元朝

元朝地图

元朝是蒙古人控制东亚地区后建立个帝国主体。元朝是东亚儒家文人为标榜伊拉个正统性把伊拉个称呼，迭个“朝代”搭老早个帝国侪弗一样，是第一趟完全由没有接受儒家文化个外来民族对整个东亚（除脱日本之外—）进行统治。1271年被认为是伊拉建立个年份1368年退出东亚核心地区，弗过一直保留帝国称号，到15世纪初才彻底灭脱。蒙古统治辰光是东亚历史发展个转折阶段，老早个中古文明被异化，形成深受内亚游牧影响个新帝国组成方式，对后头个明帝国、清帝国侪有老大个标榜作用。

元朝是蒙古四大汗国一道尊奉个宗主国，是大蒙古国个正统继承者。元朝皇帝接见外臣个辰光，身着五色衮服，头戴十二旒冕，称号是天朝上国，采用儒家制度，也尊奉藏传佛教为国教。

国号

蒙古人对元帝国个称呼，是“大蒙古国”。来勒中原地区，被统治个“汉人”搭“南人”对伊拉个称呼又弗同，习惯使用官方把伊拉个“元”来称呼。元帝国个汉文国号“大元”来自《易经·乾卦》当中个“大哉乾元，万物资始，乃统天”。元帝国也是东亚历史高头第一个把“大”字加到正式国号当中个帝国。弗仅如此，元迭个字，搭老早个分封国家没任何联系，这也为之后明作为国号提供正当性。讲到元朝个蒙古文国号，有多种称呼：

① 正式文献当中有称呼叫做“大元大蒙古国”（Dai Ön Yeqe Mongɣul Ulus），迭个名称可以从1362年个《追封西宁王忻都碑》当中看到。其中“Dai Ön”系汉语“大元”的蒙古语音译，“Yeqe”是蒙古语“大”的意思，“Mongɣul”是“蒙古”个意思，“Ulus”是“国家”个意思。。

② “被称为大元个大蒙古国”（Dai Ön qemeqü Yeqe Mongɣol Ulus），其中“qemeqü”是一个书面语联动词，是“说”、“据说”个意思。此名称见于1338年的《达鲁花赤竹温台碑》。

③“大元国”，蒙古语：“ᠳᠠᠢ
ᠦᠨ
ᠦᠯᠦᠰ”（鲍培转写：Dai Ön Ulus，西里尔：Дай Өнь Улс）或者“ᠶᠡᠬᠡ
ᠦᠨ
ᠦᠯᠦᠰ”（鲍培转写：Yeqe Ön Ulus，西里尔：Их Өнь Улс）。其中“Dai Ön”是汉语“大元”一词的在当时蒙古语中的音译。但现今中、蒙两国学者多使用与现代汉语“元”字发音更相近的“ᠶᠤᠸᠠᠨ”（Юань）一词来替换原有的“ᠦᠨ”（Өнь），将元朝称为“ᠶᠤᠸᠠᠨ
ᠦᠯᠦᠰ”（Юань улс），或者“ᠶᠡᠬᠡ
ᠶᠤᠸᠠᠨ
ᠦᠯᠦᠰ”（Их Юань улс）。

