假借

  提示：呢篇文講嘅唔係借詞。

假借係六書其中一種構成漢字嘅方法，即係將本來有音無字嘅字，借個同音字去用。

《說文》「假借者，本無其字，依聲託事，令長是也。」

古時，唐字本身數目有限，新概念入嚟嘅時候，又或者有啲新嘅嘢想講嘅時候，將新嘅意思畀咗之前嘅個音相同嘅字。久而久之，借過嚟嘅意思就成為個字嘅意思。

例

• 今
• 長
• 莫 - 本意為「挨晚」，借來表示唔係、唔好嘅意思，例如「莫失莫忘」
• 四 - 本意為「口、鼻呼出之氣」， 借來表示個「亖」字（三之後嘅數字）
• 萬 - 本意為「蠍子」，借來表示個「十個千」

粵語

粵語之中，有音，不過，個唐字唔知點寫，一係個字從冇存在過，一係冇人記得（失傳）。所以借個同音字去用寫出嚟。例如借用「而家」、「依家」、「宜加」去講 yi4 gaa1 嘅音，嚟表示「現今」、「呢一刻」、「呢一陣」嘅意思。

• 論盡
• 那西
• 科勞 - follow

寫粵文冇正式嘅官方機構去規範邊個字點寫。假借嘅用字版本可以好多，亦冇話邊個啱，明就算。

Info：英文借詞

香港人喺英治時期嗰陣就由英文借咗好多字詞入粵語。由英文借詞有個問題：如果粵語要由例如日本話嗰度借詞，好多時用粵音嚟讀啲日文漢字就得—

• 日本話口語字詞 ninki 簡單講係指受歡迎程度嘅意思；
• 呢隻口語字詞用漢字寫，通常會寫做人気；
• 用粵語讀人氣呢兩隻漢字— jan4 hei3；

但係，英文傳統上唔會攞漢字寫，「讀佢哋嘅漢字嘅粵音」呢種做法行唔通；於是香港人就大舉用假借，口語上借咗隻字詞過嚟，再搵啱音（或者大致上啱音）嘅漢字寫佢出嚟，例子：

英文 bus → 粵語語音 baa1 si2 → 假借漢字巴士

英文 hello → 粵語語音 haa1 lou2 → 假借漢字哈佬

英文 brother → 粵語語音 baa1 daa2 → 假借漢字巴打

睇埋

• 借詞
• 音譯
• 萬葉假名
• 訓讀：某程度上係假借嘅相反—假借係淨係攞隻漢字嘅讀音而忽略原先意思（取音不取意），訓讀就淨係攞隻漢字嘅意思而忽略原先讀音（取意不取音）。