公孫度

公孫度（150年—204年），字升濟，係幽州遼東襄平人，東漢末年割據遼東嘅軍閥。

公孫度
東漢 遼東割據軍閥
生	150年
死	204年
活躍時期	189～204年
繼任	公孫康
仔女	公孫康、公孫恭
遞啲名
字	升濟

生平

永康元年（167年），公孫度同佢老豆公孫延為咗躲避戰亂而搬到玄菟定居。一開始係做郡吏，後尾因為佢個幼名同玄菟太守公孫琙早逝嘅仔公孫豹一樣而得到照顧，被舉做尚書郎，後尾又升做冀州刺史，因為引起非議而被免職。公孫度嘅同鄉徐榮喺董卓嗰度做嘢，佢舉薦咗公孫度做遼東太守。公孫度本嚟因為出身低微而被當地人輕視，但佢一上任就打死襄平令公孫昭，並且執行嚴刑峻法，夷滅百幾家人嚟立威，郡中嘅豪門望族田韶呢啲同公孫度無怨無仇嘅人都被佢揾藉口殺咗。公孫度上任後又不斷開闢疆土，東伐高句麗，西擊烏丸，並且過海攞咗東萊各縣，喺當地設置營州刺史嚟管理。擴展領土後自封遼東侯、平州牧，並且認為自己係遼東王，所以拒絕咗曹操封嘅永寧鄉侯。佢喺建安九年死咗，佢個位由佢個仔公孫康繼承。

部下

• 王烈，東漢末年北方名士，曾經做過公孫度嘅長史。
• 陽儀，公孫度嘅親信，公孫度曾經同佢商討要唔要自立為王。
• 涼茂，被公孫度擅自拘留，公孫度曾經諗住趁曹操遠征烏桓嗰陣時攻打曹操後方嘅鄴城，但喺畀涼茂勸阻。
• 柳毅，公孫度嘅部將，後尾喺營州畀魏將張遼做低咗。

屋企

長輩

• 公孫延：公孫度嘅亞爸，同公孫度一齊移居玄菟郡。

仔女

• 公孫康：公孫度個仔。公孫度死後繼承遼東太守嘅位，將嚟投奔嘅袁熙、袁尚嘅人頭送畀曹操。又大破高句麗軍，攻陷高句麗都城丸都城。
• 公孫恭：公孫度個仔。公孫康死咗之後，因為兩個仔年紀重細，所以由佢繼承遼東太守嘅位。後尾大病，做咗閹人，畀大個咗嘅公孫淵脅逼退位。

孫

• 公孫晃，公孫淵嘅亞哥。因為任子制而喺洛陽做官，公孫淵叛亂被殺之後被下令處死。
• 公孫淵，公孫晃嘅細佬。搶咗自己亞叔嘅位，後尾因為反叛而被司馬懿做低同埋殺害。