Surströmming

Surströmming ("sng hui-hî") sī 1 chióng Sverige tiám-sim/liāu-lí, ki-pún châi-liāu iōng Pe̍h-hái "hui-hî" (鯡魚, ha̍k-miâ Clupea sio̍k), hoat-kàⁿ liáu-āu chng tī koàn-thâu tī chhiau-kip-chhī-tiûⁿ bē. Chin chē lâng, te̍k-pia̍t sī goā-kok-lâng, chin kiaⁿ Surströmming ê bī. Che sī in-ūi koàn-thâu khui--khui ê sî-chūn ē phīⁿ tio̍h bē-su pha̍k koè ji̍t-thâu ê pùn-sò hit-khoán chháu-phú bī, tì-tio̍h ū lâng kóng Surströmming ki-pún-siōng sī hāi--khì ê hî-á. Lâng tiāⁿ-tiāⁿ the̍h chhut-khì sek-goā chia̍h. Hèng chia̍h ê lâng jīn-ūi che sī 1 khoán tio̍h ta̍uh-ta̍uh o̍h chia̍h chiah chai-iáⁿ hó ê san-tin-hái-bī.

Chò surströmming iōng ê hî-á sī chhun-thiⁿ lia̍h ê hui-hî, hit-chūn ê châi-chit siōng chán. Hui-hî seng hē toà tháng-á lāi hoat-kàⁿ 1~2 kó͘ goe̍h, liáu-āu hē ji̍p-khì koàn-thâu lāi kè-sio̍k hoat-kàⁿ. Poàⁿ-nî chì 1 tang tiong-kan, chū-pún kóng-á hêng ê koàn-thâu ē in-ūi sè-khún pàng gá-suh chhut-lâi choâⁿ-á pìⁿ khah phòng hêng.

Kúi-ā-keng hâng-khong kong-si kìm-chí lâng chah surströmming koàn-thâu chiūⁿ-ki, kiaⁿ chhàu-phú kiam po̍k-chà.