Brunei

Negara Brunei Darussalam
Vlagge Waepen
Baosisgegevens
Officiële landstaele:	Maleis
Oôdstad:	Bandar Seri Begawan
Regeriengsvurm:	Absoluten monarchie
Staetsoôd:	{{{staetsoôd}}}
Regeriengsleider:	{{{regeriengsleider}}}
Religie:	islam, hindoeïsme
Oppervlakte:	5.765 km² (8,6% waeter)
Inweuners:	374.577 (2007) (65 inw. / km²)
Aore gegevens
Volkslied:	Allah peliharakan Sultan
Munte:	Bruneise dollar (BND)
UTC:	UTC+8 (zeumertied: ni)
Nationaole feêstdag:	23 feberwari, 15 juli
Web | Code | Tel.	.bn | BRN | +673

't Sultanaot van Brunei, offisjeel Negara Brunei Darussalam, is een land in 't noôrdwessen van 't eiland Borneo in Zuudoôst-Azië. An de landziede wort heheel omriengd deur Maleisië, an de kustziede deur de Zuud-Chinese Zeê. 't Land wor verdeêld in twi deêln deur Limbang, een stik van de Maleise provincie Sarawak.

Heschiedenisse

't Oôgtepunt bereikn 't sultanaot van Brunei in de veêrtien'n tot de zestien'n eêuw. In deze tied besloeg 't et 't eêle eiland van Borneo en 't zuudwessen van de Filepijn'n. Europese invloedn maeken een ènde an deze macht. Nae een kortn oôrlog mie Spanje wirin a Burnei zeheviern verloor 't land een hroôt hebied an de Witte Rajahs van Sarawak, wideur a 't land ok in twi deêln wier verdeêld. Van 1888 tot 1984 was Brunei een Brits protectoraot.

Op 6 jannewari 1942 wier Brunei deur de Japanners bezet en op 14 juni 1945 wee bevried. In de jaeren '60 kwam der de Brunei Opstand die a probeern de North Borneo Federation te stichen. Op 1 jannewari 1984 wier Brunei onafankelijk.

Politiek en bestier

't Staetsoôd en tevens reheriengsleider is sultan Haji Hassanal Bolkiah Mu'izzaddin Waddaulah, eên van de riekste mensen ter waereld. Ie wor in deze functie bie-estaene deur zen ministers en adviesraeden. Der is hin hekozen wethevende macht. Den eêste minister wo deur de sultan anewezen, in den udihe situatie oefen 't een deze functie zelf uut.

Heografie

Brunei besti uut twi hescheien lihhende deêln die an edeêld worn deur de Maleise provincie Sarawak, West-Brunei en Oôst-Brunei. In 't westelijke deêl van Brunei leef 97% van de Bruneise bevolkieng tehen 3% (10.000 mensen) in de berhachtihe provincie Temburong. De totaole bevolkieng tel 383.000 mensen, wivan 46.000 in den oôdstad Bandar Seri Begawan. Andere hroôte steedn zien Muara, Seria en Kuala Belait.

• 't Oôgste punt van Brunei is de Pagonprick (1850 meter).
• 't Hroste meer van Brunei is 't Marimbun.

Klimaot

't Klimaot van Brunei is tropisch mie vee rehenval, zunneschien, oôhe temperatuurn en luchvochtigeid 't aele jaer deur. 't Land lig iets boven den evenaer.

Demohrafie

Kaerte van Brunei

Twiderde van de bevolkieng is van Maleisen ofkomst en den offisjele taele is dan ok 't Maleis (Bahasa Melayu). Vadder vurmen Chinezen (15%), Brittn en Australiërs een deêl van de bevolkieng, zodan ok Chinees en Iengels vee worn esproken.

Hosdiensen

De offisjele relihie van Brunei is den islam, wivan de sultan an 't oôd sti. Aore hosdiensen zien 't boeddhisme, chrissendom en in kleinere hemeênschappn ok nog inheems hosdiensen.

Economie

De productie van ruwen olie en aerdhas in Brunei is hoed voe bieni den elt van 't BNP. Aore bronn'n van inkomsen zien onder aore de klediengindestrie. De hezondeidszurg is hraotis en weuniengen en riest worn esubsidieerd. Der wor estreefd ni een minder afankelijk te worn van de productie van olie en has. Vadder probeer Royal Brunei hoeie vliegverbindiengen te vurmen mie Europa, Australië en Nieuw-Zeêland. 't Land is ok lid van de APEC.

Bestierlijke indeêlieng

Brunei is verdeêld in 4 districtn, de daerah:

• Belait
• Brunei en Muara
• Temburong
• Tutong

Deze districtn zien wee onderverdeêld in 38 mukims.

Alcohol

De verkoôp en publieke nuttihieng van alcohol is in Brunei verboodn. Butenlanders en nie-moslims is 't et toehestaene 12 flesjes bier of twi liter aore alceholische drank vanuut 't butenland over de hrens mee te neem'n. In 2007 hol deze rehel voe iedere 48 uur, noe hel iervoe hin tiedmarzje mi. Naeda de verkoôp in 1990 wier verboodn, waeren aolle nachclubs en cafés henoôdzaekt te sluten. Sommihe resteranjes schienkn echter nog alcohol heserveerd in theepottn.