俄羅斯

Российская Федерация 俄羅斯聯邦
國旗 國徽
國歌：俄羅斯聯邦頌
自然地理 （實際管轄區）
首都	莫斯科
面積 國土面積：17,075,200平方公里 水域率：0.5%%
時區	UTC +2至+12
人民生活
官方語言	俄語
人口 總人口：143,974,059（2004年中估計數） 人口密度：8/km2
政治文化
國家領導人： 國家元首（總統）：弗拉基米爾·普京 政府首腦（總理）：梅德韋傑夫
經濟實力
貨幣單位	盧布
GDP	1.60 千億美元（列第9位）
人均GDP	11,209 美元（列第61位）
中央銀行	俄羅斯中央銀行
國家資料
國家象徵	國花：葵花
國際域名縮寫	.ru
國際電話區號	+7
編輯

俄羅斯聯邦（Российская Федерация），簡稱俄羅斯，也叫做俄國（Россия），老早也叫做俄羅斯，是世界浪面積頂頂大个國家，地跨歐亞兩大洲。俄羅斯聯邦搭下底幾個國家夾界（逆時針方向）：挪威、芬蘭、愛沙尼亞、拉脫維亞、白俄羅斯、立陶宛、波蘭、烏克蘭、格魯吉亞、阿塞拜疆、哈薩克斯坦、中華人民共和國、蒙古、朝鮮，搭日本、美國、加拿大隔海相望。綿延个海岸線從北冰洋一徑延伸到北太平洋，還包括內陸海黑海搭裏海。作為前蘇聯主要加盟共和國，俄羅斯聯邦原是一個蠻有影響力个國家，特別勒勒由12个前蘇聯加盟共和國組成个獨聯體組織里向。1991年，蘇聯解體，俄羅斯繼承蘇聯，成為聯合國安全理事會（安理會）常任理事國，並對議案擁有否決權。

歷史

俄羅斯頂早个政權是維京人建立个基輔羅斯公國（Киевская Русь）。伊拉接受拜占庭帝國个東正教，成為伊拉區別西面天主教民族个一個重要標誌。老早个留里克王朝是三個北歐人建立个。從迭个辰光開始，俄羅斯文化就帶有老強个外來色彩。

基輔羅斯是一個大國，大公通過封建統治个方法，拿國土分把伊下頭个貴族，從11世紀開始，大公个權利被削弱，出現交關半獨立个公國，弗過來勒迭个辰光，俄羅斯人搭後來个烏克蘭人、白俄羅斯人還沒啥大个區別。

蒙古殖民

到13世紀初期个辰光，基輔羅斯撥蒙古人征服，蒙古人來勒南俄羅斯草原建立了金帳汗國，對俄羅斯个小邦國展開 統治，迭个統治持續了交關年數，也成為俄羅斯歷史發展个一個轉折點。因為金帳汗國沒辦法控制所有个基輔羅斯地區，來勒現在个烏克蘭搭白俄羅斯地區，逐漸成為無主之地。有西面个波蘭王國搭立陶宛大公國開始殖民統治。東面个諾夫哥羅德地區，一直來勒蒙古人个統治下，受到蒙古人交關影響，從迭个辰光開始，俄羅斯个歷史文化開始有自家个特色。

第三羅馬

中世紀後期俄羅斯中部个一個貴族建立莫斯科大公國，迭个國家來勒14世紀末擊敗金帳汗國，開始自治，15世紀初開始逐步吞併周邊个邦國。到1453年拜占庭帝國滅亡後，莫斯科大公伊凡三世搭拜占庭个末代公主結婚，開始自稱是羅馬帝國个繼承人。又拿雙頭鷹作為國徽。開始加速吞併周邊个小國。15世紀末，又徹底脫離金帳汗國个控制，成為獨立政權。到伊个孫子伊凡四世辰光，通過繼承蒙古黃金家族个法統，實現凱撒搭大汗頭銜个疊加，隨後又對回教開展。滅脫了喀山汗國，阿斯特拉罕汗國，開始向東方擴張。弗過，迭个辰光个俄羅斯，還是一個落後个農業國，嘸啥西方个影響，穿着思想高頭儕相當於一個拜占庭搭蒙古人个混合國家。