历史

元武宗辰光统治内亚个蒙古各帝国

元朝个历史相当短，对东亚个有效统治也弗长。来勒忽必烈个辰光，还处于对外扩张个最后阶段。虽然灭脱南宋，弗过对东南亚以及日本个攻略侪宣告失败。到13世纪晚期，元帝国相对平稳。弗过西面个蒙古内亚权力斗争还是邪气激烈。到14世纪初，元朝差点被回教王子控制。还好伊被灭脱，否则东亚有可能成为穆斯林地区。到14世纪20年代，元帝国个混乱加剧，对各地个掌控也开始崩溃，出现交关流民搭地主主持个反抗军事力量，比方讲：张士诚领导个江淮反抗力量，方国珍领导个浙东反恐力量。元帝国对伊拉弗哪能重视，伊拉内部权力斗争还来勒继续，到1340年代，黄泛区个红巾军以及荆州地区个徐寿辉等开始反叛。因为伊拉受到内亚文化个影响，烧杀比江浙结棍交关，元帝国弗得弗对伊拉进行围剿。弗过力道有限，来勒福建地头，回教商人霸占泉州，建立回教酋长国。到1350年代，朱重八来勒斗争中通过心狠手辣脱颖而出，来勒1360年代初先后残酷消灭陈友谅搭苏州个张士诚，又逼降方国珍。建立大一统帝国形态。到迭个辰光，元帝国还是没拿出啥抵挡个策略。到1367年，改名叫朱元璋个淮西乞丐朱重八一面宣告天命所归，一面派徐达北上，蒙古人没哪能抵抗，侪跑脱，徐达进入大都，明帝国确立东亚核心地区个统治，开始自称朝代更迭。弗过之后元帝国来勒北面又维持半个世纪，一直到1410年代才因为技术水平个倒退搭西蒙古个骚扰自家削脱皇帝称号。

版图

合赞印，是元帝国元成宗颁把伊儿汗国合赞汗，承认伊统治伊儿汗国个独立性，高头有“王府定国理民之宝”个汉字。

元朝是蒙古帝国来勒东亚个继承国，元朝个疆域基本面，是忽必烈奠定个。伊被蒙哥命令，管理黄河流域地区、中途还到西南地区灭脱大理国。个辰光，忽必烈个领地还属于统一个蒙古帝国个一部分。弗过，因为蒙哥来勒攻打钓鱼城辰光死脱，让忽必烈看到继承大汗个机会，就回到蒙古草原，搭伊自家个阿弟阿里不哥争夺大汗宝座。这场战争让四大汗国分裂，侪弗受蒙古大汗个管制，蒙古帝国作为一个实体，从此消失。

1279年元世祖来勒建立元朝之后向南进攻，灭脱南宋，全盘接管原宋朝疆域，个辰光元帝国个疆域范围是：北面到西伯利亚南部，超过贝加尔湖，南面到南海，西面征服西藏、云南，西北到新疆东部，东北面到外兴安岭、鄂霍次克海、日本海，库页岛也是统治范围，总面积超过1300万平方千米。自灭亡南宋后，蒙古人多次想拿日本、缅甸搭爪哇等国纳入殖民统治范围，但侪失败，领土扩张终结。1309年元武宗辰光，元朝搭察合台汗国一道灭脱窝阔台汗国，元帝国取得窝阔台汗国东面个一些领土，领土超过1400万平方公里。元帝国还有一些藩属国，包括：高丽、缅甸、安南、占城、爪哇及钦察汗国、察合台汗国、搭伊儿汗国等国。北面有漠北诸部、南面有南洋诸国、西有四大汗国。其中有两个是直属个藩属国，是高丽王朝搭缅甸蒲甘王朝，分别建立征东行省与缅中行省。

西北方面，1268年，窝阔台汗国个海都为成为大汗，联合钦察汗国搭察合台汗国反对元帝国，这就是海都之乱。一直到1304年元成宗辰光，元帝国搭这三大汗国达成和议，并搭伊儿汗国一同承认元朝个宗主地位，成为元朝个藩属国，弗过并非领土，元帝国个行政机构（如行中书省搭宣政院）也没权利管辖这些领土。元成宗赏把伊儿汗国君主刻有“真命皇帝和顺万夷之宝”等汉文印玺，高头上也承认伊拉个独立性。到1309年元武宗辰光，元朝和察合台汗国先后灭脱窝阔台汗国，所以，到元文宗年间编纂《经世大典》个辰光，拿钦察汗国、察合台汗国与伊儿汗国作为元朝的藩属国。

对外关系

元武宗辰光元朝搭周边势力局势图

元帝国个内亚属性，让伊搭周边呒畀伊侵略成功个势力发生交关关系，立在忽必烈之后，侵略事体减少，各地派遣个使节、传教士之类开始固定化，个当中，威尼斯共和国个商人马可波罗成为代表人物。蒙古帝王为扩张版图，立在元朝开始辰光，对周边一些势力，比方讲：日本、安南、占城、缅甸、爪哇）进行侵略，弗过除脱灭宋之外，侪失败。

