ერიკ ჰობსბაუმი

ერიკ ჰობსბაუმი
	ერიკ ჰობსბაუმი
	; ერიკ ჰობსბაუმი 2011 წანას
დაბადებაშ თარიღი:	9 მანგი, 1917
დაბადებაშ აბანი:	ალექსანდრია, ეგვიპტეშ სულთანატი
ღურაშ თარიღი:	გჷმათუთა 1, 2012 (95 წანერი)
ღურაშ აბანი:	ლონდონი, ინგლისი
ერუანობა:	ბრიტანალი
საქვარუა:	ისტორიკოსი, სოციალური თეორიტიკოსი, ავტორი
Magnum opus:	რევოლუციაშ ეპოქა: ევროპა 1789–1848 (1962); ბანდიტეფი (1969); კაპიტალიშ ეპოქა: 1848–1875 (1975); იმპერიაშ ეპოქა: 1875–1914 (1987); მარსელიოზაშ ექო (1990); ექსტრემიზმიშ ეპოქა: კუნტა მაეჩა ოშწანურა, 1914–1991 (1994)
ჟანრი:	გლობალური ისტორია
ნინა:	ინგლისური ნინა
ჯილდოეფი:	ბრიტანეთიშ აკადემიაშ მაკათური (1978); დოიჩერიშ მემორიალური პრემია (1995); ლაიონელ გელბერიშ პრემია (1995); უოლფსონიშ ისტორიული პრემია (1996); ღრისებაშ ორდენიშ კავალერი (1998); ერნსტ ბლოხიშ პრემია (2000); ბალცანიშ პრემია (2003); ლიტერატურაშ ომაფე ჯარალუაშ მაკათური (2006); ბოხუმიშ ისტორიული პრემია (2008)

ერიკ ჯონ ერნესტ ჰობსბაუმი (ინგლ. Eric John Ernest Hobsbawm; დ. 9 მანგი, 1917, ალექსანდრია, ეგვიპტეშ სულთანატი — ღ. 1 გჷმათუთა, 2012, ლონდონი, ინგლისი) — ბრიტანალი ისტორიკოსი, შინელი რე ინდუსტრიული კაპიტალიზმიშ, სოციალიზმიშ დო ნაციონალიზმიშ რკვიებეფით. ჰობსბაუმი რდჷ მარქსისტი ისტორიოგრაფი დო ნაციონალიზმიშ ართ-ართი დიდი კრიტიკოსი.

ერიკ ჰობსბაუმიქ დებადჷ 1917 წანას, ალექსანდრიას, ურიეფიშ ფანიას. ბაღანობა გატარჷ ვენას დო ბერლინს. გურაფულენდჷ ბერლინიშ გიმნაზიას. ჸათე პერიოდის დეინტერესჷ მარქსიზმით. გერმანიაშ თარობაშა ნაცისტეფიშ მულაშ უკული, ჰობსბაუმიშ ფანიაქ ოცხოვრებშა ლონდონშა გინილჷ, სოდეთ ჰობსბაუმიქ გურაფა გაგინძორჷ მერილებონიშ გრამატიკაშ სკოლას. 1936 წანას კემბრიჯიშ ომაფე კოლეჯიშა გემშართჷ, სოდეთ მიპალუ ისტორიაშ დოქტორიშ ხარისხი. სტუდენტობაშ ბორჯის ქაკათჷ ბრიტანეთიშ კომუნისტური პარტიას. მაჟირა მოსოფელიშ ლჷმაშ ბორჯის თიქ ქაკათჷ ომაფე ინჟინერეფიშ კორპუსის. 1947 წანას ჰობსბაუმიქ მუშობა ქიდიჭყჷ ბირკბეკიშ კოლეჯის ისტორიაშ ლექტორო. 1970-1982 წანეფს რდჷ ბირკბეკიშ პროფესორი დო 1982 წანაშე პროფესორი ემერიტუსი.

1952 წანას ჰობსბაუმიქ დარსხუ აკადემიური ჟურნალი "Past & Present", ნამუთ ართ-ართი ლიდერი პუბლიკაცია რდჷ სოციალური ისტორიაშ გოვითარაფაშ დარგის. 1960-იან წანეფს ჰობსბაუმი მუშენდჷ სტენფორდიშ უნივერსიტეტის ხოლო. 1984-1997 წანეფს რდჷ ნიუ-იორკიშ სოციალური რკვიებეფიშ ახალი სკოლაშ პროფესორი. 2002 წანაშე ღურაშახ რდჷ ბირკბეკიშ პრეზიდენტი.

ერიკ ჰობსბაუმიშ არძაშე უმოსო ჩინებული ნახანდი რე ტეტრალოგია ნამუთ იკათუანს წინგეფს: რევოლუციაშ ეპოქა: ევროპა 1789–1848, კაპიტალიშ ეპოქა: 1848–1875, იმპერიაშ ეპოქა: 1875–1914 (ნამუეფსით ჰობსბაუმი გირძე XIX ოშწანურა-ს უძახუდჷ) დო ექსტრემიზმიშ ეპოქა: კუნტა მაეჩა ოშწანურა, 1914–1991 (კუნტა XX ოშწანურა).

ერიკ ჰობსბაუმი რდჷ შხვადოშხვა პრემიეფიშ დო ჯილდოეფიშ ლაურეატი. ჰობსბაუმი რდჷ რესპუბლიკური უნივერსიტეტიშ (ურუგვაი), ვენაშ უნივერსიტეტიშ დო კარლიშ უნივერსიტეტიშ (პრაღა) საპატიო დოქტორი.