兩個沙皇

緩慢前行

16世紀末，伊凡四世死脫之後，俄羅斯開始逐漸動亂。因為國內貴族个內鬥，引入西面大國波蘭、瑞典輪番干涉俄羅斯事物，釀成17世紀初个大危機。波蘭人開入莫斯科，扶植假沙皇，俄羅斯面臨亡國。到1612年，俄羅斯人民自發个愛國運動達到高潮，終於拿波蘭侵略者趕跑。讓羅曼諾夫家族登上皇位，從此開始羅曼諾夫王朝。17世紀个俄羅斯，是一個處於緩慢改革當中个國家，來勒軍事方面，搭迭个辰光交關內亞帝國一淘，訓練交關新軍。弗過來勒社會層面，還一經是老个一套，教會掌控教育，科學基本嘸，婦女地位低下。來勒領土擴張高頭，主要實現向東方个擴張，西伯利亞成為俄羅斯个領土。來勒西面，搭波蘭進行長辰光對立，從1630年到1670年，戰爭進行交關年數。頂大个收穫是拿烏克蘭个哥薩克控制到自家手裡向。1650年代，沙皇支持俄羅斯个新牧首尼康對教會進行改革，引發俄羅斯教徒老大个弗滿，造成教會分裂，一部分堅持老早禮拜方式個人，逃到北面，撥成為老信仰者。

帝國崛起

彼得大帝个改革，是俄羅斯歷史發展高頭个關鍵點。彼得對俄羅斯進行全面个改革，從衣着服飾到社交禮儀，還有軍事政治、教育科技，儕放棄老早个固有內亞傳統，強制性向西歐靠攏。為達到目的，彼得大帝通過鐵腕个方式讓弗跟隨伊个貴族收稅，罰款。又懲罰反抗伊個人，包括伊自家个兒子。同時，為獲得出海口，彼得大帝搭瑞典進行長辰光戰爭，被稱為大北方戰爭，戰後，俄羅斯獲得勝利，獲得芬蘭灣高頭个出海口，終於衝出內亞，向海洋文明發展。到18世紀初，彼得大帝又拿首都遷到聖彼得堡，創建科學院，貴族院，印刷報紙，開設博物館。從迭个辰光開始，俄羅斯開始成為一個真正意義高頭个歐洲國家。到18世紀20年代，俄羅斯開始正式號稱俄羅斯帝國。之後又拿土耳其、波蘭擊敗。並且成功反擊了拿破崙个入侵。1815年維也納會議後，俄羅斯成為歐洲主宰國家。弗過改革困難讓俄羅斯發展緩慢。1854年克里木戰爭个失敗，讓俄羅斯開始改革，解放農奴搭大博弈是迭个辰光个主旋律。1870年代，俄羅斯吞併中亞，又來勒與滿洲帝國爭奪內亞个交鋒中取得勝利。奪取外滿洲搭安集延地區。同時文化也邪氣發達，湧現了托爾斯泰,柴可夫斯基等大師。弗過國內个改革也帶來仔交關問題。極端主義搭自由主義思想泛濫。布爾什維克開始傳播。到20世紀，1904年个日俄戰爭當中个失敗，讓沙皇被迫改革，成立半責任內閣。頭一次世界大戰个辰光，俄羅斯勒軍事浪慘敗。接下去俄羅斯國內發生內戰，後首來十月革命勒1917年爆發。

之後朆有多少辰光，共產黨勒列寧領導下頭取得政權，蘇維埃社會主義共和國聯盟也由此成立。勒斯大林領導個辰光，蘇聯由一個農業國迅速工業化，並且實行農業集體化。第二次世界大戰當中對納粹德國个勝利，使得蘇聯發展成冷戰當中个超級大國（還有一個是美國），並侵占中國唐努烏梁海、黑瞎子島等蕩化，而且策劃外蒙古脫離中國獨立。到仔1980年代末期，蘇聯進行多項改革，但是原朆有辦法改變1991年解體个命運。搿一年个8月24號，俄羅斯蘇維埃聯邦共和國宣布獨立，成為俄羅斯聯邦。

