عمر طاهر

“.........................................

1. الكذب المنزلى يبدأ مثل شرخ فى الجدار، كذبة تلو الأخرى و شرخ تلو الآخر ستجد نفسك فى بيت آيل للسقوط فى أقرب فرصة ،كذبة أخرى و ستحتاج إلى معجزة للخروج سليما من تحت الأنقاض.

2. (العيب فيكو يا حبايبكو) لأن الحب أعمى أصلا.

3. (ماما زمانها جاية) بدأت كجملة تبعث للطمأنينية، و لسبب ما أصبحت الآن جملة تحذير.

4. أسوء ما فى بطاقات الرقم القومى المصرية أنها – بعد الحصول عليها- لا تقدم لك خدمات ما بعد البيع.

5. طول الوقت بيخوفوا الواحد من السباحة ضد التيار، مع إن الغرقان ببساطة هو شخص (سحبه التيار).
6. أجمل ما فى الزواج أنه يصنع لك جذورا فى الحياة، و تقريبا هذا هو أسوء ما فيه أيضا.
7. لو كان سيدنا آدم هو اللى خرج من ضهر ستنا حواء، لكانت أمومة ستنا حواء كفيلة بمنعه من أكل التفاحة ... هذة قصة حياة أمهاتنا كلهن.
8. سلعة الكاتب ( الونس) و عملته ( المحبة).

9. خوفى من أبى يشبه خوف الوزير من غضب رئيس الحكومة و خوفى من أمى يشبه خوف النجم السينمائى من غضب الجماهير.

10. ليست صدفة – فى مصر- أن بعض المرضى بعد تسريحهم من مستشفى الأمراض العقلية يفضلون التواجد فى الشارع لتنظيم المرور، هو لا ينظم المرور هو يبحث عن عقله فى المكان الذى فقده فيه.

11. ستعرف الكثير عن كل شىء إذا أجبت عن سؤال واحد، أين الآن أوائل الثانوية العامة فى مصر على مدى الخمسة و عشرين عاما السابقين، كم واحد منهم تضعه الدولة فوق رأسها، و كم واحد منهم (ماشيين جنب الحيطة).

12. صح و غلط.. حط الإجابه جوه القوس .. اخترت صح.. بس الغلط في الإختيا

13. العاديون ..هم الذين يحفظون للمجتمعات توازنها، هم الذين يعرفون طريق الأمان حتى ولو لم يكونوا قد اختبروه إلى النهاية.. لكنهم شطار جدا فى وضع رتوش لوحة حياتك، يضعون ملامح عامة يحفظونها جيدا ويتناقلونها جيلاً بعد جيل، يشيعونها بهدوء وبثقة ودون خطة منظمة، يرمونها لك فى الحوارات العابرة بعد انتهاء صلاة الجمعة ويتركون لك حرية الجنون داخل هذه الحدود شرط ألا تحطمها .

14. خُلقت القهوة لنستمتع بمرارتها ، مثلما خلقت الفاكهة لنستمتع بحلاوتها ، لو كانت الحكمة تقضى ان نشرب القهوة محلاة لخُلِقت حلوة ، من المغفل الذى يفكر فى تخليل حبات المانجو؟.

15. سألنى عن أغرب حادثة سمعت عنها ، فقلت له قرات يوما مانشيت يقول ( قال له يا ابن العبيطة فمزق جسده بالمطواة) ،سألنى عن سر دهشتى فقلت له أن المجنى عليه كان يعرف من الأول أن الجانى ابن عبيطة .. يعنى ماكنش فيه أى داعى للإحتكاك!

16. عندما زار سيادة المحافظ لجنة إمتحان الفيزياء ليتأكد أن الإمتحان فى مستوى الطالب المتوسط ، قلت للمحافظ يومها أن الإمتحان جاء من الجزأ الملغى من المنهج فربت على كتفى و ابتسم قائلا القانون لا يحمى المغفلين ، لذلك عندما سألنى والدى عن سر رسوبي فى المادة قلت له بضمير مستريح ..لا تعليق على أحكام القضاء.

17. ندم الآخرين مدرسة يدفع الأساتذة مصاريفها الباهظة بينما تتعلم فيها مجانا.

18. الوقت أغلى حاجة ببلاش .

19. يتعلم الأطفال العوم أسرع من الكبار لأنهم لا يتوقفون عند الخوف من الغرق.

20. المأذون: ضابط مرور مهمته أن يجعل حياة الرجل (اتجاه واحد)، والديمقراطية: أن تشترى التليفزيون الذى تختاره زوجتك، وتجعل الريموت كنترول فى يدك طول الوقت، والعزوبية : (العذاب ) الذى لا يعرف الرجل قيمته إلا بعد أن يتزوج،والشفافية : المبدأ الذى تختار به الزوجة قمصان نومها فى ال ( هانى موون)إلى أن تحدث الوفاة الإكلينيكية) وهى اللحظة التى تتحول فيها فى عيون زوجتك من (ذكر) المنزل الى( لا والله الحاج لسه نايم).

