MISIANGTHOTE TAWNTUNG BITNA

[The eternal security of the saints]

Rev. Tual Khan Pau@Sia Pausen

Lai siangtho in midik a cih ciangin mihingte hoihtawmna agen nuam hi lo a, Topa Zeisu pen ama
Honpa leh Topa a asang, a piangthakte, amawhna kimaisak a, diktan sakna ngah a, Khasiangtho
angahte misiangtho a kici ahi hi. Tua bang mite pen Pasian in diktansakna pia a hih manin tua bang
mite midik in kiciamteh hi (Rom. 4:3, 5; 5:10). Tua banga diktansakna angahsa mite Pasian in
misiangtho in ciamteh hi. Tua misiangthote nuntak tawntungna pia a, tua nuntak tawntungna in a
kitat ngei lo, a kisia ngei lo, nuntakna ahi hi. Pasian na sepna ahih nak leh tawntung tawh kisai hi. Ih
hat laitak, ih hoih laitak beka hong it hi lo-in ih hatloh laitak mah, ih lawp loh laitak na ngawn hong
it hi (Johan 3:16; Rom. 5: 6, 8). Anuai a bangin misiangthote bitna kikum dih ni.
I I. “Tapa a um mi in kisia lo a, nuntak tawntungna ngah” (Johan 3:16) hi cih kammal ngiat in
a gen nop thu tel gen mammah hi. Tua nuntakna pen kisialo, kitatlo, kitan lo, mong nei lo, tawp ngei
lo cih thu ahi hi. Tua a kisia lo a bei thei lo nuntakna pen mi khat in a up phetin ngah pah a, tan
kiklo, bei kik nawn lo ding ahih manin tua thu um mipa/minu a nuntakna bit mahmah hi (Johan
3:35).
II II. Topa Jesu ngiat in, “Pa in hong piak mi khempeuh ka kiangah hong pai dinga, ka kianga
hong pai mite ka hawlkhia ngei kei ding hi” (Johan 6:37) ci hi. “Amah in hong piak mite lakah khat
beek mansuah loin ni tawp ni ciangin ka tho sakkik ding hi,” (Johan 6:39) ci hi. Amah a muang a
um mite Topa in nitawp ni dong kembit sinsen ding hi. Tua banah, “Amaute nuntak tawntungna ka
pia a, a kisia ngei kei ding uh hi. Ka khut sung panin kuamah in hong sutkhia zo kei ding hi.
Amaute hong pia ka Pa in na khempeuh sangin lian zaw ahih manin ka Pa khut sung panin kuamah
in a hong sutkhia zo kei ding hi” (Johan 10:28-29).
III III. Kha Siangtho in mi siangthote adingin ih bitna aamakhan (guarantee) ahi hi (Ephesa
1:13,14). Mi khat a pianthak ciangin, Khasiangtho in ciamteh (seal) a, Pasian neihsa mi’ hi pahin,
pumpi tatkhiatna ni ciang dong ading Kha Siangtho tawh kiciamteh ahi hi. Tua pen Khasiangtho
malep zong kici hi. I bawngte a bil at kehin I ciapteh pen ei neihsa a ci ihi hi. Tua bangmah in
Pasian neihsa ih hihna lahna-in Kha Siangtho tawh a kiciamtehte pumpi tatkhiatna ni dong ading ahi
hi. Tua kiciaptehna ahang in Khazih ni ciang dong kisia lo a, Ama mai-ah ih kilak theih na’nga ih
aamahkhan (guarantee) ahi hi. Hong kiciapteh ni pan pumpi tatkhiatna ni dong manthan loh nading
ahi hi.
IV IV. Rom. 8:29, 30 a kammal thupi 5 ten misiangthote bitna hong hilh cian mahmah hi.
V A. Pasian in thu ummite hong THEIKHOL hi (foreknew). Hih theihkholhna pen hihpa hihnu
in hong um ding hi cih hong theihkholhna mawkmawk bek hi lo a, Pa Pasian in ama adinga hong
theihkholhna ahi hi. Hih in lei pian mapek a Pa Pasian in Ama adinga hong ciapteh kholhna ahi hi
(Jer. 1: 4, 5; Amos 3:2). Tua pen ei hoih leh hoihlohna tungah kinga lo a, Pasian i tawntung gelna
tungah kinga hi. Ama in lei pian ma pek a Ama sunga hong tel kholh ahi hi (Eph. 1: 4). Tua banah
“Nuntak tawntungna ngah dingin a kisehsa mite in a um uh hi” (Sawl. 13: 48) ci hi. I up theihna
nangawn hong sehkholh man ahi hi.

B. A theih kholh mite-SEHKHOL or LAITANKHOL hi (pre-destined). Seh khol or laitan

(pre-destined) cihna hi. A khiatna in mi khat a tuna ding mun asehkhol (pre-determined) pa in
Pasian ahi hi. Lei pian ma peka Pasian in thu-um mite Ama adinga, vantung tung dinga hong laitan
kholh hong ciangtan kholh ahi hi. Pasian lungsim sungah Ama adinga
 amite a lungsim khensat kholhna ahi hi. Pasian in i nuntakna a pat pan a tawp dong hong
sehkholhna, hong laitan kholhna thu ahi hi.