解體之後

蘇聯解體之後，俄羅斯遭受老強烈个動盪，來勒經濟方面，葉利欽採用西方經濟學家教導伊个休克療法改造老早个國有經濟，弗過執行老弗成功，大部分財富儕沒落到國家或者老百姓手裡向，反過來培養一批靠投機倒把致富个寡頭。這些寡頭，大部分儕是經濟轉型辰光有心計個人，通過各種手段獲得國有資產或者資源，又通過混亂个政治局面獲得上台个可能，拿自家洗白，所以1990年代末，俄羅斯个財富大部分儕來勒伊拉手裡向。俄羅斯个經濟則一塌糊塗，弗僅服務業發展嘸成效，就是老早強力个重工業也徹底蕭條。人民生活條件推板，國力迅速下降。葉利欽為平衡經濟問題，弗斷任命新个官員，執行新个政策，弗過因為蘇聯後期个問題積累搭獨立後个用人弗當，讓俄羅斯經濟一直弗好。

來勒國內局勢方面，因為老早个共產主義價值觀崩潰，造成一些被打壓交關辰光个民族主義、極端宗教思想抬頭，光頭黨搭新納粹成為交關年輕人个選擇。來勒一些回教地區，宗教搭民族主義合流，成為分離主義个標誌。尤其嚴重个車臣戰爭讓俄羅斯軍隊个虛弱暴露，也讓俄羅斯陷入反對恐怖主義个泥潭當中。

到2000年，普京接任總統，採取權威主義个統治方式，對恐怖分子採取高壓，又打擊經濟寡頭。促進俄羅斯个能源出口，來勒幾年之內，讓俄羅斯逐漸穩定下來。弗過，俄羅斯个貧富差距並嘸縮小，一些邊遠地區人口弗短減少，經濟結構也主要以出口能源為主，國際競爭能力弗是老強。普京努力克服這些問題，又來勒世界高頭維護俄羅斯个大國地位。為此，搭弗斷擠壓自家空間个西方國家發生好幾趟衝突，比方2008年个格魯吉亞衝突搭2014年个克里米亞衝突。2014年俄羅斯吞併克里米亞之後，又搭烏克蘭爆發新一輪个衝突。搭歐盟以及美國个關係也逐步緊張。

地理

俄羅斯聯邦跨越歐亞大陸个北部大部分地區，地勢及氣候變化多端。全境大部分地區屬於平原，特別是歐洲部分搭仔亞洲个西伯利亞地區。南部平原大部分是干曠草原，而北部平原則大部分是森林地區。山脈多集中勒南部邊境，像大高加索山脈搭仔薩彥-貝加爾山脈。比較中央个烏拉爾山脈是歐洲搭仔亞洲个主要分界線。

俄羅斯聯邦擁有綿延37,000公里个海岸線，跨越北冰洋搭仔太平洋，以及內陸个黑海搭裏海。有星小个海域則屬於大洋个一部分：巴倫支海、白海搭東西伯利亞海屬於北冰洋，而白令海搭仔日本海等則屬於太平洋。

交關大河流經平原到達海洋。主要河流包括伏爾加河、顎畢河、葉尼塞河、勒拿河以及阿穆爾河（即黑龍江）。主要湖泊有貝加爾湖、拉多加湖搭奧涅加湖了啥。

• 俄羅斯城市列表

政治

俄羅斯聯邦實行个是聯邦民主制。總統是國家元首，任期4年，由人民直接選舉產生。總統有相當大个行政權力，有權任命總理等高級官員，但必須經議會批准。總統同時也是武裝部隊个首領搭國家安全會議主席，還好弗經過議會直接頒布法令。

俄羅斯聯邦議會，簡稱聯邦議會（Федеральное Собрание），由上下兩院組成。上院聯邦會議（Совет Федерации）有178名代表，任期4年，89个地方分區可以任命2名代表，下院國家杜馬（Государственная Дума）有450名代表，任期4年，其中225人由國民代表大會選舉產生，還有225人則按比例登全國政黨當中選出組成。

