严复

严复（1854年1月8号－1921年10月27号），乳名体干，初名传初，改名宗光，字又陵，后名复，字几道，晚号“愈壄老人”，闽越侯官人（后并入闽县，称为闽侯，今朝福州市）人。19世纪东亚有名个洋务人士，翻译家，顶早一批留学英国格林威治皇家海军学堂个中国人。是京师大学堂搭复旦大学早期个校长之一，也是拥护袁世凯登基个筹安会六君子之一。

伊顶大个贡献，是第一趟用文言文，系统性拿19世纪欧洲文明当中个社会学、政治学、政治经济学、哲学搭自然科学翻译介绍到东亚大陆，伊个翻译当中，有名个作品包括《天演论》、《原富》、《群学肄言》、《群己权界论》、《社会通诠》、《法意》、《名学浅说》、《穆勒名学》等。个类书在拉个辰光个影响邪气大，基本是人手必读，也是晚清挨末阶段顶重要启蒙翻译读本。严复个翻译用词考究、论据严谨，号称经深思熟虑，弗过，交关用词当今已经畀后势来更流行个外来语替代。