C. A sehkholh mite ASAM hi (call). Hih sapna pen atuam vilvela hong sapna (special
calling) ahi hi. Pasian in a theihkholh mite sehkhol a, a sehkholh mite sam hi. A kikal a lailut cih
bang om lo hi. Pasian in mite asap ciangin a kammal tungtawn ahi zong, ama nasemte in a thu
genna tungtawn ahi zongin, a lungtang khauhte natna, haksatna, buaina, inn sung sihna, dong tuahna
tungtawnin hong sam hi. Gentehna in Paul bang kaptukna tawh sam hi. Aw zol tawh hong sap lai ih
don kei leh a khauh mahmah tawh hong sam thei hi. Tua hun ma-in amah sang mengmeng in.

D. A sap mite DIKTANGSAK (justified) hi. Mihingte pen ei leh ei adiklo mi mawh vive ih
hi hi (Rom.3:10-18; 23). Tua bang mi mawh hi napi-in ei tang dinga si Jesu Honpa leh Topa a ih san
ciang ih mawhnate hong maisak (1 Johan 1:9) bek tham lo-in Pasian in dik hong tangsak hi. A diklo
pi mah a dikin hong sangin, ih mawhnate en lo-in, Topa Jesu tungtawnin hong mu ahih manin Jesu
pumpi (pawlpi) ah hong phumin Jesu hong silhsak hi (Gal. 3:27). Jesu silh ih hih ciangin Pasian in
hong et teh ei hong mu nawn lo-in, Jesu mu ahih manin ahoih a hong mu, ahoiha hong sang ahi hi.
Adiklo pi mah Jesu dikna hong tangsak ahih manin Jesu dikna ei adingin hong kisimsak ahi hi. Tua
pen simsak dikna (imputed righteousness) hehpihna hangin upna tawh angah ihi hi (Late 32:1-2;
Rom. 4:6-8). Pasian hong sehsak, simsak dikna (counted righteousness) angah ihi hi. Mi khat lai
ong lopi a siate in a onsak mawk tawh kibang ahi hi. Pasian in Jesu itna mitlimlang tawh hong et teh
ahoih dana hong mu hi zen veh Pasian hehpihna lian sa lua veng.

E. A diksakte MINTHANGSAK (glorified) hi. A theihkholhte sehkhol a, a sehkholhte sama,

asap mite diktangsak a, dik a tansakte minthangsak (Rom. 8: 30) hi. A pat pana a omte lamkal ah
sia, mangthang cih om lo a, hih kal nga sunga a om kha lote zong lailut thei tuan lo hi. Pasian in na
asep teh kician sinsen a, tangtawng pana agelsa bangin khat khit khat sem to sinsen hi. Ama nasep
ahih nak leh kitukkalh nemnum cih om lo a, a mun leh hun asiang sitset asem ahi hi.

Amisiangthote a minthansak ding Pasian tupna hi a, tua bangmahin amite in zong Amah a
minthansakkik ding a deih ahi hi. Pasian in amite aminthansak theih nadinga hong hotkhiatna kal
thumte en dih ni.
1) Mawhna thaman ahi sihna panin hong hotkhiatna (Saved from the penalty of sin) Rom 6: 23.
Mawhna thaman sihna i thuak ding hi napi Jesu in singlamteh tungah hong thuaksakna ei mah
mimal in um leng i mawhna hong maisak hi. Jesu na Honpa leh na Topa a, na san leh sihna pan pai
khia a nuntak tawntungna angah pah na hi hi (Johan 3:16; 5:24).

2) Mawhna vangliatna pan hong honkhia (Saving from the power of sin). “Mihingte thuak ngei ze-
etna…note thuak zawh loh ding azah val ahong ki ze-et dingin aphal kei hi….na thuak zawh
nadingun, suahtak nading lampi ahong bawl sak hi” (1 Kor.10:13).
3) Mawhna phual pan hong honkhia ding hi (He will save from the presence of sin). Tua ni ciangin
kimawh thei nawnlo ding hi. Bang hang hiam cih leh ih pumpi hong kitan khia zo ahih man hi
(Rom. 8:22, 23; 2 Kor. 5:2, 4). Hih pen Pasian in a hotkhiatsa a tate aminthansakna ahi hi. Tu laitak
in bel mawhna phualah om lai ihih manin mawh nuam ta kei leng kimawh thei lai hi. Ahi zongin
Pasian in hong minthansak ni ciangin mawhna mun pan hong tankhia khin ahih manin mawh thei
nawnlo ding, mawh nopna lungsim zong om nawn lo ding hi. Tua in thu um mite lametna lian pi ahi
hi. Hih hun pen thu umte bek hi lo-in Pasian piansak na khempeuh in ngakin thumin a om uh hi
(Rom. 8: 18-23). Hih ni pen pumpi tatkhiatna ni ahi hi. Tua ni ciangin tatkhiatna bukim (Full
redemption) I ngah ding hi.