行政區

參見：俄羅斯行政區

俄羅斯聯邦由89个弗同个行政分區組成。聯邦有21个享有交關自由个共和國。該星共和國往往是俄羅斯聯邦个少數民族聚居區。剩下來个行政區包括49个州（Области ）搭6个區（Края）。當中有10个自治區域搭1个自治州。除此之外，還有兩個聯邦城市，莫斯科搭聖彼得堡。2000年，按照總統普京个指示，俄羅斯聯邦再分作7个按地域分界、包含行政分區个聯邦區域。

經濟

蘇聯解體仔个十來年當中，俄羅斯聯邦還勒浪用勁把力建立現代化个市場經濟搭仔實現較強个經濟增長。俄羅斯聯邦行政搭立法機構也意識着，國家个工業基礎搭仔進一步个改革面臨嚴重問題，並且使得俄羅斯聯邦个經濟勒蘇聯解體仔連甩5年下滑。

1997年俄羅斯聯邦經濟有星復甦。1998年个財政危機導致當年8月盧布貶值，債務加劇以及人民生活水平嚴重下滑。必過勒1999到2001年當中，憑藉較高个石油價錢搭仔疲軟个盧布，俄羅斯聯邦个經濟再度復甦，平均每年增長6%。

該次个復甦，再加上新政府對基礎經濟進行个改革，已經提升仔投資者對俄羅斯聯邦个信心。尚況俄羅斯聯邦還是交關倚賴天然資源出口，特別是占總出口80%个石油、天然氣、金屬搭仔木材。

2005年底，俄羅斯國民生產總值由1999年个1570億美元恢復增長到約7500億美元，黃金外匯儲備由1998年底个弗滿100億美金增長到1822億美金。

人口

請參見：俄羅斯人口

俄羅斯2006年人口1.42億。人口持續減少，每年減少約70萬，主要原因是擔心住房、醫療搭教育問題，大多數俄羅斯家庭選擇只養一個小人。長年個人口下降，成為俄羅斯一個嚴重个社會問題。自從普京擔任總統後，迭个問題一直受到伊个重視，一直出台大量个刺激政策，鼓勵大家多生養小人。並且控制酒類銷售，增長男人个壽命。到2013年，俄羅斯人口終於實現正增長哉。

由於俄羅斯聯邦幅員廣闊，所以人口密度較低；大部分人口主要儕住勒垃俄羅斯聯邦个歐洲部分，烏拉爾山脈地區以及西伯利亞个東南部。俄羅斯聯邦內也有交關少數民族以及土著人口。總人口个80%以上是俄羅斯人，剩下來个包括巴什基爾人、車臣人、楚瓦什人、韃靼人、日耳曼人、烏克蘭人、達格斯坦人、朝鮮人、猶太人搭仔白俄羅斯人等。

俄語是唯一個官方語言，但是勿同个共和國經常拿自家个民族語言作為共和國內个官方語言。東正教是聯邦內个主要宗教，其他个宗教包括伊斯蘭教、基督教新教、羅馬天主教跟佛教等。

文化

請參見：俄羅斯文化

• 俄羅斯人列表
• 俄羅斯文學

• 俄羅斯詩人
• 俄羅斯大學列表
• 羅宋音樂家

宗教

請參見：俄羅斯宗教

東正教

俄羅斯東正教信徒分布

自從公元10世紀接受東正教開始，俄羅斯就一直是一個傳統个東正教國家。俄羅斯自從羅斯受洗後，就確立正教信仰。來勒沙皇統治个辰光，東正教搭沙皇作為俄羅斯民族認同个兩個核心，得到整个民族搭軍隊裡向个擁戴，東正教也起到安定人心，增強戰鬥力个作用。沙皇自認為是第三羅馬个皇帝，東正教也認為俄羅斯一定會統治全世界。弗過因為沙皇拒絕教會對伊權力个挑戰，教會一直作為皇權个附庸存在。

