabrikêyes dins ene clocreye u fondreye ås clokes.

Dinltins, les clotches estént metowes e-n alaedje pa des coides di clotche. Li ci ki saetchive dissu, c' esteut li souneu ås clotches. Asteure, c' est ene rowe racoirdêye a ene munutreye.

Dins les sounaedjes a pårt, gn a les cariyonaedje ou triboulaedjes, les transes (po-z anoncî on moirt), li tocsin.

• 
  clotche avou rowe d' etrinnaedje otomatike po l' fé souner
• 
  coide di clotche (vî sistinme po souner)

Rilomêyès clokes

• clokes di Rome ou clotches di Påke : k' avoynut les oûs d' Påke.
• clokes di Sint-Houbert : on mancive les efants ki xhinént "si lez clokes di Sint-Houbert sounrént, t' î dmorroz". On djheut çoula disk' a Dorene.

Rilomêyès clocreyes

• Telin, la k' gn a eto on Muzêye del cloke.

• 
  clotche a Tchevtogne, avou l' marke di fabrike di Telin
• 
  monumint ås clokes, a Telin

Sôres di sounaedjes di clokes

• transe u sounaedje al moirt : å cminçmint, londjin sounaedje a ene clotche. Li souneu doet rastini l' clotche. Deus troes côps a ene clotche; pu arester; pu 3 ôtes côps en erote avou l' ôte cloke; pu souner avou les deus clotches.
• tribolaedje : cwand sacwants clotches sounèt eshonne.