“Hihte banah bang ih gen lai dinghiam? Pasian ei lam a pan leh ei langah kua pang zo ding ahi
hiam? Jesu itna tawh kua in hong khen zo ding hiam?....Ahi zongin hihte khempeuh tungah gualzo
pente ihi hi”(Rom. 8:30-37). Jesu itna pan bangmah in, kuamah in, hong khen thei, hong khen zo
peuhmah kei ding hi. Gualzo pente ihihna gentehna khat gen ni. Mike Tyson a boxing tupna-ah
gualzo in dollar million tampi tawh a innah hong ciah hi. A sumte azi a ap khit ciangin azi in a kisap
leh adeih teng gim loh tawl lohin lei ziahziah hi. Hih munah si leh nai tawh a gual zo pen Mike
Tyson hi a, gim lo pi a ama ngah sumte adeih banga zek ziahziah nu in gualzo pen nu ahih mah
bangin Jesu in mawhna, sihna leh Dawimangpa tungah nang leh kei adingin singlamteh tungah ka
“zozo hi” ci-in gualzawhna la a, ama ziaka hotna ngah a, Kha thupha namkim angah thu um mite
pen gualzo pente ihi hi. Tua pen Jesu hang bek hi.
Ka hotna tanlo ding ka hih teh ka ut bangbangin gam ta ning aci om hi. Tua bang acite pen
piangthak tatak lo ahih kei leh sami lua hi ding hi. Bang hang hiam cih leh tua bang gamtatna pha
gam tat ding Jesu in hong tatkhiat a, a bawl kholh sa hi (Eph. 2: 10). Mawhna bawl theih nadinga
hong tat hilo in gamtat hoih dinga hong tat ihi hi. Tua banga gamtat hoihlo a sawmte pen ta tatak hi
lo dinga zawl ta hi khading hi. Ta tatak gamtat hoih lote pen Topa’n sat ding (thu hilh) hi. Tua
banga satna thuaklote pen zawlta ci hi (Heb. 12:5-10). Tua bang mite Pasian in haksatna, supna,
liamna baina, ci natna tawh thu hilh ding hi. David kumpi pa in Bethseba amawhpih teh Pasian in
tua nutawh aneih a tapa thahsak hi (2 Sam. 11) tua bek thamlo-in, na inn sungah namsau ki
talawisak lo ding hi (2 Sam. 12:10) acih bangin Absalom in amah langdo, Absalom naunu Tamar
Amnon in buan, Absalom in Amnon that hi. Tua zahin Pasian in David thuhilh hi. Hihteng khit
ciangin David kisikkik a Pasian kiangah, “hotkhiatna hanga ka ngah lung nopna hong piakik in” ci-
in thu ngen hi (Late 51:12). Ka hotkhiatna hong piakik in cilo in ka hotkhiatna hanga ka lung nopna
hong pia kik in ci tektek hi.
Mi khat zong apa zi neu khat mawhpih kha ahih manin Paul in, “Tua mi pa pumpi a kisiat nadingin,
Satan khut ah na pia un. Tua hi leh Topa Jesu Ni ciangin a kha in hotkhiatna angah kha ding hi,” (1
Kor. 5:5) ci hi. Tua banah Pasian nasepna tawh kisai Paul in hih bangin na gen hi, “Mi khat nasepna
a kattum leh thaman tan dinga, amah ahih eh meikuang tawh kipelh in hotkhiatna a ngah ding (1
Kor. 3:15). Sihna khop mawhna om thei hi (1 Johan 5:16).

I thupi ah lut kik leng: I Topa Jesu Honpa leh Topa a, asang khem peuh pen, lei pianma pek a,
Pasian in Ama aituam dinga hong theihkholh, tawntung mun tung dinga hong seh kholh, hong sapte,
diktansakna hong piakte, tawntung muna hong minthansak dingte ih gen khin hi. Anuai ah hotna tan
ding leh tanloh ding thu gentehna tawh khum nuam ing.

Zawng in ta a puak ciang a nungah koih a ata in pom hi. A ta a gim ciangin kia hi. Zawhngeu
in ta a puak ciangin ata ngawngah a kam tawh pua in ama kiat ding kiat loh ding ata hatna tungah
kinga lo-in anu hatna ah kinga hi. Pasian uma a hot khiatna atan ngapte pen zawngno ta puak tawh
kibanga ahi zongin zawhngeu banga ta puate in Pasian khut sunga om ahih lam kiphawka
hotkhiatna pen tan lo ding aci ngam ih hi hi. Tua ahih manin a nutakna bit mamahhi. Sanggam nang
zawng ta puak pawl na hiam zawhngeu ta puak pawl na hiam? Pasian in tawntung Pasian ahih
manin, Amah tawh kisai khempeuh zong tawntung tawh kisai hi, ahotkhiatna zong tawntung hi pah
ahih manin misiangtho khempeuh a tawntungin bit mahmah hi. Pasian a kipuasak ih hih theih tek
ding ka lunggulh mana hih lai hong gelh ka hi hi. Topa’n hih lai asim khempeuh thupha hong pia
hen. Amen.