道教

道教是对东亚传统萨满崇拜规范化个称呼，盛行于个中原地区。传统认为春秋辰光个老子是道教个创始人。弗过现在看来东汉末年才是道教真正形成个年份。道教包括了炼丹搭修炼等内容，本质上体现了老子无为而治个思想。弗过南北朝辰光，道教为了搭佛教抗衡，也发明借鉴了交关神仙。因此到了唐代之后，道教就是一门结合了民间信仰搭道家学说个双重宗教了。

历史

道教作为中国个传统宗教，有交关长个历史。

兴起

东汉挨末阶段，道教开始广泛传播。个辰光，道教有两个派别，一个是张道陵创建个五斗米道，一个是张角创建个太平道。太平道通过张角个宣传，来勒黄巾起义当中闻名天下，弗过，也来勒起义失败之后消声匿迹。之后，五斗米道独传。五斗米道尊奉张道陵天师。所以，迭个教派又叫做天师教。

兴盛

道教来勒六朝搭唐宋顶为兴盛。西晋开始有大量门阀贵族皈依道教，如著名个王羲之、谢安等，侪是虔诚个道教信徒。来勒魏国搭西晋个首都洛阳，有交关贵族欢喜对坐清谈，内容大部分是搭道教相关个。五胡乱华之后，衣冠南渡，北方个道教文化来勒江东发展。李唐王朝因为政治需要，将老子捧为伊拉个祖宗。道教因此成为唐朝事实上个“国教”。宋代道教继续发展，宋徽宗自封道君皇帝。

波折搭衰落

道教来勒蒙古帝国统治辰光，因为教义搭做法个弗同，逐步分裂城北方个全真派搭南方个正一派。明朝辰光道教受到一些帝王个推崇，稍许恢复一点元气。张三丰修行个武当山成为护佑国家个圣山。弗过程朱理学个逐步兴盛让道教丧失了对文化人群体个传统吸引力，地位下降老快。明帝国个嘉靖帝曾经修炼仙丹，信任道士。弗过立在伊斯脱之后，道教个影响又老快畀清除。

进入清朝，因为道教代表明朝辰光个关内文化，所以，受到满洲统治者个忌惮，因此更遭打压，嘸上层青睐个道教，个辰光彻底沦为一种民俗信仰。并且搭汉传佛教相互结合，成为现在大部分人心目中“传统信仰”个代表。

门派

道教历史上产生了交关门派，弗过现在基本只有两只了，一个是全真派，一个是正一派。