21. فى مصر ممنوع الإعتراض على الحكم أو الحاكم ..ووجه الشبه بين الأثنين فى مصر أن كلاهما قد يحتاج إلى الشرطة لتأمين خروجه من الملعب.
22. ممنوع التعليق على شيئين.. الأغانى التى يستمع إليها قائد التاكسى الذى تركبه و أحكام القضاء..ممنوع التعليق بالسلب تحديدا لكن ممكن تعلق بالإيجاب ، من الممكن أن تقول للقاضى "على الكاسيت يا أسطى" و من الممكن أن تهتف فى وجه السائق عند نزولك "يحيا العدل".

23. الواحد لازم يموّت نفسه علشان يعرف يعيش.

24. الألحان العظيمة سر نجاحها النقلات الموسيقية فمهما كانت الجملة رائعة ستفقد حلاوتها مالم تتوقف فورا و تدخل فى جملة جديدة، هكذا يتحسن أمر اللحن.

25. الكُتاب وحدهم يعرفون أن الأفكار فى كل مكان ماعدا غرفة المكتب.

26. الشخص الذى فتح الباب هو الذى اخترع الطريق.”
― عمر طاهر , شركة النشا والجلوكوز

“كانت لدى مشكلة فى كل مرة استمع فيها لأغنية أحمد منيب " آه و آه و يا فرحة قلبى ..كنت طير و صبحت مراكبى " فأسأل نفسى ماذا كان يقصد العم فؤاد حداد بهذا التشبيه ؟ ما الذى كان يدور فى باله عندما شعر بالفرحة لانه تحول من طير لمراكبى ؟سنوات وأنا أطارد نفسى وأصدقائى المثقفين بالسؤال دون إجابة شافية ، و اليوم وأنا أحمل طفلتى المتيقظة بوحشية بعد الفجر بقليل فى البلكونة محاولا منح أمها فرصة للنوم ، و بينما أغنى لها هذة الأغنية التى هبت فى عقلى بدون مقدمات عرفت الإجابة فقرأت الفاتحة فى سرى للعم منيب و العم حداد."كنت طير" أيام العزوبية محلقا من شجرة إلى أخرى و من سطح بناية إلى ناصية حقل ، و "صبحت مراكبى" أتحمل مسئولية شخصين معى على القارب نفسه فى بحر الحياة كل حلمى أن أحملهما إلى الشاطىء الآخر بسلام ، أما عن فرحة قلبى بهذا التحول فيالها من فرحة على مقاس القلب فلم أعرف فى حياتى كلها عملا أنبل من مساعدة شخص غريب فى عبور الطريق .. فمابالك بمن تحبهم ؟.”
― عمر طاهر كمين قصر العينى

“هذيان

.

هناك كلب ( خارب الدنيا هوهوه ) تحت البيت و مش عارفين ننام، باقول ل ابويا أعمل له عشان يروح يهوهو بعيد عنى؟ قال لى اعمل له أكاونت.

.

الفقير بيشتغل عند الغنى بأجره .و الغنى بيشتغل عند الفقير بفلوسه

.
قال صديقى: يا ليتنى كنت خواجة من المؤكد إننى كنت ساعرف طريق السعادة الزوجية بدون نصيحة من أحد، قلت له: الزواج هو الزواج فى كل مكان فى العالم، و دعنى أخبرك بملخص ما قاله الحكيم الخواجه الذى لا أتذكر اسمه عن الزواج، قال الحكيم الخواجة : "الجواز هو البدله اللى بتشتريها و تلبسها من غير ما تعمل لها بروفة، واكبر غلطه فى الجواز انك ماتعترفش انه غلطه، والفرق بين كراهية االعازب للجواز و كراهية المتجوز ليه زى الفرق بين الهواة و المحترفين ، والست مابتنساش يوم الجواز لكن الراجل بينساه لان الصياد بيفضل فاكر اليوم اللى اصطاد فيه سمكه كبيرة لكن السمكة مابتفتكرش حاجه خالص".

.

تقول القاعدة الشعبية الشهيرة أن ( الغايب حجته معاه )، وهى قاعدة تشرح من أين تأتى كل هذة الجاذبية التى تحيط ب (الغايب)، فهو الشخص الوحيد الذى يمتلك تفسيرا ما .
.

