創意限制

創意限制（英文：creative limitation）係有關提升創意嘅一個概念，指一位管理者特登對員工設下一啲限制－包括時間限制、材料限制、或者限住佢哋唔准用某啲方法呀噉，並且想用呢樣嘢嚟提升創意。

對於「創意限制係能夠有效噉提升創意」呢個觀點，學界同商界係有人支持又有人反對嘅：

• 支持方嘅主要論點係噉：人做嘢嗰陣通常都係會用習慣性用開嘅方法－覺得用開掂，就會一路係噉用住（睇埋啟發法等嘅概念），所以如果想啲員工用吓新方法嚟做嘢諗嘢（創意嘅必要條件），就實要令啲既有嘅做嘢方法行唔通，啲員工先會有動力去搵新方法做嘢諗嘢，所以設下限制係能夠提升創意嘅；
• 反對方嘅主要論點就係噉：人要展現創意，就實要有空間俾佢哋自由噉探索；人要有動機探索，就需要覺得自己唔受即時嘅威脅（可以睇吓玩嘅概念），所以如果想啲員工能夠自主噉探索唔同嘅做嘢諗嘢方法，就需要俾佢哋有充裕嘅資源（包括時間同材料等），如果唔係佢哋就會進入防守狀態，唔敢亂咁試新嘢；

亦都有啲人提出比較中庸嘅觀點，認為現實嘅情況係複雜嘅，「創意限制對創意有利定有害」視乎情況－創意限制喺某啲情況下對創意有利，喺另一啲情況下對創意有害。到咗 2020 年代，學界同商界都仲係喺度研究緊呢條問題，未有一致嘅共識。