到蘇聯辰光，東正教受到迫害，交關教堂被拆脫，僧侶被殺脫。一直到斯大林死脫之後，才對東正教稍許有放鬆。弗過一直有嚴密个監視。

到蘇聯解體後，東正教開始全面復興，恢復伊拉來勒歷史高頭个地位。現在俄羅斯个總統、總理儕是東正教信徒，東正教人口每年儕來勒增加，並且搭俄羅斯个民族意識聯繫邪氣緊密，成為俄羅斯人替代共產主義个寄託。近年个統計顯示，俄羅斯个東正教信徒比例已經超過百分之四十。

回教

俄羅斯現在有一千多萬回教人口，多數是韃靼斯坦搭中亞地區个居民。回教來勒歷史高頭是金帳汗國个宗教，對俄羅斯个存亡產生過老長辰光个威脅。現在俄羅斯人對回教還是弗大有正面評價。穆斯林搭俄羅斯人个衝突一直比較緊張。老著名个車臣問題，就有回教个因素來勒里向。2014年烏克蘭衝突中，就有交關來自車臣个穆斯林為烏克蘭政府軍作戰，新成立个ISIS也威脅要攻擊俄羅斯，作為俄羅斯打擊車臣个「報復」。

傳統信仰

俄羅斯老早是多神教崇拜民族，來勒羅斯受洗後，多神教消失。弗過蘇聯解體之後，交關俄羅斯人開始追尋祖先个信仰。現在俄羅斯有170多萬傳統信仰個人口，是國內第三大信仰派別。

佛教

俄羅斯个佛教信徒大部分是老早个蒙古人。伊拉信仰个佛教，是16世紀開始傳播个格魯派藏傳佛教。現在，俄羅斯个卡爾梅克共和國是歐洲唯一以佛教為主要宗教个實體國家。

• 
  俄羅斯正教十字架
• 
  海外个俄羅斯教堂
• 
  Lidcombe Russian Orthodox Church
• 
  梅德韋傑夫來勒喀山會見回教領袖

軍事

蘇聯解體仔，俄羅斯繼承着蘇聯个大部分軍事力量，成為有世界影響个軍事強國之一。俄羅斯正規軍由陸軍 、海軍、空軍、國土防空軍搭仔戰略火箭軍組成。有規模龐大个核武庫，根據其官方勒2005年宣布个結果，俄羅斯个核彈頭數量為：4732枚。

外交關係

• 中俄關係

俄羅斯帝國原是歐洲國家，搭中國弗隔界。俄羅斯帝國自清代以來，占領中國交關領土，是占領中國領土頂頂多个國家。畀俄羅斯帝國占領个中國領土包括（自東向西）：庫頁島、烏蘇里江以東土地、黑龍江北至外興安嶺土地、貝加爾湖以東土地、唐努烏梁海等。另外，俄羅斯帝國勒外蒙古獨立事件當中起過關鍵性个作用。

勒20世紀个壓末幾年，中俄兩國政府勒黑瞎子島劃定邊界，中國收回畀俄羅斯實際控制个該島个一半，另一半划進俄羅斯疆界，歷史Template:Lang4Template:Ga个島是屬於中國个。

由於俄羅斯个原因，蒙古搭仔巴爾喀什湖以東、以南个交關蕩化也不再是中國領土。

透過中俄多次磋商搭仔簽訂協定，2004年《中華人民共和國和俄羅斯聯邦關於中俄國界東段的補充協定》後，兩國勒領土爭端浪个問題大致浪解決（zai1）。中俄兩國現處於持續發展戰略搭仔經濟友好關係。

參見俄美關係搭仔俄日關係

自從日本勒第二次世界大戰里向撥蘇聯佔據北方四島，兩個國家還朆簽訂和約，理論（lang4）兩國還勒浪作戰對抗。自1990年代葉利欽作為俄羅斯聯邦總統，日俄開始對北方四島進行談判，（bg）雙方分歧還是勒浪。

其他主題

• 俄羅斯通訊
• 俄羅斯交通
• 俄羅斯軍事
• 俄羅斯外交
• 俄羅斯旅遊
• 俄白聯盟

外部鏈接

維基共享資源里向尋得着搭該篇文章搭界个多媒體資源：

俄羅斯

• Gov.ru - 俄羅斯聯邦官方網站

參考資料

八國集團 (G8)

 加拿大   法國   德國   意大利   日本  俄羅斯  英國   美利堅合眾國