高丽

元帝国立在东北亚个统治从吞并金国个传统势力范围之后开始，之后，就对高丽王朝搭日本国镰仓幕府进行攻略，。高丽王朝从10世纪就开始统治朝鲜半岛，到12世纪，逐步成为武人政权统治个傀儡。1250年代，蒙古无缘由对高丽开战，弗过高丽抵抗激烈，王室迁徙到外海个江华岛继续抵抗，蒙古一直朆完全征服高丽。所以，到1270年代挨末阶段，蒙古改变策略，采取怀柔，让高丽王室成为自家个藩属国，设置征东行省，高丽高宗遣子称臣。

日本

武士末永氏力战元军，竹崎季长绘《蒙古袭来绘词》（1293年）

从12世纪挨末阶段开始，日本个统治权就转移到日本武士贵族个手里向。到13世纪，出身清和源氏个源赖朝立在镰仓开幕，建立自家个幕府势力。到1270年代，统治日本个是北条氏个当主北条时宗。个辰光，元帝国已经基本拿南宋灭脱，就开始大局讨伐日本。元世祖忽必烈六次派使者要求日本朝贡，侪失败，于是老羞成怒，发动蒙古袭来。1274年蒙古人搭伊拉个仆从高丽军队，发动第一趟侵日战争，先屠杀对马岛个日本老百姓，又到九州岛个博多湾登陆，弗过呒几天就遭遇台风，畀灭脱。1281年七月，忽必烈灭脱南宋之后，又发动第二趟侵日战争，日本史书拿迭个战争叫做“弘安之役”，个趟，为克服之前个吃亏，让南宋个范文虎、李庭率南宋降卒十万人，先到次能、志贺二岛。弗过，因为个趟日军有所准备，侵略兵力又遇到台风，最后又惨败。通常认为台风（日本人称之为“神风”）搭元军不擅水战是造成失败个主要原因。之后，元世祖又准备搞第三趟侵日，弗过因为个辰光元帝国又立在侵略安南，所以呒重新发动。元帝国之后搭日本个民间贸易一直持续，弗过官方接触就聊胜于无哉

安南搭占婆

陈兴道蒙越战争中越南陈朝的大将，图为胡志明市的陈兴道雕像。

东南亚个辰光有安南（陈朝）、占城搭爪哇（满者伯夷）等邦国。安南国是五代十国辰光从南汉独立出来个，到13世纪已经发展成自成体系个国家。蒙古大汗蒙哥立在1257年派兀良哈台侵略安南，蒙越战争爆发。越南个陈太宗畀蒙军击败，上表称臣，蒙哥封伊做安南国王，弗过陈太宗死脱之后，越南个新过往陈圣宗弗欢喜向元朝跪拜。当时在安南南方个占城国，1282年占城国王因陀罗跋摩六世遣使朝贡，忽必烈大喜，搞出一个荆湖占城行中书省，让自家个亲信阿里海牙做迭个行省个平章政事。弗过，占城王扣留这些殖民者，让忽必烈大怒，伊拿迭个当做理由，调动军队，分水陆攻打占城搭安南。伊命令唆都派水卒从广州渡海攻打占城。隔年，蒙古个侵略军攻下占城国王个大本营，占城国王因陀罗跋摩六世求和，弗过，蒙古退兵后又反抗。1284年忽必烈又派镇南王脱欢、阿里海牙与唆都率陆军借道安南侵略占城，个辰光，安南个太上皇陈圣宗公开反抗蒙古侵略并，战争爆发。蒙古殖民部队大举烧杀，占领安南首都。弗过陈圣宗、陈兴道统辖陈军积极抵抗，同时因为气候让蒙古个内亚大汉吃弗消，1285年侵略军队开始撤退，途中畀安南军袭击，伤亡惨重。1288年，忽必烈又对安南进行侵略，个趟，再次失败，随后安南请和。这场战争到元成宗才废止。元朝对东南亚个侵略已失败告终。

外部链接

• 《元史》全文：(简体)
• 《中国大百科全书》：元朝