Ma de bon?

T'ee leggiuu, voj Peppin? La va benon!
Adess soo anmi coi donn come se fa,
L'hoo semper ditt che s'era on gran mincion,
A córregh tant adree, a deslenguà.

E per nagott i donn no daan lezion....
E d'ora inanz, perbio, vœuri cambià!
Se a lor inscì ghe pias, in conclusion,
Sarissem merli a no vorè imparà.

In scambi de morgninn, de compliment,
De parolett bei dolz che tocca el cœur,
De carezz, de basitt.... ten ben a ment,

Paroll d'inferno, repetton ghe vœur.
Anca on papin, magara dent per dent;
Lor vœuren pussee ben pussee ghe dœur!

(*) Dopo la lettura di una lirica di Annie Vivanti.