نعيش في أجواء غرائبية يمكنك أن تلاحظها مثلًا في صالة الجيم التي تم افتتاحها قريبًا من منزلي، وقد كتب على بابها: (المؤمن القوي أحب إلى الله من المؤمن الضعيف)، أو في صديقي الذي قال لي أنه يؤمن بالحكمة الأجنبية التى تقول : إن العوازل الطبية ليست دائمًا آمنة، فابن خالته كان يستخدمها لكنه مات في حادث سيارة، أو في صديقي الذي أرسل تلغرافًا لزميله في العمل يعزيه في وفاة والده قائلا: (ما حصلش حاجة!).
.

عندى ابن جيران شاطر جدا اتعلم الآذان فى المدرسة و حفظه صم .. طول اليوم كل نص ساعة يطلع يقف على كرسى فى البلكونة و يأذن بحماس و بأعلى صوت .. و ده بيلخص مشكلة التعليم فى مصر علموه الآذان و نسيوا يعلموه يأذن إمتى.

.
من ستر ربنا على الواحد إنه يعيش وسط الناس بس يتحاسب لوحده .

.

اللى بيمسك روحه علشان مايقولش إفيه سخيف. . دمه أخف بكتير من اللى بيقول افيهات حلوة .

.
اول ما تقدر تعود نفسك ماتعوزش حاجة ..هتلاقى كل حاجة بين ايديك .. وهتكتشف ساعتها ان مافيش حاجة تستاهل.

.

زمان واحد غلط .. فاتطرد من الجنة، دلوقتي..كل ما واحد يغلط فيك ، بتطرده من اللي إنت فاكرها جنتك .

.

قد تسأل ما هو الزى الرسمى للمصريين؟، و الإجابة أن الظروف صعبة التى نعيشها جعلت الزي الرسمي للمصريين هو: (لبس الشغل).”
― عمر طاهر شركة النشا و الجلوكوز

“لما كبرت شوية
اكتشتفت ان الوقت اللى قضيته في محاولة إنى أرضى الناس على حساب نفسى ضاع على الفاضى للأسف.

ضاع على الفاضى
لانى لا عرفت أرضى الناس و لا عرفت أرضى نفسى .

أقول لنفسى كنت بادور على ايه ساعتها؟
أقول كنت بادور على حب الناس بإنى أرضيهم .. أبقى زيهم
نسخة منهم فيحبونى.
و بعدين أرجع أفكر
هي الوردة البلدى الحمرا دى نسخة من الناس؟
لأ
أومال الناس حبوها ليه و هي مش شبههم؟
الناس حبوا الوردة البلدى الحمرا
علشان هي شبه نفسها.

قريت زمان حكاية كتبها باولو كويلو كاتب برازيلى مشهور
حكاية عن
واحد كان معزوم في حفلة في فندق
كان الشخص ده واقف في الحفلة يتفرج
كان الإحتفال زحمة
و ناس كتيره قاعدة على الترابيزات بتتكلم وتتناقش بصوت عالى
وناس واقفة تضحك و تهزر

وفى وسط الزحمة دى
كان فيه عازف بيانو
قاعد على البيانو بيعزف للناس
بس الناس مش سامعاه ولا شايفاه و لا بص ناحيته
ولا حتى حاسه بوجوده

كان واضح إن عازف البيانو محبط من الوضع ده
بس كان مضطر يكمل يحاول يلفت نظر الناس و يشوفوه و يحبوا اللى بيعمله.

فرب صاحبنا من عازف البيانو
وقاله بتلعب مزيكة ايه؟
عازف البيانو قال لصاحبنا: بالعب المزيكا اللى الناس بتحب تسمعه في الحفلات اللى زى دى .. علشان يتبسطوا بس ماحدش معبرنى
صاحبنا سأله: طب و انت بتحب المزيكا اللى الناس بتحب تسمعها في الحفلات اللى زى دى؟
عازف البيانو : قال له لا
صاحبنا قال له : طيب .. سيبك من الناس دى كلها
و جرب إنك تعزف لنفسك وبس ..
جرب على الاقل تستمع بأنك تلعب لنفسك المزيكا اللى بتحبها.

ضحك عازف البيانو
و قفل النوتة اللى بيلعب منها المزيكا اللى بتحبها الناس في الحفلات اللى زى دى
و باتدى يفكر هو عايز يلعب ايه لنفسه؟

و ابتدى فعلا يعزف لنفسه المقطوعه اللى بيحبها
بعد ثوانى من بداية العزف
سكتت القاعة كلها
و ابتدوا الناس كلهم يسمعوه بمنتهى التركيز.

دايما بافكر نفسى بحاجة مهمة

لو فيه ورقتين فلوس
شبه بعض جدا
شبه بعض لدرجة انهم عليهم نفس الأرقام
يبقى أكيد فيه واحده منهم مزورة
مالهاش قيمة.”
― عمر طاهر قهوة و شيكولاتة